ໂຮງຮຽນສິນໄຊ ໄດ້ຮັບການຍ້ອງຍໍຜົນງານດ້ານດີເດັ່ນພັດທະນາການສຶກສາ

ໂຮງຮຽນປະຖົມ ແລະມັດທະຍົມສົມບູນສິນໄຊ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 30 ປີ (7.10.1994-7.10.2024) ຂຶ້ນວັນທີ 9 ພະຈິກ 2024 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ເປັນປະທານຂອງທ່ານ ນາງ ອາລີ ພົນເສນາ ຜູ້ອຳນວຍການໂຮງຮຽນສິນໄຊ ມີທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກີລາ ທ່ານ ຫຸມແພງ ສີສົມບັດ ເລຂາຄະນະບໍລິຫານງານຊາວໜຸ່ມນະຄອນຫຼວງວຽງຈັນ (ນວ) ທ່ານ ພູທົງ ສຸວັນທອງ ເລຂາຄະນະບໍລິຫານງານຊາວໜຸ່ມເມືອງຈັນທະບູລີ ຄະນະຜູ້ບໍລິຫານຄະນະອຳນວຍການ ຄູອາຈານ ຜູ້ປົກຄອງ ແລະ ນັກຮຽນເຂົ້າຮ່ວມ.

ໃນພິທີທ່ານ ນາງ ອາລີ ພົນເສນາ ໄດ້ຂຶ້ນຜ່ານປະຫວັດຄູ ແລະຜົນງານຂອງໂຮງຮຽນສິນໄຊຕະຫຼອດ 30 ປີຜ່ານມາວ່າ: ໂດຍພາຍໃຕ້ການນໍາພາຂອງກະຊວງສຶກສາທິການ ແລະ ກີລາ (ສສກ) ພະແນກ ສສກ ນວ ຫ້ອງການ ສສກ ເມືອງຈັນທະບູລີ ໂຮງຮຽນໄດ້ຮັບການພັດທະນາທາງດ້ານປະລິມານ ແລະຄຸນນະພາບເປັນກ້າວໆມາເຊັ່ນ: ໂຮງຮຽນເລີ່ມສ້າງຕັ້ງວັນທີ 1 ກັນຍາ 1991 (ສົກຮຽນ 1991-1992) ເປັນຕົ້ນມາໂດຍເລີ່ມຈາກການຮຽນ-ການສອນຊັ້ນປະຖົມ ເຊິ່ງມີນັກຮຽນ 260 ຄົນ ຍິງ 112 ຄົນ ແລະ ນັກຮຽນມັດທະຍົມຕົ້ນ 133 ຄົນ ຍິງ 71 ຄົນ ລວມທັງໝົດ 393 ຄົນ ແລະ ຫ້ອງຮຽນ 8 ຫ້ອງ ມາຮອດປັດຈຸບັນສົກຮຽນ 2024-2025 ໂຮງຮຽນມີນັກ ຮຽນທັງໝົດ 1.641 ຄົນ ຍິງ 891 ຄົນ ຄູ-ອາຈານ 66 ຄົນ ຍິງ 37 ຄົນ ມີຫ້ອງຮຽນ 39 ຫ້ອງ ນັກຮຽນທີ່ມາຮຽນມາຈາກ 7 ເມືອງຂອງ ນວ ຄື: ຈັນທະບູລີ ໄຊເສດຖາ ສີສັດຕະນາກ ສີໂຄດຕະບອງ ໄຊທານີ ຫາດຊາຍຟອງ ແລະ ນາຊາຍທອງ ແລະ 8 ແຂວງຄື: ຫຼວງນໍ້າທາ ຫົວພັນ ຊຽງຂວາງ ຫຼວງພະບາງ ບໍລິຄຳໄຊ ຄຳມ່ວນ ສະຫວັນນະເຂດ ແລະ ຈຳປາສັກ ໃນຕະຫຼອດ 30 ປີ ໂຮງຮຽນສິນໄຊໄດ້ມີການຂະຫຍາຍຕົວຮັບປະກັນໃນການຮຽນ-ການສອນຕາມໂຄງການຫຼັກສູນ 5 ຫຼັກມູນຂອງການສຶກສາ ເນື້ອໃນ 3 ຂໍ້ແຂ່ງຂັນ ແລະ 3 ລັກສະນະຂອງການສຶກສາຂອງກະຊວງ ສສກ ວາງອອກ ໄດ້ສືບຕໍ່ພັດທະນາທັງຄຸນນະພາບ ແລະ ປະລິມານຢ່າງຕໍ່ເນື່ອງຈຶ່ງສາມາດມີຜົນສຳເລັດຄື:ຫຼອດ 30 ປີຜ່ານມາສາມາດສ້າງນັກຮຽນເກັ່ງຂັ້ນປະຖົມ ມັດທະຍົມຕົ້ນ ແລະ ມັດທະຍົມປາຍ ອັນດັບທີ 1 ເຖິງອັນດັບຊົມເຊີຍດັ່ງນິ້:ຂັ້ນເມືອງ 365 ຄົນ ໄດ້ອັນດັບທີ 1 ມີ 69 ຄົນ ຂັ້ນ ນວ 262 ຄົນ ໄດ້ອັນດັບທີ 1 ມີ 69 ຄົນ ແລະ ຂັ້ນທົ່ວປະເທດ 9 ຄົນ ໄດ້ອັນດັບທີ 1 ມີ 7 ຄົນ ອັນດັບທີ 2 ມີ 2 ຄົນ ນອກນີ້ຍັງໄດ້ຮັບການຍ້ອງຍໍຂັ້ນຕ່າງໆຕື່ມອີກ.

