ກອງປະຊຸມລະດັບສູງຂະແໜງຄວບຄຸມຢາເສບຕິດ ແລະປະເທດຜູ້ໃຫ້ທຶນ

ກອງປະຊຸມລະດັບສູງຂະແໜງການຄວບຄຸມຢາເສບຕິດ ແລະ ບັນດາປະເທດຜູ້ໃຫ້ທຶນເພື່ອແກ້ໄຂບັນຫາຢາເສບຕິດຢູ່ ສປປ ລາວ ໄດ້ຈັດຂຶ້ນໃນວັນທີ 8 ພະຈິກ 2024, ໂດຍການເປັນປະທານຂອງທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ, ມີທ່ານ ຊູໂຕມຸ ໂກຍຊູມິ ເອກອັກຄະລັດຖະທູດ ຜູ້ມີອໍານາດເຕັມ ແຫ່ງປະເທດຍີ່ປຸ່ນປະຈໍາ ສປປ ລາວ ແລະທ່ານ ມະສູດ ກາລິມິປົວ ຜູ້ຕາງໜ້າອົງການສະຫະປະຊາຊາດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການລາຍງານສະພາບບັນຫາຢາເສບຕິດ, ການຈັດຕັ້ງປະຕິບັດວາລະແຫ່ງຊາດ ຢູ່ ສປປ ລາວ; ໄດ້ກຳນົດວຽກທີ່ເປັນບູລິມະສິດ ເພື່ອຈະລາຍງານຕໍ່ກອງປະຊຸມລະດັບສູງຂະແໜງຢາເສບຕິດ; ຮັບຟັງການລາຍງານຈາກອົງການ UNODC ກ່ຽວກັບສະພາບບັນຫາອາຊະຍາກຳຂ້າມຊາດ, ໂຄງການພັດທະນາທາງເລືອກທົດແທນການປູກພືດທີ່ມີສານເສບຕິດ ແລະ ບັນຫາຢາເສບຕິດ ແລະ ສຸຂະພາບ ພ້ອມທັງ, ປຶກສາຫາລື ແລະ ຮັບຟັງການປະກອບຄຳເຫັນຂອງຄະນະຜູ້ແທນກ່ຽວກັບທິດທາງແຜນການໃນການຮ່ວມມືຄວບຄຸມ, ສະກັດກັ້ນ ແລະ ຕ້ານຢາເສບຕິດ ຢູ່ ສປປ ລາວ ໃນຕໍ່ໜ້າ.

ທ່ານພົນຕີ ຄໍາກິ່ງ ຜຸຍຫຼ້າມະນີວົງ ກ່າວວ່າ: ບັນຫາຢາເສບຕິດ ຢູ່ໃນໂລກ ແລະ ພາກພື້ນ ໄດ້ມີການຂະຫຍາຍວົງກວ້າງ, ເພີ່ມທະວີຄວາມອັນຕະລາຍ ເຊິ່ງໄດ້ຕິດພັນກັບການເຊື່ອມໂຍງກັບບັນຫາການກໍ່ການຮ້າຍ, ອາຊະຍາກໍາຂ້າມຊາດ, ອາຊະຍາກໍາທາງໂທລະຄົມມະນາຄົມ, ອາຊະຍາກໍາທາງຄອມພິິວເຕີ, ອາຊະຍາກໍາທາງການຟອກເງິນ, ການຄ້າມະນຸດ ແລະ ອາຊະຍາກໍາອື່ນໆ ທີ່ໃຊ້ຄວາມຮຸ່ນແຮງປະເພດຕ່າງໆມີທ່າອ່ຽງເພີ່ມຂຶ້ນໃນແຕ່ລະປີ, ກາຍເປັນໄພຂົ່ມຂູ່ຕໍ່ການສ້າງສາພັດທະນາເສດຖະກິດ-ສັງຄົມ-ວັດທະນະທຳ ກໍຄືຄວາມໝັ້ນຄົງຂອງພາກພື້ນ ແລະ ປະຊາຊາດຢູ່ໃນໂລກ. ສໍາລັບ ສປປ ລາວ ກໍຄືປະເທດອື່ນໆ ໄດ້ຮັບຜົນກະທົບໂດຍກົງ ແລະ ປະເຊີນກັບໄພຂົ່ມຂູ່ຈາກບັນຫາຢາເສບຕິດຢ່າງຫຼີກລ້ຽງບໍ່ໄດ້; ເຊິ່ງໄດ້ສົ່ງຜົນກະທົບຮ້າຍແຮງໃນທົ່ວສັງຄົມ ແລະ ເປັນສາເຫດພາໃຫ້ເກີດປະກົດການຫຍໍ້ທໍ້ ແລະ ອາຊະຍາກໍາປະເພດຕ່າງໆ, ຈໍານວນຄະດີ, ຜູ້ຖືກຫາ, ຜູ້ຕິດຢາເສບຕິດ ແລະ ຈໍານວນຢາເສບຕິດແຕ່ລະປະເພດທີ່ຢຶດໄດ້ ແມ່ນເພີ່ມຂຶ້ນຢ່າງໜ້າເປັນຫ່ວງ; ເລ່ຫຼ່ຽມກົນອຸບາຍໃນການເຄື່ອນໄຫວລັກລອບຂົນສົ່ງ, ຄ້າຂາຍຢາເສບຕິດ ມີລັກສະນະເລິກແລບແນບນຽນດ້ວຍຫຼາຍວິທີການ-ຮູບການທີ່ສະຫຼັບສັບຊ້ອນ, ມີການຈັດຕັ້ງເປັນກຸ່ມເຄືອຂ່າຍແໜ້ນໜາ, ເຊື່ອມໂຍງທັງພາຍໃນ ແລະ ຕ່າງປະເທດ, ນໍາໃຊ້ພາຫະນະ ແລະ ອຸປະກອນທີ່ທັນສະໄໝ, ມີອາວຸດກຽມພ້ອມຕອບໂຕ້ກັບເຈົ້າໜ້າທີ່ປະຕິບັດກົດໝາຍ.

