ຜົນສໍາເລັດ ກອງປະຊຸມຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI

ກອງປະຊຸມຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ວາລະເປີດກວ້າງ ພາຍຫຼັງທີ່ໄດ້ດໍາເນີນມາແຕ່ວັນທີ 28 ຕຸລາ 2024 ແລະ ອັດລົງໃນຕອນບ່າຍ ຂອງວັນທີ 1 ພະຈິກນີ້ ທີ່ ຫ້ອງວ່າການສູນກາງພັກ ພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ.
.
ກອງປະຊຸມໄດ້ປຶກສາຫາລື, ຕີລາຄາບັນຫາ​ ຢ່າງ​ພາວະວິໄສ, ເລິກເຊິ່ງ, ກົງ​ໄປ​ກົງ​ມາ ​ແລະ​ ມີ​ຄວາມ​ເປັນ​ເອກະ​ພາບ ຮັບຮອງດ້ານຫຼັກການ​ ຕໍ່​ບັນດາຫົວຂໍ້ທີ່​ຍົກ​ຂຶ້ນ ເພື່ອເປັນທິດຊີ້ນຳໃຫ້ພາກສ່ວນກ່ຽວຂ້ອງ ສືບຕໍ່ດຳເນີນການໃນຂັ້ນຕອນຕ່າງໆຕໍ່ໄປ ​ຄື:
1. ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ແຜນງົບປະມານ, ແຜນເງິນຕາ ປະຈໍາປີ 2024 ແລະ ທິດທາງ ປີ 2025 ຕິດພັນກັບການປະຕິບັດ 2 ວາລະແຫ່ງຊາດ.
2. ການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມ ສະຫງົບ ປະຈໍາປີ 2024 ແລະ ທິດທາງ ປີ 2025
3. ການດໍາເນີນກອງປະຊຸມໃຫຍ່ ຂັ້ນຮາກຖານພັກອ້ອມຂ້າງເມືອງ-ນະຄອນ ແລະ ຮາກຖານບ້ານ ແລະ ກະກຽມດຳເນີນກອງປະຊຸມໃຫຍ່ອົງຄະນະພັກເມືອງ-ນະຄອນ ແລະ ຮາກຖານ ອ້ອມ ຂ້າງແຂວງ-ນະຄອນຫຼວງ ແລະ ຮາກຖານພັກອ້ອມຂ້າງກະຊວງ ແລະ ອົງການ.
4. ການປັບປຸງເນື້ອໃນບັນດາເອກະສານສໍາຄັນ ເພື່ອກະກຽມໃຫ້ແກ່ກອງປະຊຸມໃຫຍ່ ຄັ້ງທີ XII ຂອງພັກ.
5. ການປັບປຸງລັດຖະທໍາມະນູນ ສະບັບ ປີ 2015.
.
ຄະນະບໍລິຫານງານສູນກາງພັກ ມີຄວາມເປັນເອກະພາບຕີລາ ຄາວ່າ ປີ 2024 ເປັນປີໜຶ່ງ ທີ່ປະເທດເຮົາ ປະເຊີນກັບສິ່ງທ້າ ທາຍທົດສອບຫຼາຍປະການ ເປັນຕົ້ນແມ່ນຄວາມຫຍຸ້ງຍາກດ້ານເສດຖະກິດ-ການເງິນ, ລາຄາສິນຄ້າ-ຄ່າຄອງຊີບສູງ, ໄພພິບັດທຳມະຊາດ, ປະກົດການຫຍໍ້ທໍ້ໃນສັງຄົມ, ບັນຫາຢາເສບຕິດ ແລະ ອື່ນໆ ໄດ້ສ້າງຄວາມຫຍຸ້ງຍາກ, ກະທົບຕໍ່ການພັດທະນາ ແລະ ການດຳລົງຊີວິດຂອງປະຊາຊົນ, ພະນັກງານ, ລັດຖະກອນ, ທະ ຫານ-ຕຳຫຼວດ, ແຕ່ດ້ວຍຄວາມບຸກບືນສູ້ຊົນຂອງບັນດາອົງການໃນລະບົບການເມືອງ, ຄວາມສາມັກຄີເປັນຈິດໜຶ່ງໃຈດຽວຂອງທົ່ວປວງຊົນລາວ ພາຍໃຕ້ການຊີ້ນຳຂອງສູນກາງພັກ, ຄະນະພັກ, ອົງການປົກຄອງທຸກຂັ້ນ, ພວກເຮົາສາມາດຮັບປະກັນສະຖຽນ ລະພາບທາງການເມືອງຍັງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ການພັດທະນາ ສືບຕໍ່ເປັນຂະ ບວນການຕໍ່ເນື່ອງ.
