ເຊກອງ ອະນຸມັດພັດທະນາໂຄງການໄຟຟ້າແສງຕາເວັນ ກຳລັງຕິດຕັ້ງ 5 ເມກາວັດ

ອົງການປົກຄອງແຂວງເຊກອງ ຕາງໜ້າໂດຍພະແນກແຜນການ ແລະການລົງທຶນແຂວງເຊກອງ ໄດ້ເຊັນສັນຍາອະນຸມັດໃຫ້ ພັດທະນາໂຄງການ (PDA) ໂຄງການໄຟຟ້າແສງຕາເວັນ ອ່າງເກັບນ້ຳຫ້ວຍຂຽວ ມີກຳລັງຕິດຕັ້ງ 5 ເມກາວັດ(MW), ເຂດບ້ານໜອງບົງ ເມືອງລະມາມ ແຂວງເຊກອງ, ມູນຄ່າ 4 ລ້ານກວ່າໂດລາ ລະຫວ່າງ ອົງການປົກຄອງແຂວງເຊກອງ ກັບ ບໍລິສັດ ບໍລິສັດ ໂພນຊັບຈະເລີນກໍ່ສ້າງ-ສ້ອມແປງຂົວທາງ ເຄຫາສະຖານ ແລະຊົນລະປະທານ ຈຳກັດຜູ້ດຽວ, ໂດຍມີທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ພ້ອມດ້ວຍຂະແໜງການກ່ຽວຂ້ອງຮ່ວມເປັນສັກຂີພິຍານ.

ໃນການເຊັນສັນຍາຄັ້ງນີ້ ໄດ້ຈັດຂຶ້ນໃນວັນທີ 6 ພະຈິກ ຜ່ານມາ, ທີ່ພະແນກແຜນການ ແລະການລົງທຶນແຂວງເຊກອງ, ລົງນາມໂດຍ ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະ ການລົງທຶນ ແຂວງ ແລະ ເຊັນເປັນພະຍານໂດຍ ທ່ານ ພິມວົງ ຊວງມະນີ ຮອງຫົວໜ້າພະແນກພະລັງງານ ແລະ ບໍ່ແຮ່ ແລະ ທ່ານ ບົວໄລ ວິໄລວົງ ຮອງເຈົ້າເມືອງລະມາມ ຮ່ວມກັບ ບໍລິສັດ ເຊັນໂດຍ ທ່ານ ໂພນ ພົມມະຈັນ ປະທານບໍລິສັດ ໂພນຊັບຈະເລີນກໍ່ສ້າງ-ສ້ອມແປງຂົວທາງ ເຄຫາສະຖານ ແລະຊົນລະປະທານ ຈຳກັດຜູ້ດຽວ ແລະ ເຊັນເປັນພະຍານ ໂດຍ ທ່ານ ຄຳມ້າວ ບຸພານຸວົງ ແລະ ທ່ານ ເພັດດາວົງ ບຸນມີສະຫວັດ ທີ່ປຶກສາບໍລິສັດ.

ໂດຍປະຕິບັດຕາມໃບມອບສິດຂອງເຈົ້າແຂວງເຊກອງ ສະບັບເລກທີ 108/ຊກ ລົງວັນທີ 30 ຕຸລາ 2024 ວ່າດ້ວຍມອບສິດໃຫ້ພະແນກແຜນການ ແລະ ການລົງທຶນແຂວງ ເປັນຜູ້ຕາງໜ້າອົງການປົກຄອງແຂວງ ເປັນສັນຍາພັດທະນາໂຄງການໄຟຟ້າພະລັງງານແສງຕາເວັນ ອ່າງເກັບນ້ຳຫ້ວຍຂຽວ, ເຂດບ້ານໜອງບົງ, ເມືອງລະມາມ, ແຂວງເຊກອງ ກັບບໍລິສັດ ໂພນຊັບຈະເລີນກໍ່ສ້າງ-ສ້ອມແປງຂົວທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ເພື່ອພັດທະນາໂຄງການຢ່າງເປັນທາງການ, ເຊິ່ງມີກຳລັງຕິດຕັ້ງທັງໝົດ 5 ເມກາວັດ, ມີມູນຄ່າການກໍ່ສ້າງທັງໝົດ 4.5 ລ້ານ ກວ່າໂດລາ, ນຳໃຊ້ແຜງໂຊລາເຊວ ຈຳນວນ 5,000 ແຜງ,ໄລຍະການກໍ່ສ້າງ ຫຼື ພັດທະນາໂຄງການເປັນເວລາ 24 ເດືອນ ແມ່ນໃຫ້ສຳເລັດ, ໂຄງການໄຟຟ້າພະລັງງານແສງຕາເວັນ ນັບວ່າເປັນພະລັງງານ ທົດແທນ ແລະ ທັງເປັນທາງເລືອກທີ່ສຳຄັນ ໃນການສ້າງຄວາມຫລາກຫລາຍ ຂອງແຫລ່ງຜະລິດພະລັງງານ, ເປັນພະລັງງານສະອາດ ທີ່ມີຜົນກະທົບຕໍ່ສິ່ງແວດລ້ອມ ແລະ ສັງຄົມບໍ່ຫລາຍ ເຊິ່ງຖືກຕ້ອງສອດຄ່ອງກັບທິດການພັດທະນາສີຂຽວຍືນຍົງ ຂອງລັດຖະບານ.


ຂ່າວ:ພຸດທະສອນ

แชร์