ລາວ-ຈີນ ຮ່ວມກັນສ້າງຕົວແບບທັກສະສີມືແຮງງານລາວ
ວັນທີ 31 ຕຸລານີ້, ສະຫະພັນກຳມະບານນະຄອນຫຼວງວຽງ ຈັນ ຮ່ວມກັບ ສະຫະພັນກຳມະບານແຂວງຢຸນນານ ແລະສະພາການຄ້າ ແຂວງຢຸນນານ, ສປຈີນ ໄດ້ເປີດໂຄງການສ້າງຕົວແບບ ແລະ ການສ້າງຄວາມເຂັ້ມແຂງທາງດ້ານທັກສະສີມືແຮງງານພາຍໃຕ້ໂຄງການຮ່ວມສ້າງ “ໜຶ່ງແລວໜຶ່ງເສັ້ນທາງ” ເຊິ່ງຈັດຂຶ້ນທີ່ເຂດພັດທະນາກວມລວມໄຊເສດຖາ. ຝ່າຍລາວ ໃຫ້ກຽດເຂົ້າຮ່ວມໂດຍ ທ່ານ ວິໄລ ວົງຂະເສີມ ຮອງປະທານສູນກາງສະຫະ ພັນກຳມະບານລາວ ແລະ ຝ່າຍຈີນ ເຂົ້າຮວ່ມໂດຍທ່ານ ຫວາງ ຫົງ ຮອງປະທານສະຫະພັນກຳມະບານແຂວງຢຸນນານພ້ອມດວ້ຍທ່ານ ຫານເຢ້ ທີ່ປຶກສາວຽກງານເສດຖະກິດ-ການຄ້າສະຖານທູດຈີນປະຈໍາລາວ.
ທ່ານ ດາວເພັດ ອາລຸນ ຮອງສະຫະພັນກຳມະບານນະຄອນ ຫຼວງວຽງຈັນ ໄດ້ກ່າວວ່າ: ການຈັດກິດຈະກຳໃນຄັ້ງນີ້ເປັນການກະ ຕຸກຊຸກຍູ້ການຮຽນຮູ້ຂອງສະມາຊິກກຳມະບານ ແລະຜູ້ອອກແຮງງານຂອງສອງຊາດລາວ-ຈີນ, ແນໃສ່ຍົກສູງລະດັບວິຊາສະເພາະໃນການພັດທະນາເສດຖະກິດ ແລະນະວັດຕະກຳໃໝ່.
ທ່ານ ຫວາງຫົງ ໄດ້ກ່າວວ່າ: ຜ່ານໂຄງການຕົວແບບນີ້ພວກເຮົາຈະໄດ້ຮ່ວມກັນສ້າງບຸກຄະລາກອນວິຊາຊີບທີ່ຊຳນານງານຂອງສອງຊາດໄດ້ຫຼາຍຂຶ້ນ, ທັງເປັນການຮັບປະກັນການສະໜອງແຮງ ງານທີ່ຍືນຍົງໃຫ້ແກ່ຫົວໜ່ວຍທຸລະກິດເພື່ອປະກອບສ່ວນເຂົ້າໃນແຜນຍຸດທະສາດ “ໜຶ່ງແລວໜຶ່ງເສັ້ນທາງ” ໃນການຮ່ວມມືພັດ ທະນາຊັບພະຍາກອນມະນຸດຂອງລາວ-ຈີນ, ໂດຍສະເພາະແມ່ນວຽກງານການຍົກລະດັບວິຊາສະເພາະໃຫ້ແກ່ກຳລັງແຮງງານ.
ໃນມື້ເປີດງານຍັງໄດ້ມີການແຂ່ງຂັນທັກສະດ້ານການຊ່າງເຊື່ອມຈອດ ແລະການຊ່າງກໍ່ສ້າງໂບກປູນ ແລະການຊ່າງອື່ນໆ ຢູ່ທີ່ໂຮງງານຂອງເຂດພັດທະນາກວມລວມໄຊເສດຖາ.
ຂ່າວ: CMG FM93