.
ໃນ 9 ເດືອນ ປີ 2024 ສາມາດບັນລຸການເຕີບໂຕເສດຖະກິດ (GDP) ສູງກວ່າຄາດໝາຍທີ່ກໍານົດໄວ້ໃນແຜນ ຊຶ່ງຄາດຄະເນວ່າໝົດປີ ຈະບັນລຸໄດ້ 4,6%, ການຈັດເກັບລາຍຮັບບັນລຸຕາມແຜນ, ບາງທ້ອງຖິ່ນກໍລື່ນຄາດໝາຍ, ການຜະລິດສິນຄ້າເພີ່ມ ຂຶ້ນ, ການຄຸ້ມຄອງ ແລະ ຈຳກັດການນຳເຂົ້າສິນຄ້າ ໄດ້ປະຕິບັດຢ່າງມີຈຸດສຸມ, ອັດຕາແລກປ່ຽນເງິນຕາຕ່າງປະເທດ ຢູ່ໃນລະດັບທີ່ສາມາດຄວບຄຸມໄດ້ ແລະ ເງິນກີບ ສືບຕໍ່ແຂງຄ່າຂຶ້ນຕໍ່ເນື່ອງ. ເວົ້າລວມມາດຕະການດ້ານເສດຖະກິດ ໄດ້ຮັບການຈັດຕັ້ງປະຕິ ບັດ ເປັນລະບົບ ແລະ ສຳເລັດເປັນສ່ວນໃຫຍ່.
.
ເຖິງຢ່າງໃດກໍຕາມ, ຄະນະບໍລິຫານງານສູນກາງພັກ ຍັງໄດ້ຊີ້ໃຫ້ເຫັນບັນຫາຈຳນວນໜຶ່ງ ທີ່ຕ້ອງສຸມໃສ່ແກ້ໄຂ ເພື່ອສ້າງການຫັນ ປ່ຽນໃໝ່ທີ່ຕັ້ງໜ້າ ແລະ ສ້າງບັນຍາກາດ, ຂະບວນການທີ່ແຂງ ແຮງ, ຟົດຟື້ນ ໃນປີ 2025 ເປັນຕົ້ນແມ່ນການຄຸ້ມຄອງມະຫາພາກຂອງລັດບາງດ້ານ ຍັງເຮັດບໍ່ທັນໄດ້ດີ; ລະບຽບການ, ກົນໄກ, ໂຄງລ່າງພື້ນຖານ, ການຕອບສະໜອງສິ່ງອຳນວຍຄວາມສະດວກໃຫ້ແກ່ການຜະລິດ, ທຸລະກິດ-ບໍລິການ ຍັງມີຫຼາຍດ້ານຕ້ອງໄດ້ມີການປັບປຸງ ແລະ ຍົກລະດັບຂຶ້ນຕື່ມ, ນັບທັງຄວາມຮັບຜິດ ຊອບຂອງພະນັກງານ-ລັດຖະກອນ.
.
ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ປະທານກອງປະຊຸມ ໄດ້ມີຄຳເຫັນເນັ້ນໜັກ ຕໍ່ກອງປະຊຸມດັ່ງນີ້:
ໃນສະພາບທີ່ມີຄວາມຫຍຸ້ງຍາກ ຍິ່ງຕ້ອງເອົາໃຈໃສ່ຊີ້ນຳ-ນໍາພາວຽກງານການເມືອງ-ແນວຄິດ ພາຍໃນຄະນະພັກ, ສະມາຊິກພັກ, ຖັນແຖວພະນັກງານ, ທະຫານ, ຕຳຫຼວດ ແລະ ທົ່ວປວງຊົນ ໃຫ້ມີຄວາມອຸ່ນອ່ຽນທຸ່ນທ່ຽງ, ຮັກສາໄດ້ຄວາມສາມັກຄີພາຍໃນຢ່າງໜັກແໜ້ນ.
.
ເດັດດ່ຽວສູ້​ຊົນ​ຈັດ​ຕັ້ງ​ປະຕິບັດບັນດາ​ຄາດໝາຍ ການ​ພັດທະນາ​ແຕ່​ລະ​ດ້ານ ແຕ່ນີ້ຫາທ້າຍ​ປີ 2024 ​ໃຫ້​ສໍາ​ເລັດ​ຜົນ ເພື່ອສ້າງທ່ວງທ່າໃໝ່ໃຫ້ແກ່​ປີ 2025 ຊຶ່ງ​ເປັນ​ປີ​ມ້ວນທ້າຍ​ ຂອງການປະ ຕິບັດ​ມະຕິກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ​ແລະ ​ແຜນ​ພັດ ທະນາ​ເສດຖະກິດ​-ສັງຄົມ ແຫ່ງຊາດ 5 ປີ ຄັ້ງ​ທີ 9 ເພື່ອກ້າວເຂົ້າສູ່ກອງປະຊຸມໃຫຍ່ ຄັ້ງທີ XII ດ້ວຍ​ຄວາມ​ເຊື່ອ​ໝັ້ນທີ່ໜັກແໜ້ນວຽກບຸລິມະສິດ ຂອງລັດຖະບານ ແມ່ນເລັ່ງໃສ່ແກ້ໄຂບັນຫາເຄັ່ງ ຮ້ອນດ້ານເສດຖະກິດ-ການເງິນ, ໂດຍສະເພາະ ບັນຫາໜີ້ສິນ,​ ເງິນເຟີ້,​ ອັດຕາແລກປ່ຽນ,​ ຄຸ້ມຄອງລາຄາສິນຄ້າ ໃຫ້ຫຼຸດລົງ, ແກ້ໄຂຄ່າຄອງຊີບ, ພວກເຮົາ ຕ້ອງຕັດສິນໃຈບຸກເຂົ້າແກ້ໄຂບັນ ຫາຕົວຈິງ, ບໍ່ອາດປະປ່ອຍໃຫ້ແກ່ຍາວໄປກວ່ານີ້ອີກ.
.