ໃນຊຸມປີທີ່ຜ່ານມາ, ລັດຖະບານ ລາວ ໄດ້ຖືເອົາການແກ້ໄຂບັນຫາຢາເສບຕິດເປັນວຽກງານບູລິມະສິດ, ຈຳເປັນ ແລະ ຮີບດ່ວນ ເຊິ່ງໄດ້ຍົກຂຶ້ນເປັນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2021-2023 ແລະ ສືບຕໍ່ໄປຈົນໝົດປີ 2025 ໂດຍໄດ້ປັບປຸງບາງມາດຕາກ່ຽວກັບກົດໝາຍວ່າດ້ວຍຢາເສບຕິດ, ໄດ້ອອກນິຕິກຳ ເພື່ອໃຫ້ສອດຄ່ອງກັບສະພາບການຄວາມເປັນຈິງໃນປັດຈຸບັນ ໃນການແກ້ໄຂບັນຫາຢາເສບຕິດ; ໄດ້ເອົາໃຈໃສ່ໃນການໂຄສະນາສຶກສາອົບຮົມໃຫ້ທົ່ວປວງຊົນ ໂດຍສະເພາະແມ່ນໄວໜຸ່ມ ແລະ ນັກສຶກສາ ເພື່ອໃຫ້ເຂົາເຈົ້າເຂົ້າໃຈເຖິງພິດໄພອັນຕະລາຍຈາກຢາເສບຕິດຢ່າງຕໍ່ເນື່ອງ, ໄດ້ຈັດຕັ້ງປະຕິບັດໂຄງການພັດທະນາທາງເລືອກທົດແທນການປູກພືດທີ່ມີສານເສບຕິດ ຢູ່ບັນດາແຂວງພາກກາງ ແລະ ພາກເໜືອຂອງລາວ, ໄດ້ສ້າງສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດຂຶ້ນທັງໝົດ 14 ແຫ່ງ ເພື່ອບຳບັດ, ປິ່ນປົວ, ຟື້ນຟູສຸຂະພາບ, ໃຫ້ຄໍາປຶກສາແກ່ຜູ້ຕິດຢາເສບຕິດ ແລະ ຈັດຝຶກອົບຮົມວິຊາຊີບທີ່ຈໍາເປັນໃຫ້ແກ່ພວກເຂົາເຈົ້າ ເພື່ອກັບຄືນມາເປັນຄົນດີຂອງຄອບຄົວ ແລະ ສັງຄົມ, ໄດ້ໃຫ້ຄວາມສໍາຄັນຕໍ່ກັບການປະຕິບັດມາດຕະການດ້ານກົດໝາຍ ໂດຍເຈົ້າໜ້າທີ່ລາວເຮົາສາມາດມ້າງໄດ້ຫຼາຍຄະດີສຳຄັນ, ຢຶດຢາເສບຕິດ ແລະ ສານເຄມີຕັ້ງຕົ້ນໄດ້ຈຳນວນຫຼາຍ. ນອກຈາກນັ້ນ, ກໍໄດ້ເອົາໃຈໃສ່ໃຫ້ການຮ່ວມມື, ແລກປ່ຽນບົດຮຽນ, ຂໍ້ມູນ-ຂ່າວສານ, ປະສົບການກັບບັນດາປະເທດເພື່ອນມິດສາກົນ ແລະ ອົງການຈັດຕັ້ງສາກົນຕ່າງໆ ເປັນຕົ້ນແມ່ນໄດ້ສ້າງສູນປະສານງານແມ່ນ້ຳຂອງປອດໄພ, ສູນປະສານງານແມ່ນ້ຳຂອງ-ແມ່ນ້ຳລ້ານຊ້າງ, ຫ້ອງການປະສານງານຕາມຊາຍແດນ ຫຼື BLOs ເພື່ອເປັນຈຸດປະສານງານ, ແລກປ່ຽນບົດຮຽນ ແລະ ຂໍ້ມູນ-ຂ່າວສານ ເພື່ອແກ້ໄຂບັນຫາຢາເສບຕິດຮ່ວມກັນ ເພື່ອຈະເຮັດໃຫ້ບັນຫາຢາເສບຕິດຢູ່ ສປປ ລາວ ຫຼຸດນ້ອຍຖ້ອຍລົງເທື່ອລະກ້າວ.

ຂ່າວ: ໃພ້ໄຊທານີ້

แชร์