9 ເດືອນ ສາລະວັນ ເກັບລາຍຮັບໄດ້ 187 ຕື້ກວ່າກີບ

ຕາມການລາຍງານຈາກ ທ່ານ ພອນປະເສີດ ລາຊາໂພ ຫົວໜ້າພະແນກການເງິນແຂວງສາລະວັນ ໃນກອງປະຊຸມອົງການປົກຄອງແຂວງ ເມື່ອບໍ່ດົນນີ້ວ່າ: ມາຮອດປັດຈຸບັນ, ແຂວງສາລະວັນ ສາມາດເກັບລາຍຮັບເຂົ້າງົບປະມານໄດ້ທັງໝົດ 187 ຕື້ກວ່າກີບ ເທົ່າກັບ 119,84%, ລື່ນແຜນການ 19.84%. ໃນນັ້ນ, ພູດສູນກາງ ປະຕິບັດໄດ້ 68 ຕື້ກວ່າກີບ, ພູດລາຍຮັບຂອງແຂວງປະຕິບັດໄດ້ 118 ຕື້ກວ່າກີບ ໂດຍໄດ້ຮັບຈາກສ່ວຍສາອາກອນ ປະຕິໄດ້ 101 ຕື້ກວ່າກີບ, ຄຸ້ມຄອງຊັບສິນແຫ່ງລັດ 17 ຕື້ກວ່າກີບ ແລະ ຄຸ້ມຄອງວິສາຫະກິດ ປະຕິບັດໄດ້ 147 ລ້ານກວ່າກີບ.

ສຳລັບ ລາຍຮັບຂອງບັນດາ 8 ຕົວເມືອງໄດ້ທັງໝົດ 41 ຕື້ກວ່າກີບ ເທົ່າກັບ 119.66%, ໃນນັ້ນເມືອງທີ່ສາມາດຈັດເກັບລາຍຮັບໄດ້ຫລາຍກວ່າໝູ່ແມ່ນ ເມືອງເລົ່າງາມ ປະຕິບັດໄດ້ 8 ຕື້ກວ່າກີບ, ເມືອງສາລະວັນ ປະຕິບັດໄດ້ເກືອບ 8 ຕື້ກີບ, ເມືອງຄົງເຊໂດນ 5 ຕື້ກວ່າກີບ, ເມືອງລະຄອນເພັງ 4 ຕື້ກວ່າກີບ ແລະ ເມືອງອື່ນໆຕາມດຳລັບ. ສ່ວນການຄຸ້ມຄອງດ້ານລາຍຈ່າຍ ປະຕິບັດໄດ້ 400 ຕື້ກວ່າກີບ ເປັນຕົ້ນ ເງິນເດືອນ ແລະ ເງິນອຸດໜູນ, ເງິນນະໂຍບາຍຕ່າງໆ, ເງິນບໍລິຫານ, ດັດສົມສົ່ງເສີມ, ເງິນແຮ, ເງິນຊື້ຊັບສົມບັດຄົງທີ່ ແລະ ລາຍຈ່າຍໃນການລົງທຶນ. ທົ່ວແຂວງສາລະວັນ ມີຫົວໜ່ວຍວິສາຫະກິດເຄື່ອນໄຫວຕົວຈິງ 3.515 ຫົວໜ່ວຍ, ຂັ້ນແຂວງຄຸ້ມຄອງ 440 ຫົວໜ່ວຍ ແລະ ຂັ້ນເມືອງຄຸ້ມຄອງ 3.075 ຫົວໜ່ວຍ, ໄດ້ຮັບແຈ້ງມອບຢູ່ໃນລະບົບ TaxRis ມີ 20.395 ໃບແຈ້ງ, ເປັນເງິນທັງໝົດ 118,69 ຕື້ກີບ.

ທ່ານ ພອນປະເສີດ ລາຊາໂພ ຍັງໃຫ້ຮູ້ອີກວ່າ: ນອກຈາກການຈັດເກັບລາຍຮັບເຂົ້າງົບປະ ມານແລ້ວ, ຍັງໄດ້ເພີ່ມທະວີເອົາໃຈໃສ່ໃນການຕິດຕາມ, ກວດກາການປະຕິບັດດ້ານລາຍຈ່າຍງົບປະ ມານແຫ່ງລັດ ໂດຍສະເພາະນໍາໃຊ້ເຄື່ອງມືທີ່ທັນສະໄໝ ເຮັດໃຫ້ມີປະສິດທິຜົນສູງ ເປັນຕົ້ນ ການເຊື່ອມຕໍ່ຖານຂໍ້ມູນທີ່ຈຳເປັນ, ການນຳໃຊ້ລະບົບທັນສະໄໝເຂົ້າໃນການຕິດຕາມ, ກວດກາການເບີກຈ່າຍງົບປະມານຕ້ານການຮົ່ວໄຫລໄດ້ເປັນຢ່າງດີ ເຊັ່ນ: ນຳໃຊ້ລະບົບ Taxris ຄຸ້ມຄອງຂໍ້ມູນຂ່າວສານ, ລະບົບການສະຫລຸບສັງລວມ STR ໃນວຽກງານສ່ວຍສາອາກອນ, ນໍາໃຊ້ລະບົບແຈ້ງພາສີປະຕູດຽວ ASYCUDA, ລະບົບຄຸ້ມຄອງພາຫະນະນໍາເຂົ້າທ່ອງທ່ຽວຢ້ຽມຢາມ ແລະ ບັນ ທຸກສິນຄ້າ (ບ53) ໃນວຽກງານພາສີ ແລະ ນຳໃຊ້ລະບົບ RTIS ແລະ ລະບົບ GFIS.
ຂ່າວ-ພາບ: ວິໄລວອນ ສິດທິໄຊ

แชร์