ຈໍາປາສັກ ຈັດງານວາງສະແດງ ແລະຈຳໜ່າຍສິນຄ້າ ສົ່ງເສີມຜະລິດຕະພັນທ້ອງຖິ່ນ

ພິທີເປີດງານວາງສະແດງ ແລະຈຳໜ່າຍສິນຄ້າ ເພື່ອສົ່ງເສີມຜະລິດຕະພັນຂອງທ້ອງຖິ່ນ ປີ 2024 ຈັດຂຶ້ນໃນວັນທີ 1-3 ພະຈິກ 2024 ຢູ່ ເດີ່ນໂຮງແຮມເອຣາວັນ ນະຄອນປາກເຊ ແຂວງຈຳປາສັກ.

ການເປີດງານວາງສະແດງ ແລະ ຈໍາໜ່າຍສີນຄ້າຄັ້ງນີ້ ເພື່ອສົ່ງເສີມຜະລິດຕະພັນຂອງທ້ອງ ຖິ່ນ ພາຍໃຕ້ໂຄງການສ້າງຄວາມເຂັ້ມແຂງໃນການເສີມຂະຫຍາຍການປັບຕົວຕໍ່ໄຟປ່າ, ການປັບປຸງຊີວິດການເປັນຢູ່ຂອງຊຸມຊົນທ້ອງຖິ່ນ ແລະ ການເຊື່ອມໂຍງຕະຫລາດ ເຂດປ່າປ້ອງກັນພູບາຈຽງ ໃນນະຄອນປາກເຊ ແລະ ເມືອງບາຈຽງຈະເລີນສຸກ ແຂວງຈໍາປາສັກ ໂດຍມີຜະລິດຕະພັນຫັດຖະກຳ ຈາກສີມືຄົນລາວທີ່ຫລາກຫລາຍ ມີທັງແບບພື້ນເມືອງ ແລະແບບປະຍຸກຈາກທຸກໆເມືອງຂອງແຂວງຈຳປາສັກ ມາວາງສະແດງ ແລະ ຊື້-ຂາຍ ເຊັ່ນ: ຜ້າໄໝ-ຜ້າຝ້າຍພື້ນເມືອງ, ເຄື່ອງ ຈັກສານ, ໄມ້ແກະສະຫລັກ, ສະໝຸນໄພເພື່ອສຸຂະພາບ ແລະ ອື່ນໆ.

ພ້ອມນີ້, ຍັງມີການສະແດງສິລະປະດົນຕີ ແລະ ຟ້ອນພື້ນເມືອງລາວ ເອກະລັກຂອງແຂວງຈຳປາສັກ ແລະ ມີກິດຈະກຳຖາມ-ຕອບແຈກລາງວັນ, ມີຫົວຂໍ້ສົນທະນາແລກປ່ຽນກ່ຽວກັບການສົ່ງເສີມຜະລິດຕະພັນຂອງຊຸມຊົນ, ທຸລະກິດຂະໜາດນ້ອຍ-ຂະໜາດກາງ, ຊ່ອງທາງການເຂົ້າເຖິງແຫລ່ງທຶນ ໃຫ້ແກ່ຜູ້ປະກອບການຂາດນ້ອຍ-ຂະໜາດກາງ, ການສົ່ງເສີມຜະລິດ ຕະພັນຂອງຊຸມຊົນ ແລະ ອື່ນໆ.

ການຈັດງານຄັ້ງນີ້, ຖືເປັນການເປີດໂອກາດ ໃຫ້ຜູ້ຜະລິດສິນຄ້າຈາກເຄື່ອງປ່າຂອງດົງຂັ້ນຊຸມຊົນ ແລະ ຜູ້ຊື້-ຂາຍຈາກພາກເອກະຊົນ ໄດ້ເຕົ້າໂຮມແລກປ່ຽນຄວາມຮູ້, ພັດທະນາຍຸດທະສາດການຕະຫລາດຮ່ວມກັນ ແລະ ການເຊື່ອມໂຍມສ້າງເຄື່ອຂ່າຍທາງດ້ານຕະຫລາດແບບຍືນຍົງ ເພື່ອເປັນບ່ອນໃຫ້ຜູ້ຜະລິດສິນຄ້າເຄື່ອງປ່າຂອງດົງ ໄດ້ນໍາສະເໜີຜະລິດຕະພັນສິນຄ້າຂອງຕົນເອງ ໃຫ້ເປັນທີ່ຮູ້ຈັກຫລາຍຂຶ້ນ, ຕອບສະໜອງຜູ້ຊື້ທີ່ມີທ່າແຮງ, ປະເມີນຄວາມຕ້ອງການຂອງຕະຫລາດໃນໄລຍະຍາວ ແລະອື່ນໆ.
ຂ່າວ: ທູນທອງໃຈ

แชร์