ຂໍໃຫ້ບັນດາສະຫາຍກຳມະການສູນກາງພັກພວກເຮົາ ຍົກສູງຄວາມຮັບຜິດຊອບ ແລະ ຄວາມຕັດສິນໃຈ ​ຊີ້​ນໍາ​ບັນຊາ​ໂດຍ​ກົງ ​ແລະ ​ເດັດຂາດ ໃນການ​ແກ້​ໄຂກົນ​ໄກ-ຂອດ​ຂັ້ນ ທີ່ຍັງຊັກຊ້າ, ຫຍຸ້ງຍາກ, ຍັງມີຊ່ອງວ່າງ, ການປະສານງານ ທີ່ຍັງບໍ່ທັນໂລ່ງ ລ່ຽນ, ກົດ​ໜ່ວງຖ່ວງ​ດຶງການ​ພັດທະນາ, ແກ້ໄຂບັນຫາຄົນ,​ ປັບ ປຸງແກ້ໄຂ ພື້ນຖານໂຄງລ່າງທີ່ເປ່ເພຊຸດໂຊມ, ຮັບປະກັນ​ຄຸ້ມ​ຄອງ​ລາຍ​ຮັບ-ລາຍ​ຈ່າຍ ຕາມທິດຫັນເປັນທັນສະໄໝ, ໂປ່ງໃສ່, ບໍ່ຮົ່ວໄຫຼ; ​ເອົາໃຈໃສ່ນໍາພາ​ຢ່າງ​ແຂງ​ແຮງ ​ແລະ ​ແທດ​ເຖິງ ຕໍ່​ການ​ແກ້​ໄຂ​ຜົນ​ກະທົບ​ຈາກ​ນໍ້າ​ຖ້ວມ, ໂດຍສະເພາະ ຟື້ນຟູ, ປົວແປງພື້ນຖານໂຄງລ່າງ ຖະໜົນຫົນທາງ ໃຫ້ສາມາດທຽວໄປມາໄດ້ສະດວກ; ສ້ອມແປງລະບົບຊົນລະປະທານ, ໃຫ້ການສະໜັບສະໜູນດ້ານປັດໄຈການຜະລິດ, ແນວພັນ, ເຕັກນິກ-ວິຊາການ ໃຫ້ປະຊາຊົນໃຫ້ທັນກັບ​ການ​ຜະລິດ​ລະດູແລ້ງ.​
.
ສຸມໃສ່ແກ້ໄຂບັນຫາສັງຄົມຈຳນວນໜຶ່ງ ທີ່ເປັນບັນຫາເຄັ່ງຮ້ອນ, ເປັນຕົ້ນແມ່ນການແກ້ໄຂຊີວິດວິດການເປັນຢູ່ຂອງປະຊາຊົນ, ພະນັກງານ, ທະຫານຕຳຫຼວດ, ແພດໝໍ, ຄູ-ອາຈານ,​ ພະນັກງານປະຕິວັດອາວຸໂສບໍານານ. ເອົາໃຈໃສ່ຄຸ້ມຄອງແຮງງານພາຍໃນ ແລະ ຕ່າງປະເທດ ຢ່າງລວມສູນ, ຂຶ້ນທະບຽນແຮງງານ, ເລັ່ງສ້າງວຽກເຮັດງານທໍາ ແລະ ສ້າງແຮງງານທີ່ມີສີມືຕາມຄວາມຕ້ອງການຂອງຕະຫຼາດ, ແກ້ໄຂບັນຫາຫຍໍ້ທໍ້ໃນສັງຄົມ ໂດຍສະເພາະບັນຫາ ຢາເສບຕິດ.
.
ນອກຈາກນັ້ນ, ສະຫາຍ ເລຂາທິການໃຫຍ່ ປະທານປະເທດ ຍັງໄດ້ເນັ້ນໜັກໃຫ້ບັນດາສະຫາຍຄະນະບໍລິຫານງານສູນກາງພັກ ເອົາໃຈໃສ່ເພີ່ມທະວີຄວາມຮັບຜິດຊອບ, ສຸມກຳລັງແຮງເຂົ້າໃສ່ການຊີ້ນຳ-ນຳພາ ວຽກງານໃຫ້ແຂງແຮງກວ່າເກົ່າ, ພ້ອມກັນເຊີດຊູຄວາມຮັບຜິດຊອບການເມືອງ ແລະ ຄວາມເປັນເຈົ້າການປະດິດສ້າງ, ເພີ່ມຄວາມຕັດສິນໃຈເຮັດແທ້ທຳຈິງ ແລະ ຄວາມເປັນແບບຢ່າງນຳໜ້າ ໃຫ້ສູງຂຶ້ນຕື່ມ, ນຳເອົາບັນດາຈິດໃຈ ຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍ ໃຫ້ມີ​ໝາກ​ມີ​ຜົນ​​ຕົວຈິງ.
ຂ່າວ: ຫສພ
.
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

แชร์