ໃນຕອນຄໍ່າວັນທີ 10 ພະຈິກ 2024 ທີ່ເດີ່ນກິລາໃນຮົ່ມຂອງແຂວງ ກົມຮູບເງົບ ກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ຮ່ວມກັບວິທະຍຸ-ໂທລະພາບສູນກາງຈີນ (CMG) ປະຈໍາ ສປປ ລາວ ໄດ້ເຄື່ອນໄຫວສາຍຮູບເງົາດີເດັ່ນລາວ-ຈີນ, ທ່ານ ນາງ ແສງແກ້ວ ມໍຊຽວຫລິງງ ຫົວໜ້າວິທະຍຸ-ໂທລະພາບສູນກາງຈີນ (CMG) ປະຈຳ ສປປ ລາວ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍຄະນະນໍາແຂວງ ແລະ ມວນຊົນຊາວແຂວງເຊກອງ ເຂົ້າຮ່ວມຮັບຊົມ.

 

ທ່ານ ຈັນໄທ ຄຳມະນີວົງ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງເຊກອງ ກ່າວວ່າ: ງານເທສະການສາຍຮູບເງົາຄັ້ງນີ້, ເປັນກິດຈະກໍາໜຶ່ງທີ່ສອງຝ່າຍ ລາວ-ຈີນ, ຈີນ-ລາວ ເພື່ອໃຫ້ປະຊາຊົນໄດ້ເບິ່ງໄດ້ຊົມ ແລະ ເພື່ອແນໃສ່ສ້າງຂະບວນການຮອບດ້ານຂ່ຳນັບຮັບຕ້ອນກອງປະຊຸມໃຫຍ່ 3 ຂັ້ນ ຂອງພັກ, ວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ (ວັນທີ 2 ທັນວາ 1975-2 ທັນວາ 2024) ແລະ ວັນສໍາຄັນອື່ນໆ ຂອງພັກ-ຂອງຊາດ. ພ້ອມນີ້, ຍັງເປັນການໂຄສະນາເຜີຍແຜ່ອຸດສະຫະກຳວັດທະນະທຳທີ່ສ້າງສັນ ດ້ວຍຮູບແບບການບັນເທິງ ໂດຍຜ່ານສື່ມວນຊົນຮູບແບບໜຶ່ງໃນຍຸກປັດຈຸບັນ ແນໃສ່ໃຫ້ເປັນຄະຕິເຕືອນໃຈແກ່ສັງຄົມພວກເຮົາ ແລະ ເພື່ອເພີ່ມພູນຄຸນສ້າງສາຍພົວພັນສາມັກຄີ ມິດຕະພາບລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ ໃຫ້ນັບມື້ມີຄວາມແໜ້ນແຟ້ນຂຶ້ນເລື້ອຍໆ.

 

ການເຄື່ອນໄຫວສາຍຮູບເງົາຄັ້ງນີ້, ສໍາລັບຢູ່ແຂວງເຊກອງ ແມ່ນຈັດຂຶ້ນຢູ່ 2 ເມືອງ ຄື: ໃນຄໍ່າຄືນວັນທີ 9 ພະຈິກ 2024 ຈັດຂຶ້ນຢູ່ເມືອງທ່າແຕງ ແລະ ໃນຕອນຄໍ່າມື້ນີ້ ວັນທີ 10 ພະຈິກ 2024 ຈັດຢູ່ເມືອງລະມາມ ມີທັງໝົດ 4 ເລື່ອງ ຄື: ເລື່ອງຕົ້ນໄມ້ນັ້ນເມື່ອເຍົາໄວ, ໜ່ວຍປາບຢານະລົກ, ສິງໜຸ່ມໄວໄຟ ແລະ ເລື່ອງ ຈ່າຍໃຫ້ກ້ຽງກ່ອນລາໂລກ.