ກອງປະຊຸມວ່າດ້ວຍການສຶກສາຊັ້ນສູງ ແນໃສ່ສ້າງການເຊື່ອມໂຍງ ເຊື່ອມຈອດກັນໃນ ອາຊຽນ ໃຫ້ຫຼາຍຂື້ນ

ວັນທີ 11 ພະຈິກ 2024 ກອງປະຊຸມນະໂຍບາຍອາຊຽນ ວ່າດ້ວຍການສຶກສາຊັ້ນສູງ 2024 ໄດ້ໄຂຂຶ້ນຢ່າງເປັນທາງການ ພາຍໃຕ້ຄຳຂວັນ: “ການມີສ່ວນຮ່ວມໃນການຂັບເຄື່ອນການສຶກສາຊັ້ນສູງ: ການສ້າງຄວາມຍືນຍົງ ແລະຄວາມຫຼາກຫຼາຍໂດຍຜ່ານການເຊື່ອມໂຍງ ແລະການມີສ່ວນຮ່ວມຂອງທຸກພາກສ່ວນ” ກະຊວງສຶກສາທິການ ແລະກິລາ ແຫ່ງ ສປປ ລາວ ຮ່ວມກັບອົງການ UNESCO ແລະ ແຜນງານການເຊື່ອມໂຍງແບບ ຍືນຍົງຂອງ EU-ASEAN-ໂຄງການການສຶກສາຊັ້ນສູງ (SCOPE-HE), ຈັດຕັ້ງປະຕິບັດໂດຍ ອົງການ Nuffic ແລະ DAAD ຮ່ວມກັນຈັດຂື້ນ.

ກອງປະຊຸມນະໂຍບາຍອາຊຽນ ວ່າດ້ວຍ ການສຶກສາຊັ້ນສູງ 2024 ຄັ້ງນີ້ ເປັນຂີດຫມາຍໃນການເລີ່ມຕົ້ນລໍາດັບການສົນທະນາດ້ານນະໂຍບາຍທີ່ສໍາຄັນ, ກໍານົດທິດໃຫ້ແກ່ການສົນທະນາທີ່ມີຄວາມຄືບຫນ້າ ແລະ ຍືນຍົງ, ເຊິ່ງສິ່ງດັ່ງກ່າວນີ້ຈະຊ່ວຍໃຫ້ບັນດາປະເທດສະມາຊິກອາຊຽນ ແລະ EU ເຮັດວຽກຮ່ວມກັນເພື່ອແນໃສ່ສ້າງການສຶກສາຊັ້ນສູງທີ່ເຊື່ອມໂຍງ ແລະ ເຊື່ອມຈອດກັນໃຫ້ຫຼາຍຂື້ນ.

ທ່ານ ຫຼ້າວັນ ວົງຄໍາສານ ຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກິລາ ແຈ້ງໃຫ້ຮູ້ວ່າ: ໃນປີນີ້ ເປັນຄັ້ງທໍາອິດທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມນະໂຍບາຍອາຊຽນ ວ່າດ້ວຍການສຶກສາຊັ້ນສູງ ກອງປະຊຸມໄດ້ສຸມໃສ່ປຶກສາຫາລືຫລາຍບັນຫາສໍາຄັນ ເປັນຕົ້ນການພົວພັນຂອງຜູ້ມີສ່ວນຮ່ວມ ແລະຄວາມຫລາກຫລາຍການຂະຫຍາຍໂອກາດໃນການເຂົ້າເຖິງການສຶກສາຊັ້ນສູງ ແລະ ຄົ້ນຄວ້າວິທະຍາສາດ, ການສົ່ງເສີມຄວາມສາມາດໃນການຈ້າງງານ, ນະວັດຕະກຳທີ່ກ່ຽວ ຂ້ອງກັບການສຶກສາຊັ້ນສູງ, ສີ່ງທ້າທາຍ ແລະ ຄວາມຍືນຍົງໃນການຫັນເປັນດິຈິຕອນໃນຂົງເຂດການສຶກສາ ແລະ ການສົ່ງເສີມການເຄື່ອນຍ້າຍ, ການເຊື່ອມໂຍງລະຫວ່າງພາກພື້ນ ແລະສາກົນ.

ກອງປະຊຸມນະໂຍບາຍອາຊຽນ ວ່າດ້ວຍການສຶກສາຊັ້ນສູງ 2024 ເປັນຂີດໝາຍສໍາຄັນໃນການກໍາ ນົດນະໂຍບາຍດ້ານການສຶກສາຕ່າງໆ ຊ່ວຍໃຫ້ປະເທດສະມາຊິກອາຊຽນ ແລະ ອີຢູ ເຮັດວຽກຮ່ວມກັນຢ່າງມີປະສິດທິຜົນ ເພື່ອແນໃສ່ສ້າງການສຶກສາຊັ້ນສູງທີ່ເຊື່ອມໂຍງ ແລະ ເຊື່ອມຈອດກັນໃຫ້ຫຼາຍຂື້ນ. ໃນໄລຍະ 4 ປີຕໍ່ໜ້າ ຂະແໜງການກ່ຽວຂ້ອງ ຍັງມີແຜນຈະຈັດກອງປະຊຸມ ແລະ ສົນທະນາທາງດ້ານນະໂຍບາຍຈໍານວນ 6 ຄັ້ງຢູ່ປະເທດສະມາຊິກອາຊຽນ ແລະ ເອີລົບ. ການສົນທະນາເຫຼົ່ານີ້ຈະກວມເອົາບັນດາປະເດັນທີ່ສໍາຄັນເຊັ່ນ: ການຈ້າງງານ, ທັກສະດີຈິຕອນ, ແລະ ການສຶກສາແບບຍືນຍົງ.

แชร์