ພິທີປະກາດການຈັດຕັ້ງ ພະນັກງານນໍາພາ-ຄຸ້ມຄອງພາສີປະຈໍາແຂວງຄໍາມ່ວນ

ວັນທີ 30 ຕຸລາ 2024 ທີ່ພະແນກການເງິນ ແຂວງຄໍາມ່ວນ ໄດ້ຈັດພິທີປະກາດການຈັດຕັ້ງພະນັກງນນໍາພາ-ຄຸ້ມຄອງ ພາສີປະຈໍາແຂວງຄໍາມ່ວນ ໂດຍການເຂົ້າຮ່ວມໃນພິທີຂອງທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນ, ທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານກະຊວງການເງິນ, ທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີກະຊວງການເງິນ, ມີຫົວໜ້າພະແນກ, ຮອງພະແນກການອ້ອມຂ້າງແຂວງ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ພູວັນ ໄຊຍະວົງ ຫົວໜ້າພະແນກຄຸ້ມຄອງພະນັກງານ ກົມຈັດຕັ້ງ ແລະພະນັກງານກະຊວງການເງິນ ໄດ້ເປັນກຽດຜ່ານຂໍ້ຕົກລົງ ຂອງກະຊວງການເງິນ ສະບັບເລກທີ 2843/ກງ ແລະ ຂໍ້ຕົກລົງ ສະບັບເລກທີ 2844/ກງ ລົງວັນທີ 28 ຕຸລາ 2024, ຕົກລົງຍົກຍ້າຍ ແລະແຕ່ງຕັ້ງທ່ານ ພູເມືອງ ແກ້ວຈັນທະລາ ຫົວໜ້າພະສີປະຈໍາ ແຂວງຄໍາມ່ວນ ໄປຮັບໜ້າທີ່ໃໝ່ຢູ່ຕ່າງແຂວງ, ແຕ່ງຕັ້ງທ່ານ ວິລະປະຊາ ຫຼວງອາມາດ ຮອງຫົວໜ້າພາສີ ປະຈໍາແຂວງຄໍາມ່ວນເປັນຫົວໜ້າພາສີປະຈໍາ ແຂວງຄໍາມ່ວນ ແລະ ໃຫ້ປະຕິບັດເງິນອຸດໜູນຕໍາແໜ່ງບໍລິຫານປະເພດ 4 ຕາມດໍາລັດຂອງນາຍົກລັດຖະມົນຕີ ສະບັບ ເລກທີ 203/ລບ, ລົງວັນທີ 4 ກໍລະກົດ 2017 ນັບແຕ່ງວດ I ປີ 2025 ເປັນຕົ້ນໄປ. ເປັນກຽດມອບຂໍ້ຕົກລົງໃຫ້ບັນດາທ່ານທີ່ໄດ້ຮັບການແຕ່ງຕັ້ງໃນຄັ້ງນີ້ໂດຍທ່ານ ທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະພະນັກງານກະຊວງການເງິນ.

ໃນໂອກາດດຽວກັນນັ້ນ ທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນຍັງໄດ້ມີຄໍາເຫັນໂອ້ລົມ ແລະໃຫ້ທິດຊີ້ນໍາກ່ອນອຶ່ນທ່ານໄດ້ສະແດງຄວາມຊົມ ຕໍ່ຜົນງານການເຄື່ອນໄຫວຂອງວຽກງານພາສີປະຈໍາແຂວງໃນໄລຍະຜ່ານມາເຊິ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ ໂດຍສະເພາະກໍ່ຄືແຂວງຄໍາມ່ວນ, ພ້ອມທັງຮຽກຮ້ອງມາບັນດາທ່ານທີ່ໄດຮັບການແຕ່ງຕັ້ງມອບໝາຍໜ້າທີ່ ຈົ່ງໄດ້ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ຍົກສູງຄວາມສາມັກຄີພາຍໃນໝູ່ຄະນະໃຫ້ໜັກແໜ້ນ, ມີຄວາມເປັນເອກະພາບກັນສູງ ທາງດ້ານການເມືອງ, ແນວຄິດ ແລະ ການຈັດຕັ້ງ, ເສີມຂະຫຍາຍປະຊາທິປະໄຕພາຍໃນພັກໃຫ້ເລິກເຊິ່ງເຖິງຖອງ ແລະນໍາພາດ້ານວຽກງານວິຊາສະເພາະໃຫ້ໄດ້ຮັບການເຄື່ອນໄຫວຢ່າງຕໍ່ເນື່ອງບົນພື້ນຖານປະຕິບັດຕາມພາລະບົດບາດ, ໜ້າທີ່ ແລະລະບຽບກົດໝາຍວາງອອກ, ໂດຍຕິດພັນກັບການປະຕິບັດຂະບວນການແຂ່ງຂັນຮັກຊາດ ແລະພັດທະນາໃຫ້ໄດ້ຮັບຜົນສໍາເລັດທີ່ດີ.

ຂ່າວ-ພາບ : ແດງສະຫວັດ ແສນພານິດ .

แชร์