ທົດສະກຳຄືນ ຄະດີກໍ່ເຫດປ້ອງກັນຕົວເກີນຂອບເຂດ ເຮັດໃຫ້ຜູ້ອື່ນເສຍຊີວິດຄາທີ່

ໃນວັນທີ 25 ຕຸລາ 2024 ຜ່ານມາ ເຈົ້າໜ້າທີ່ພະແນກຕຳຫຼວດສືບສວນ-ສອບສວນ ຄະດີອາຍາຫ້ອງຕຳຫຼວດ ປກສ ແຂວງຄຳມ່ວນ, ໄດ້ສົມທົບກັບພາກສ່ວນທີ່ກ່ຽວຂ້ອງ ນຳຕົວທ້າວ ບຸນຊູ ເກດທະວົງ ອາຍຸ 64 ປີ, ອາຊີບກຳມະກອນ, ຢູ່ບ້ານຈອມເພັດ ເມືອງທ່າແຂກ ແຂວງຄຳມ່ວນ. ໄປທົດສະກຳຄືນ ຫຼັງຈາກກໍ່ເຫດປ້ອງກັນຕົວເອງເກີນຂອບເຂດເຮັດໃຫ້ທ້າວ ຄຳສີ ສໍລຳເພືອງ ອາຍຸ 64 ປີ, ຢູ່ບ້ານທ່າແຂກເໜືອ ເສຍຊິວິດຄາທີ່ ໃນເວລາປະມານ 14:10 ໂມງ ຂອງວັນທີ 03 ກັນຍາ 2024 ທີ່ຜ່ານມານີ້.

ຜ່ານການສືບສວນ-ສອບສ່ວນຂອງເຈົ້າໜ້າທີ່ພະແນກຕຳຫຼວດສືບສວນ-ສອບສວນ ຄະດີອາຍາຫ້ອງຕຳຫຼວດ ປກສ ແຂວງຄຳມ່ວນ ທ້າວ ບຸນຊູ ເກດທະວົງ ໄດ້ສາລະພາບຕໍ່ເຈົ້າໜ້າທີ່ວ່າ: ໃນເວລາ 07:30 ໂມງ ຂອງວັນທີ 03 ກັນຍາ 2024 ທ້າວ ບຸນຊູ ເກດທະວົງ ແມ່ນໄດ້ຂີ່ລົດຈັກ ມຸ່ງໜ້າໄປດື່ມກາເຟ ຢູ່ຮ້ານກາເຟ ເຂດບ້ານໂພນສະໝາມ ເມືອງທ່າແຂກ ພໍເຂົ້າໄປຮອດຮ້ານກາເຟດັ່ງກ່າວ ຈິ່ງພົບເຫັນ ທ້າວ ຄຳສີ ສໍລຳເພືອງ (ຜູ້ເສຍຊີວິດ) ພ້ອມໝູ່ຄູ່ຂອງລາວອີກ 03 ຄົນ ພາກັນນັ່ງດື່ມເຫຼົ້າຂາວກັນຢູ່. ຍ້ອນທ້າວ ຄຳສີ (ຜູ້ເສຍຊີວິດ) ແມ່ນຮູ້ຈັກກັນ ກັບ ທ້າວບຸນຊູ ແຕ່ວ່າບໍ່ໄດ້ສະໜິດກັນປານໃດ ຈິ່ງເອີ່ນທ້າວບຸນຊູ ມານັ່ງດື່ມເຫຼົ້າຂາວນຳກັນ ແຕ່ວ່າ ທ້າວ ບຸນຊູ ເກດທະວົງ ຈຶ່ງໄດ້ຕອບ ທ້າວ ຄຳສີ (ຜູ້ເສຍຊີວິດ) ວ່າ: ບໍ່ໄດ້ດື່ມມາດົນແລ້ວຊິດື່ມກາເຟເອົາ. ທ້າວບຸນຊູ ແມ່ນເຄີຍຕ້ອງໂທດມາກ່ອນ ຖືກກັກຕົວຢູ່ຄ້າຍຄຸມຂັງ-ດັດສ້າງ ປກສ ແຂວງຄຳມ່ວນ ດັ່ງນັ້ນ ທ້າວ ຄຳສີ (ຜູ້ເສຍຊີວິດ) ຈຶ່ງໄດ້ເວົ້າຢອກ ທ້າວ ບຸນຊູ ວ່າ: ໃນເວລາທີ່ເຈົ້າຢູ່ໃນຄຸກ ຂ້ອຍແມ່ນໄດ້ໄປລົມກັບເມຍຂອງເຈົ້າ. ໃນເມື່ອ ທ້າວ ບຸນຊູ ໄດ້ຍິນແບບນັ້ນ ຈຶ່ງເວົ້າຢອກກັບວ່າ: ເມຍເຈົ້າຂ້ອຍແຮງໄດ້ນອນນຳແລ້ວ. ເມື່ອທ້າວ ຄຳສີ (ຜູ້ເສຍຊີວິດ) ໄດ້ຍິນແນວນັ້ນຈຶ່ງໄດ້ຍ່າງອອກຈາກວົງເຫຼົ້າທັນທີ. ໃນເວລາ 13:00 ໂມງຂອງວັນດຽວກັນ ທ້າວ ບຸນຊູ ເກດທະວົງ ແມ່ນໄດ້ອອກໄປເຮັດວຽກຢູ່ຕະຫຼາດນາໂບ ເປັນຍາມປ້ອງກັນຕະຫຼາດ. ພໍຮອດເວລາ 13:30 ໂມງຂອງວັນດຽວກັນ ໄດ້ມີຄົນຍ່າງມາຖາມ ແລະ ບອກ ທ້າວ ບຸນຊູ ວ່າ: ເຈົ້າບໍຫຼິ້ນກັບເມຍ ຂອງທ້າວ ຄໍາສີ (ຜູ້ເສຍຊີວິດ) ທ້າວ ບຸນຊູ ຈຶ່ງຕອບວ່າ: ບໍ່ໃດ໋ ຂ້ອຍບໍ່ໄດ້ຫຼິ້ນຊູ້ສາວກັບເມຍລາວ ເມຍລາວຂ້ອຍຍັງບໍ່ຮູ້ຊໍ້າ. ຄັນຊັ້ນໃຫ້ເຈົ້າໄປຫາ ທ້າວ ຄຳສີ (ຜູ້ເສຍຊີວິດ)ເດີ. ທ້າວ ບຸນຊູ ຈຶ່ງຕອບປະຕິເສດບໍ່ໄປ ຍ້ອນບໍ່ໄດ້ຜິດຫຍັງ. ຫຼັງຈາກນັ້ນໃນ ເວລາປະມານ 14:00ໂມງຂອງວັນດຽວກັນ ທ້າວ ບຸນຊູຈຶ່ງຍ່າງອອກໄປຊົງກາເຟຢູ່ຕໍ່ໜ້າຫ້ອງນໍ້າ ພ້ອມກັບໝູ່ອີກຄົນໜຶ່ງ ໃນເວລາດັ່ງກ່າວ ໄດ້ມີທ້າວ ຄຳສີ (ຜູ້ເສຍຊີວິດ)ໄດ້ຍ່າງມາຫາ ທ້າວ ບຸນຊູ ເກດທະວົງ ແລ້ວຈັບຄໍເສື້ອ ທາງດ້ານຫຼັງຂອງລາວ ແລ້ວເອົາມີດຍາວ ປະມານ 30 cm ມາຈີ້ໃສ່ງ່ອນຄໍ ທາງຫຼັງຂອງ ທ້າວ ບຸນຊູ ແລ້ວເວົ້ານາບຂູ່ວ່າ: ມຶງຕ້ອງຕາຍມຶງຫຼິ້ນເມຍກູ ຫຼັງຈາກນັ້ນ ທ້າວ ຄຳສີ (ຜູ້ເສຍຊີວິດ) ໄດ້ເອົາມີດຈີ້ ທ້າວ ບຸນຊູ ແລ້ວຄຸມຕົວຜູ້ກ່ຽວຍ່າງອອກມານອກຕະຫຼາດ ເພື່ອເອົາຕົວທ້າວ ບຸນຊູ ເມືອລົມກັນ ກັບເມຍຂອງຕົນໃຫ້ຮູ້ເລື່ອງ. ພໍຍ່າງອອກຈາກຕະຫຼາດໄດ້ປະມານ 20 ແມັດ, ທ້າວ ຄຳສີ (ຜູ້ເສຍຊີວິດ) ຈຶ່ງໄດ້ເອົາມີດມາຈີ້ໃສຄໍຫອຍ ຄືຈະປາດຄໍຂອງທ້າວ ບຸນຊູ ດັ່ງນັ້ນ ທ້າວບຸນຊູ ຈຶ່ງໄດ້ຍາດເອົາມີດ ນຳຜູ້ກ່ຽວແຕ່ບໍ່ສຳເລັດ ຈຶ່ງເຮັດໃຫ້ມີດບາດມືເບື້ອງຊ້າຍ ຫຼັງຈາກນັ້ນ ທ້າວ ຄຳສີ ຈຶ່ງໄດ້ເອົາມີດຈີ້ທາງຫຼັງຂອງ ທ້າວບຸນຊູ ຍ່າງຄຸມຕົວເມືອເຮືອນຂອງຜູ້ກ່ຽວ. ພໍຮອດໜ້າຈເຮືອນຂອງທ້າວ ຄຳສີ (ຜູ້ເສຍຊີວິດ) ຜູ້ກ່ຽວຈຶ່ງ ໄດ້ບອກໃຫ້ ທ້າວ ບຸນຊູ ນັ່ງລົງ ແລ້ວເວົ້າອີກວ່າ : ມຶງຕ້ອງຕາຍມື້ນີ້ລະແລ້ວບອກໃຫ້ທ້າວ ບຸນຊູ ນອນໝູບລົງກັບພື້ນດິນ ແລ້ວພິກຫງາຍໜ້າຂຶ້ນ ຫຼັງຈາກນັ້ນ ທ້າວ ຄຳສີ ຈຶ່ງໄດ້ເອົາຕີນເບື້ອງຂວາ ຢຽບໜ້າເອິກຂອງທ້າວ ບຸນຊູ ແລ້ວຜູ້ກ່ຽວກໍ່ໄດ້ຈົກເອົາໂທລະສັບນຳຖົງໂສ່ງ ເພື່ອມາໂທຫາເມຍຂອງຕົນ. ແຕ່ວ່າເມຍແມ່ນບໍ່ໄດ້ຮັບສາຍ ໃນເວລານັ້ນກໍ່ໄດ້ມີຄົນຢູ່ເຮືອນໃກ້ຄຽງ ໄດ້ເອີ້ນມາຫ້າມບໍ່ໃຫ້ທ້າວ ຄຳສີ ເຮັດແບບນັ້ນ ແຕ່ຜູ້ກ່ຽວບໍ່ຟັງໃຜ ຖ້າມີໃຜເຂົ້າມາແມ່ນຕົນເອງຈະຂ້າໃຫ້ຕາຍໝົດ. ພໍໄດ້ໂອກາດທ້າວ ບຸນຊູ ຈຶ່ງໄດ້ຢືນຂຶ້ນເພື່ອຍາດຈັບເອົາມີດນຳມື ຂອງທ້າວ ຄຳສີ (ຜູ້ເສຍຊີວິດ) ເຮັດໃຫ້ທ້າວ ຄຳສີ ລົ້ມລົງພື້ນດິນ ຫຼັງຈາກນັ້ນ ທ້າວ ຄຳສີ ຈຶ່ງໄດ້ລຸກຂຶ້ນມາແລ້ວເວົ້າວ່າ: ມຶງຕ້ອງຕາຍ ພ້ອມທັງຍ່າງເຂົ້າມາຫາທ້າວ ບຸນຊູ ໃນຂະນະນັ້ນ ທ້າວ ບຸນຊູ ຈິ່ງຍາດເອົາມີດນຳ ທ້າວ ຄຳສີ ໄດ້ສຳເລັດ ພາຍຫຼັງທ້າວ ບຸນຊູ ຍາດເອົາມີດໄດ້ແລ້ວ ຈຶ່ງໄດ້ໃຊ້ມີດແທງໃສ່ຫົວນົມເບື້ອງຊ້າຍຂອງທ້າວ ຄຳສີ 01 ບາດ ເຮັດໃຫ້ທ້າວ ຄຳສີ ລົ້ມລົງ ແລ້ວທ້າວ ບຸນຊູ ຈຶ່ງແທງເຂົ້າທາງຫຼັງລຸ່ມຂີ່ແຮ້ 01 ບາດ ແລະ ແທງລຸ່ມງ່ອນດ້ານຫຼັງອີກ 01 ບາດ. ເຮັດໃຫ້ທ້າວ ຄຳສີ ນອນງາຍທ້ອງເສຍຊີວິດຄາທີ່. ຫຼັງຈາກນັ້ນ ທ້າວ ບຸນຊູ ກໍ່ຍ່າງກັບເມືອບ່ອນເຮັດວຽກຂອງຕົນ ພໍໄປໄດ້ປະມານ 07 ແມັດ. ທາງເຈົ້າໜ້າທີ່ຕຳຫຼວດສືບສວນ-ສອບສວນ ຄະດີອາຍາຫ້ອງຕຳຫຼວດ ປກສ ແຂວງຄຳມ່ວນ ແລະ ປກສ ກຸ່ມບ້ານ ໄດ້ເຂົ້າກັກຕົວທ້າວ ບຸນຊູ ເກດທະວົງ ມາດຳເນີນຄະດີຕາມລະບຽບກົດໝາຍ.

ຂ່າວ: ແຂວງຄໍາມ່ວນ

แชร์