ປະທານບໍລິສັດ AIDC ຮ່ວມສົນທະນາ ທັດສະນະແນວທາງລະດົມແຫຼ່ງທຶນ ເພື່ອຊຸກຍູ້ຜູ້ຜະລິດກະສິກໍາ

ທ່ານ ພຶດສະພາ ພູມມະສັກ ປະທານບໍລິສັດ AIDC ໄດ້ເຂົ້າຮ່ວມສົນທະນາ "ທັດສະນະແນວທາງລະດົມແຫຼ່ງທຶນເພື່ອຊຸກຍູ້ ແລະ ເພີ່ມໂອກາດໃຫ້ຫົວໜ່ວຍທຸລະກິດ-ຜູ້ຜະລິດ ໃນຂົງເຂດກະສິກໍາແບບຍືນຍົງ" ໃນກອງປະຊຸມກ່ຽວກັບວຽກງານມະຫາພາກ ພາຍໃຕ້ຫົວຂໍ້ “ການຮັກສາສະຖຽນລະພາບທາງດ້ານເງິນຕາ“ ທີ່ ທະນາຄານແຫ່ງ ສປປ ລາວ ໄດ້ຈັດຂຶ້ນ ໃນວັນທີ 1 ພະຈິກ 2024, ໂດຍການເປັນປະທານຂອງ ທ່ານນາງ ຂັນແກ້ວ ຫຼ້າມະນີເງົາ ຮອງຜູ້ວ່າການທະນາຄານ ແຫ່ງ ສປປ ລາວ, ມີບັນດາຫົວໜ້າກົມ-ຮອງກົມ, ຜູ້ຕາງໜ້າຈາກກະຊວງ, ທະນາຄານທຸລະກິດ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຂັນແກ້ວ ຫຼ້າມະນີເງົາ ກ່າວວ່າ: ກອງປະຊຸມໃນຄັ້ງນີ້, ເປັນເວທີສົນທະນາທີ່ມີຄວາມໝາຍສໍາຄັນຫຼາຍ ເພື່ອເຮັດໃຫ້ຜູ້ເຂົ້າຮ່ວມໄດ້ປຶກສາຫາລື, ຄົ້ນຄວ້າມາດຕະການວິທີແກ້ໄຂບັນຫາໃຫ້ຖືກຕ້ອງ, ສອດຄ່ອງ ເພື່ອໃຫ້ກົມວິຊາການຂອງ ທະນາຄານ ແຫ່ງ ສປປ ລາວ ຈັດຕັ້ງປະຕິບັດດ້ວຍຄວາມເປັນເຈົ້າການ ເພື່ອແກ້ໄຂບັນຫາທີ່ຫຍຸ້ງຍາກ ແລະ ຂ້າມຜ່ານໄປໄດ້. ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການນໍາສະເໜີວຽກງານ 3 ຫົວຂໍ້ ຄື: 1. ການຮັກສາສະຖຽນລະພາບທາງດ້ານເງິນຕາ ນໍາສະເໜີຮ່ວມກັນລະຫວ່າງ (ທະນາຄານແຫ່ງ ສປປ ລາວ, ກະຊວງການເງິນ,ກະຊວງອຸດສາຫະກໍາ ແລະການຄ້າ, ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົມຮົມ); 2. ການຄຸ້ມຄອງເງິນຕາຕ່າງປະເທດ ແນໃສ່ສະໜັບສະໜູນນະໂຍບາຍເສດຖະກິດມະຫາພາກ ນໍາສະເໜີຮ່ວມກັນລະຫວ່າງ (ທະນາຄານແຫ່ງ ສປປ ລາວ, ກະຊວງອຸດສາຫະກໍາ ແລະ ການຄ້າ, ກະຊວງການເງິນ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ); 3. ທັດສະນະແນວທາງລະດົມແຫຼ່ງທຶນເພື່ອຊຸກຍູ້ ແລະ ເພີ່ມໂອກາດໃຫ້ຫົວໜ່ວຍທຸລະກິດ-ຜູ້ຜະລິດ ໃນຂົງເຂດກະສິກໍາແບບຍືນຍົງ ນໍາສະເໜີຮ່ວມກັນລະຫວ່າງ (ສໍານັກງານຄະນະກໍາມະການຄຸ້ມຄອງຫຼັກຊັບ, ທະນາຄານການຄ້າຕ່າງປະເທດລາວມະຫາຊົນ, ທະນາ ຄານສົ່ງເສີມກະສິກໍາ ຈໍາກັດ, ທະນາຄານຮ່ວມທຸລະກິດລາວ-ຫວຽດ ຈໍາກັດ, ທະນາຄານຫວຽດຕິນລາວ ຈໍາກັດ ແລະ ບໍລິສັດ AIDC).

