ສປປ ລາວ ເປັນເຈົ້າພາບຈັດສຳມະນາແຜ່ນແພພື້ນເມືອງອາຊຽນ ຄັ້ງທີ 9

ກອງປະຊຸມສຳມະນາແຜ່ນແພພື້ນເມືອງອາຊຽນ ຄັ້ງທີ 9 ພາຍໃຕ້ຫົວຂໍ້: “ຮັດແໜ້ນສາຍພົວພັນປະຊາຄົມອາຊຽນ ຜ່ານມໍລະດົກວັດທະນະທໍາ ແລະແຜ່ນແພ” ທີ່ ສປປ ລາວ ຮັບກຽດເປັນເຈົ້າພາບໄດ້ຈັດຂຶ້ນໃນລະຫວ່າງວັນທີ 4-6 ພະຈິກ 2024 ຢູ່ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານນາງ ນາລີ ສີສຸລິດ ພັນລະຍາ ປະທານປະເທດ ແຫ່ງ ສປປ ລາວ, ປະທານທີ່ປຶກສາກິດຕິມະສັກສະມາຄົມຫັດຖະກຳລາວ, ໃຫ້ກຽດເຂົ້າຮ່ວມມີ ສົມເດັດ ອາຊີຊ່າ ອີດສະການດ້າ ພະລາຊິນີ ແຫ່ງ ລັດປະຮັງ ມາເລເຊຍ ເຊິ່ງເປັນຜູ້ກໍ່ຕັ້ງ, ຜູ້ອຸປະຖໍາ ແລະ ປະທານມູນນິທິຕໍ່າຫູກ ແຫ່ງ ຣາຊະວົງ ປະຮັງ, ທ່ານນາງ ໂງ ເຟືອງ ລີ ພັນລະຍາ ເລຂາທິການໃຫຍ່ພັກກອມມູນິດຫວຽດນາມ, ມີປະທານສະມາຄົມສິລະປະແຜ່ນແພພື້ນເມືອງ ແຫ່ງອາຊີຕາເວັນອອກສ່ຽງໃຕ້, ບັນດາທູຕານຸທູດ ແລະພາກສ່ວນກ່ຽວຂ້ອງ.

ທ່ານ ນາງ ນາລີ ສີສຸລິດ ກ່າວວ່າ: ການສຳມະນາໃນຄັ້ງນີ້, ສະແດງໃຫ້ເຫັນເຖິງສາຍພົວພັນອັນເລິກເຊິ່ງທາງດ້ານວັດທະນະທຳ ລະຫວ່າງ ບັນດາປະເທດອາຊຽນ ແລະບໍ່ພຽງແຕ່ເປັນການປະກອບສ່ວນເຂົ້າໃນການອະນຸລັກສິລະປະແຜ່ນແພພື້ນເມືອງເທົ່ານັ້ນ,ແຕ່ຍັງເປັນການໃຫ້ກຽດ, ເຊີດຊູພູມປັນຍາ, ຄວາມມານະພະຍາຍາມ ແລະ ຄວາມຄິດສ້າງສັນຂອງແມ່ຍິງຜູ້ທີ່ໄດ້ອະນຸລັກຮັກສາປະເພນີທີ່ງົດງາມລໍ້າເລິກ ແລະ ມີຄຸນຄ່າສູງສົ່ງໃຫ້ຄົງຢູ່ກັບສັງຄົມຂອງພວກເຮົາຕະຫລອດມາ ແລະ ຕະຫລອດໄປ. ການຕໍ່າແຜ່ນແພໃນອະດີດ, ແຕ່ລະປະເທດແມ່ນເຮັດພໍໃຜພໍລາວຕາມທ່າເເຮງບົ່ມຊ້ອນທາງດ້ານວັດຖຸດິບເພື່ອນໍາໃຊ້ເຂົ້າໃນຊີວິດປະຈໍາວັນຂອງຕົນ, ແຕ່ມາເຖິງປັດຈຸບັນວຽກງານຕໍ່າແຜ່ນແພມີການເຊື່ອມໂຍງເຂົ້າຫາກັນ, ມີການສະໜອງວັດຖຸດິບ, ມີຕະຫລາດຈໍາໜ່າຍຜະລິດຕະພັນທີ່ຫລາກຫລາຍ ແລະ ກວ້າງຂວາງຂຶ້ນເຮັດໃຫ້ພວກເຮົາມີສິນຄ້າທີ່ຫລາກຫລາຍເພື່ອແລກປ່ຽນກັນ.

