ແຂວງຫົວພັນ ຈູດທຳລາຍສີ້ນສ່ວນສັດປ່າ 125 ກິໂລ ທີ່ຍືດໄດ້ຈາກຜູ້ລະເມີດ

ພະແນກກະສິກຳແລະປ່າໄມ້ ແຂວງຫົວພັນ ຈັດພິທີຈູດທຳລາຍສີ້ນສ່ວນສັດປ່າທີ່ຍືດໄດ້ຈາກແມ່ຄ້າຜູ້ທີ່ລະເມີດ ຄ້າ-ຂາຍ ໂດຍບໍ່ໄດ້ຮັບອະນຸຍາດໃນວັນທີ່ 1 ພະຈິກ 2024, ທີ່ສວນກ້າຫ້ວຍແໝ້ນຂອງພະແນກດັ່ງກ່າວໂດຍມີທ່ານ ນາງ ສຸລິລັກ ຄຳວົງສາ ຮອງຫົວໜ້າພະແນກກະສິກຳ ແລະປ່າໄມ້ ແຂວງຫົວພັນ ແລະພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ທ່ານ ບຸນປອນ ພົມວົງໄຊ ຫົວໜ້າ ກອງກວດກາປ່າໄມ້ແຂວງ ໄດ້ລາຍ ງານໃຫ້ຮູ້ວ່າ: ໃນໄລຍະຜ່ານມາ ກອງກວດກາປ່າໄມ້ ໄດ້ລົງກວດກາລາດຕະເວນຕາມຈຸດຕ່າງໆ ທີ່ມີຄວາມສ່ຽງໃນການລັກລອບຊື້-ຂາຍ ສັດປ່າ ທີ່ບໍ່ຖືກຕາມລະບຽບກົດ ໝາຍ ສັດນໍ້າ - ສັດປ່າ ວາງອອກ.

ໃນນີ້ສາມາດກວດພົບເຫັນຜູ້ທີ່ລະເມີດ ຄ້າ-ຂາຍ ແລະ ຍຶດໄດ້ ສິ້ນສ່ວນສັດປ່າປະ ເພດ ຫວງຫ້າມ ໃນບັນຊີ 1 ແລະ 2 ໄດ້ທັງໝົດ 125 ກິໂລ ແລະ ໄດ້ນຳມາທຳລາຍຖີ້ມ ເຊີ່ງໃນນີ້ມີ: ໂຕເໝືອຍ, ເຕົ່າ, ຫ່ວາງລົ້ວ, ເຫງັນອົ້ມ, ຈອນພອນຄໍເຫຼືອງ, ນົກຖົ່ວດຳ, ກະຮອກ, ສິ້ນສ່ວນຟານ, ໄກ່ປ່າ ແລະ ນົກຂວາ, ສ່ວນຜູ້ທີ່ລະເມີດ ໄດ້ນຳໄປສຶກສາອົບຮົມ ແລະ ປັບໃໝ ຕາມລະບຽບການ ເພື່ອເປັນການອະນຸ ລັກສັດນໍ້າ - ສັດປ່າ ບໍ່ໃຫ້ສູນພັນ ແລະ ເປັນການອະນຸລັກຮັກສາທຳມະຊາດໃຫ້ມີຄວາມອຸດົມສົມບຸນ ແລະ ຢືນຍົງ.

ສະນັ້ນເຈົ້າໜ້າທີ່ປ່າໄມ້, ຈື່ງໄດ້ຮຽກຮ້ອງໃຫ້ພໍ່ແມ່ປະຊາຊົນພໍ່ຄ້າຊາວຂາຍ, ບໍ່ໃຫ້ນໍາເອົາສັດປ່າທີ່ຫວງຫ້າມນຳມາຂາຍເປັນສິນຄ້າ ແລະບໍ່ໃຫ້ນຳເອົາອາວຸດຕ່າງໆໄປລ່າສັດປ່າ ຖ້າຫາກເຈົ້າໜ້າທີ່ກວດພົບເຫັນຈະໄດ້ດຳເນີນຄະດີ ແລະປັບໃໝຕາມລະບຽບການ ແລະຮຽກຮ້ອງໃຫ້ທຸກພາກສ່ວນ ຮ່ວມມືກັນອະນຸລັກຮັກສາ ສັດນໍ້າ - ສັດປ່າ, ໃຫ້ຄົງຄວາມອຸດົມສົມບຸນຂອງທຳມະຊາດ
ໄວ້ໃຫ້ມີຄວາມຍືນຍົງຕະຫຼອດໄປ.

ຂ່າວ-ພາບ: ພະແນກກະສິກຳແລະປ່າໄມ້ແຂວງຫົວພັນ

แชร์