ໃນພິທີຍັງໄດ້ມອບໃບຍ້ອງຍໍຂັ້ນກະຊວງ ສສກ ໃຫ້ໂຮງຮຽນສິນໄຊທີ່ມີຜົນງານດີເດັ່ນໃນການປະກອບສ່ວນເຫື່ອແຮງສະຕິປັນຍາຄວາມຮູ້ຄວາມສາມາດເຂົ້າໃນການພັດ ທະນາວຽກງານການສຶກສາ ວິທະຍາສາດ ແລະ ກີລາໃນໂອກາດວັນຄູແຫ່ງຊາດຄົບ ຮອບ 30 ປີ ໃຫ້ກຽດມອບໂດຍທ່ານລັດຖະມົນຕີກະຊວງ ສສກ ມອບນາມມະຍົດພັດທະນາດີເດັ່ນຂັ້ນກະຊວງ ສສກ ໃຫ້ຜູ້ອວຍການໂຮງຮຽນສິນໄຊ ມອບໃບຍ້ອງຍໍຂັ້ນກະຊວງ ສສກ ໃຫ້ຄູອາຈານ 39 ຄົນ ມອບໃບຍ້ອງຍໍຂັ້ນພະແນກ ສສກ ນວ ໃຫ້ຄູອາຈານ 10 ຄົນ ຂັ້ນຫ້ອງການ ສສກ ເມືອງຈັນທິບູລີ 15 ຄົນ ມອບໃບຍ້ອງຍໍຂັ້ນເລຂາຄະນະບໍລິຫານງານຊາວໜຸ່ມ ນວ ໃຫ້ໂຮງຮຽນ ຄູນໍາພາ ແລະເຍົາວະຊົນທີ່ມອບຊໍ່ດອກໄມ້ ແລະເປັນກ້ອນກຳລັງຕ້ອນຮັບບັນດາທ່ານນາຍົກລັດຖະມົນຕີທີ່ມາເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 44 ແລະ 45 ທີ່ລາວເຮົາເປັນເຈົ້າພາບປີ 2024 ມອບໃບຍ້ອງຍໍຂັ້ນເລຂາຊາວໜຸ່ມເມືອງຈັນທະບູລີໃຫ້ສະມາຊິກເຍົາວະຊົນກອງດຸລິຍາງ ແລະມອບຊໍ່ດອກໄມ້ໃນກອງປະຊຸມໃຫຍ່ຂອງອົງການຈັດຕັ້ງຊາວໜຸ່ມແມ່ຍິງນັກຮົບເກົ່າ ແລະກຳມະບານຂັ້ນເມືອງຈັນທະບູລີ ມອບໃບຍ້ອງຍໍຂັ້ນອຳ ນວຍການໂຮງຮຽນໃຫ້ນັກຮຽນທີ່ໄປສະແດງສິລະປະຕ້ອນຮັບຄະນະພັນລະຍາບັນດາປະເທດທີ່ເຂົ້າຮ່ວມກອງປະຊຸມໄອປາ ແລະໃຫ້ນັກຮຽນເສັງເລື່ອນຂັ້ນ ປ1-ປ4 ມ1-ມ3 ແລະ ມ5-ມ6 ໄດ້ເກັ່ງຮອບດ້ານຄະແນນສະເລ່ຍບໍ່ຫຼຸດ 7.

ແຫລ່ຂ່າວ ວຽງຈັນໃໝ່

แชร์