ສຳລັບ ບັນດາປະເທດອາຊຽນ, ເນື່ອງຈາກມີຄວາມໃກ້ຊິດທາງດ້ານທີ່ຕັ້ງພູມສາດເຮັດໃຫ້ມີການແລກປ່ຽນຄວາມຮູ້ ແລະແລກປ່ຽນວັດຖຸດິບເຊິ່ງກັນ ແລະກັນ ຈຶ່ງເຮັດໃຫ້ຜະລິດຕະພັນຕໍ່າເເຜ່ນຂອງພວກເຮົາມີຮູບແບບຄ້າຍຄືກັນເຖິງວ່າແຜ່ນແພພື້ນເມືອງຂອງແຕ່ລະປະເທດຈະມີຮູບແບບລວດລາຍທີ່ວິຈິດງົດງາມເປັນເອກະລັກສະເພາະຂອງໃຜລາວ, ແຕ່ສິ່ງທີ່ພວກເຮົາມີຄວາມພາກພູມໃຈ ແລະເຊີດຊູຮ່ວມກັນນັ້ນກໍຄືຄວາມຮັກ, ທັກສະ, ຫົວຄິດປະດິດສ້າງ, ຄວາມປານີດທີ່ມາຈາກພູມປັນຍາ ຂອງແມ່ຍິງອາຊຽນ ທີ່ຝັງຢູ່ໃນແຕ່ລະຜືນຜ້າທີ່ສວຍສົດງົດງາມ.

ປັດຈຸບັນ, ເນື່ອງຈາກການຫັນປ່ຽນວິຖີຊີວິດແບບດັ້ງເດີມໄປສູ່ວິຖີຊີວິດທີ່ທັນສະໄໝຕິດພັນກັບການຂະຫຍາຍຕົວທາງດ້ານເສດຖະກິດສັງຄົມ, ເຖິງວ່າພວກເຮົາພວມຜະເຊີນກັບສິ່ງທ້າທາຍໃນການປົກປັກຮັກສາວັດທະນະທໍາການຜະລິດ ແລະ ການນຸ່ງຖືທີ່ນຳໃຊ້ແຜ່ນແພພື້ນເມືອງໃຫ້ຄົງຢູ່ກໍຕາມ, ບັນດາປະເທດອາຊຽນໄດ້ມີຄວາມເອົາໃຈໃສ່ໃນການສົ່ງເສີມ ແລະປົກປັກຮັກສາແຜ່ນແພພື້ນເມືອງໄວ້ໄດ້ເປັນຢ່າງດີ. ສະເພາະຢູ່ ສປປ ລາວ, ການຕໍ່າຫູກທໍໄໝ ໄດ້ຕິດແໜ້ນກັບວິຖີຊີວິດຂອງແມ່ຍິງລາວບັນດາເຜົ່າມາແຕ່ດຶກດໍາບັນ, ມາເຖິງປັດຈຸບັນ, ເຕັກໂນໂລຊີມີການຂະຫຍາຍຕົວແຕ່ພວກເຮົາກໍຍັງສືບຕໍ່ໃຫ້ຄ່ານິຍົມການຕໍ່າແຜ່ນແພແບບດັ້ງເດີມ. ທັງນີ້, ກໍເພື່ອຮັກສາມູນເຊື້ອທາງດ້ານວັດທະນະທໍາອັນດີງາມຂອງຊາດ ໄວ້ໃຫ້ດໍາລົງຄົງຢູ່ຊົ່ວລູກຊົ່ວຫລານສືບຕໍ່ໄປ. ນອກຈາກນັ້ນ, ການນຸ່ງຖືຜ້າແພພື້ນເມືອງຍັງຄົງເປັນສ່ວນໜຶ່ງທີ່ສໍາຄັນໃນຊີວິດປະຈໍາວັນຂອງຄົນລາວບໍ່ວ່າຢູ່ໃນຕົວເມືອງໃຫຍ່ກໍຄືຢູ່ໃນເຂດຊົນນະບົດແມ່ຍິງລາວແມ່ນຍັງນິຍົມນຸ່ງຜ້າໄໝບ່ຽງແພ. ສ່ວນຜູ້ຊາຍລາວ ກໍຍັງສືບຕໍ່ນິຍົມຊົມຊອບນຸ່ງເສື້ອຜ້າຝ້າຍ, ຜ້າໄໝທີ່ເປັນເອກະລັກຂອງລາວໃນງານປະເພນີທີ່ສໍາຄັນຂອງຄອບຄົວກໍຄືຂອງຊາດໄວ້ໄດ້ຢ່າງງົດງາມ.

ທ່ານ ນາງ ນາລີ ສີສຸລິດ ຍັງໄດ້ສະແດງຄວາມຫວັງວ່າແຕ່ລະຜືນຜ້າທີ່ພວກເຮົາສຶກສາ, ແຕ່ລະເລື່ອງລາວທີ່ພວກເຮົາແບ່ງປັນ ແລະແຕ່ລະແນວຄິດທີ່ພວກເຮົາແລກປ່ຽນກັນຢ່າງສ້າງສັນໃນການສຳມະນາໃນຄັ້ງນີ້, ຈະເປັນການປະກອບສ່ວນເຂົ້າໃນການສ້າງປະຊາຄົມອາຊຽນທີ່ເຂັ້ມແຂງ, ປະຊາຄົມທີ່ມີຄວາມສາມັກຄີປອງດອງໃນຄວາມຫລາກຫລາຍ.

ຂ່າວ: ສາວລາວໃຕ້

แชร์