ຫາລື ກຽມນໍາສະເໜີພຣະທາດໂຜ່ນ-ເຮືອນຫີນ ເປັນມໍລະດົກທ້ອງຖິ່ນ

ກອງປະຊຸມປຶກສາຫາລື ເພື່ອກຽມນໍາສະເໜີເອົາພຣະທາດໂຜ່ນ-ເຮືອນຫີນ ເປັນມໍລະດົກລະດັບທ້ອງຖິ່ນໄດ້ຈັດຂຶ້ນໃນວັນທີ 31 ຕຸລາຜ່ານມາ ທີ່ຫ້ອງປະຊຸມອົງການພຸດທະສາສະໜາສໍາພັນລາວ ເມືອງໄຊພູທອງ ແຂວງສະຫວັນນະເຂດ ໂດຍມີພະອາຈານ ສອນເພັດ ໂງ່ນລາຊະສິງ ເຈົ້າອະທິການວັດພຣະທາດໂຜ່ນ, ມີທ່ານນາງ ດາວວອນ ໄຊສຸລຽນ ເຈົ້າເມືອງໄຊພູທອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານນາງ ດາວວອນ ໄຊສຸລຽນ ກ່າວວ່າ: ກອງປະຊຸມຄັ້ງນີ້ໄດ້ທົບທວນຄືນຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 2914/ຈຂ, ລົງວັນທີ 9 ສິງຫາ 2024 ວ່າດ້ວຍການແຕ່ງຕັ້ງຄະນະກໍາມະການເກັບກໍາຂໍ້ມູນ ເພື່ອຮັບຮອງເອົາພຣະທາດໂຜ່ນ ແລະ ຜາສາດເຮືອນຫີນ ພ້ອມດ້ວຍບໍລິເວນເປັນມໍຣະດົກລະດັບທ້ອງຖິ່ນ ເພື່ອສຶກສາລາຍລະອຽດດ້ານວິຊາການ ໂດຍສະເພາະປຶກສາຫາລືການຄຸ້ມຄອງວັດທະນະທໍາພຣະທາດໂຜ່ນ-ເຮືອນຫີນທີ່ເປັນຍຸດທະສາດສໍາຄັນ ເພື່ອການຄົ້ນຄວ້າຮຽນຮູ້ ແລະ ການທ່ອງທ່ຽວພາຍໃນແຂວງ ເວົ້າລວມ, ເວົ້າສະເພາະ ກໍຄືເມືອງໄຊພູທອງໃນການປົກປັກຮັກສາພຣະທາດໂຜ່ນ ແລະ ເຮືອນຫີນ ເພື່ອນໍາສະເໜີຂັ້ນເທິງ.

ກອງປະຊຸມໄດ້ປະກອບຄໍາເຫັນຕໍ່ກັບບັນດາໜ້າວຽກຕ່າງໆ ເພື່ອເຮັດໃຫ້ບັນດາຂໍ້ມູນຖືກຕ້ອງຄົບຖ້ວນ ທາງດ້ານງົບປະມານໃນການເກັບກໍາຂໍ້ມູນອ້າງອີງຈາກຕໍານານ ແລະ ປະຫວັດສາດ, ຮີດຄອງປະເພນີທີ່ປະຕິບັດກັນມາແຕ່ລະປີ ແລະ ການກໍານົດຂອບເຂດດິນ ແລະ ຂອບເຂດອະນຸລັກ (ປັດຈຸບັນ ແລະ ອະນາຄົດ, ສໍາຫຼວດ ແລະ ກໍານົດຂອບເຂດພື້ນທີ່ຄຸ້ມຄອງ (ເຂດອະນຸລັກ, ເຂດອ້ອມຮອບ, ເຂດກັນຊົນ ແລະ ເຂດພັດທະນາ) ແຕ້ມແຜນທີ່ຂອບເຂດພື້ນທີ່ທັງໝົດຂອງພຣະທາດໂຜ່ນ-ເຮືອນຫີນ ແລະ ຄິດໄລ່ເນື້ອທີ່ທັງໝົດ, ກໍານົດຂອບເຂດອະນຸ ລັກຂອງປູສະນີຍະສະຖານ ແລະ ສິ່ງກໍ່ສ້າງພາຍໃນບໍລິເວນ, ແຕ້ມແບບຊັດສ່ວນຂອງອົງພຣະທາດ, ເຕັກນິກຂອງການປະກອບສ້າງ (ກໍາມະວິທີການກໍ່ສ້າງ, ວັດຖຸທີ່ນໍາໃຊ້ ແລະ ຂັ້ນຕອນຂອງການບູລະນະປະຕິສັງຂອນ.
ຂ່າວ: ສະຫວັນນະເຂດ

แชร์