ພິເສດສໍາລັບຫົວຂໍ້ທັດສະນະແນວທາງລະດົມແຫຼ່ງທຶນເພື່ອຊຸກຍູ້ ແລະເພີ່ມໂອກາດໃຫ້ຫົວໜ່ວຍທຸລະກິດ-ຜູ້ຜະລິດ ໃນຂົງເຂດກະສິກໍາແບບຍືນຍົງ ທ່ານ ພຶດສະພາ ພູມມະສັກ ປະທານບໍລິສັດ AIDC ກໍໄດ້ເຂົ້າຮ່ວມສົນທະນາໃນເວທີດັ່ງກ່າວ, ເຊີ່ງດຳເນີນໂດຍ ທ່ານ ຄຳແກ້ວ ວິສີສົມບັດ ຫົວຫນ້າກົມຄຸ້ມຄອງທະນາຄານທຸລະກິດ, ໃນພິທີດັ່ງກ່າວ ໄດ້ມີການສົນທະນາ ກ່ຽວກັບບັນຫາຕ່າງໆທາງດ້ານເງິນຕາຕ່າງປະເທດ ທີ່ກ່ຽວພັນກັບການດໍາເນີນທຸລະກິດຢູ່ ສປປ ລາວ ໂດຍສະເພາະ ແມ່ນກ່ຽວກັບການເຂົ້າຫາແຫຼ່ງທຶນ ທີ່ຈະຊ່ວຍຜູ້ປະກອບການລາວສາມາດເຂົ້າເຖິງແຫຼ່ງທຶນ ເພື່ອນໍາມາຕໍ່ຍອດໃຫ້ແກ່ທຸລະກິດ, ສໍາລັບນັກທຸລະກິດທີ່ສົນເຂົ້າຫາແຫຼ່ງທຶນ ຂອງກອງທຶນ Venture Capital & Private Equity Funds (VC ທັງໝົດແອນ PE) ສາມາດຕິດຕາມລາຍລະອຽດໄດ້ເພີ່ມທີ່ ເຟສບຸກ ລາຍການ Phatalk, tiktok phatalk_1888 ແລະ youtube ຊ່ອງ phatalk.

ທ່ານ ພຶດສະພາ ພູມມະສັກ ໄດ້ມຸມມອງວ່າ: ຜູ້ປະກອບການລາວສ່ວນໃຫຍ່ແມ່ນເຮັດແບບຄອບຄົວຕາມມີຕາມເກີດຊຶ່ງຂາດສະເຕັບໃນການດຳເນີນທຸລະກິດ, ສະນັ້ນ ກະຊວງອຸດສາຫະກຳ ແລະ ການຄ້າ, ກະຊວງກະສິກຳ ແລະປ່າໄມ້, ທະນາຄານ ລວມທັງພາກສ່ວນທີ່ກ່ຽວຂ້ອງຕ້ອງໄດ້ເຂົ້າມາມີສ່ວນຮ່ວມ ເພື່ອຊ່ວຍໃຫ້ທຸລະກິດດັ່ງກ່າວປະສົບຜົນສໍາເລັດໄປໄດ້. ນອກຈາກນັ້ນທ່ານຍັງຝາກໃຫ້ຜູ້ປະກອບການທີ່ປະສົບຜົນສໍາເລັດແລ້ວຈົ່ງຈັບມືສົ່ງເສີມຜູ້ທີ່ເລີ່ມໃຫມ່ທີ່ເປັນຄົນລາວເພື່ອໃຫ້ສາມາດດຳເນີນທຸລະກິດໄປໄດ້.

แชร์