ວັນທີ 29 ຕຸລາ 2024, ຂະແໜງຊັບສິນທາງປັນຍາມາດຕະຖານ ແລະວັດແທກພະແນກອຸດສາຫະກໍາ ແລະການຄ້າແຂວງຈຳປາສັກ ໄດ້ເປີດກອງປະຊຸມຮ່ວມກັບ ບໍລິສັດ ບໍລິການ - ການຄ້າປາກເຊ ຈໍາກັດ (ຕະຫຼາດໃໝ່ປ່ກເຊ) ເພື່ອປຶກສາຫາລືການນໍາໃຊ້ຊິງຊັ່ງ ດີຈີຕ້ອນ. ກອງປະຊຸມຈັດຂຶ້ນຢູ່ຕະຫຼາດໃໝ່ປາກເຊ ໂດຍການເປັນປະທານຂອງ ທ່ານ ອະພິວັດ ສົມບູນຂັນ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ. ມີທ່ານ ຄໍາແຜ່ນ ແພງບົວວັນ ຫົວໜ້າຂະແໜງຊັບສິນທາງປັນຍາ ມາດຕະຖານ ແລະວັດແທກ, ທ່ານ ສົມພອນ ລາດສິນສະຫງວນ ຮອງປະທານບໍລິສັດ ບໍລິການ-ການຄ້າປາກເຊ ຈໍາກັດ (ຕະຫຼາດໃໝ່ປາກເຊ) ພ້ອມດ້ວຍພະແນກນັກງານວິຊາການທີ່ກ່ຽວຂ້ອງທັງສອງຝ່າຍຕະຫຼອດຮອດຕາງໜ້າຜູ້ປະກອບການ ແລະຊາວຄ້າຂາຍຈໍານວນໜຶ່ງເຂົ້າຮ່ວມ.
ໂອກາດກ່າວເປີດກອງປະຊຸມ, ທ່ານ ອະພິວັດ ສົມບູນຂັນ ຮອງຫົວໜ້າພະແນກອຸດສາຫະກຳ ແລະການຄ້າແຂວງ ມີຄໍາເຫັນວ່າ: ຜ່ານມາຢູ່ແຂວງຈໍາປາສັກ ເວົ້າລວມ, ເວົ້າສະເພາະແມ່ນຢູ່ນະຄອນປາກເຊໄດ້ມີຫາງສຽງຂອງສັງຄົມຕໍ່ກັບການນໍາໃຊ້ຊິງຊັ່ງເຂົ້າໃນການບໍລິການຊື້-ຂາຍ ຢ່າງຫຼວງຫຼາຍ. ຍ້ອນແນວນັ້ນ, ຄະນະພັກ - ຂັ້ນເທິງ ຈິ່ງຊີ້ນໍາໃຫ້ມີການຫັນປ່ຽນຊິງຊັ່ງຊື້ - ຂາຍ ຈາກຊິງຊັ່ງອານາລ໋ອກ ໃຫ້ປ່ຽນມານໍາໃຊ້ຊິງຊັ່ງດີຈິຕ໋ອນ ເພື່ອຫັນເປັນທັນສະໄໝເທື່ອລະກ້າວທັງເຮັດໃຫ້ການວັດແທກ ດ້ານການຊັ່ງນໍ້າໜັກ ມີຄວາມຖືກຕ້ອງ ຊັດເຈນ, ໂປ່ງໃສ ແລະ ສ້າງຄວາມເຊື່ອໝັ້ນຕໍ່ການບໍລິການ, ເຮັດໃຫ້ບັນຫາທາງສຽງຈາກສັງຄົມຕໍ່ກັບການນໍາໃຊ້ຊິງຊັ່ງເຂົ້າໃນການແລກປ່ຽນຊື້ - ຂາຍ ໃຫ້ໝົດໄປ, ຈຳເປັນຕ້ອງໄດ້ມີການຫັນປ່ຽນເຕັກນິກໃນການຄຸ້ມຄອງ ແລະ ນໍາໃຊ້ຊິງຊັ່ງ, ຈາກຜ່ານມາເຄີຍນໍາໃຊ້ຊິງຊັ່ງອານາລ໋ອກ ໃຫ້ປ່ຽນມານໍາໃຊ້ຊິງຊັ່ງດີຈິຕ້ອນ ໃຫ້ມີຄວາມເປັນເອກະພາບກັນໃນທົ່ວແຂວງຈຳປາສັກ.
ຕໍ່ມາ, ທ່ານ ຄໍາແຜ່ນ ແພງບົວວັນ ຫົວໜ້າຂະແໜງຊັບສິນທາງປັນຍາມາດຕະຖານ ແລະວັດແທກ ກໍໄດ້ລາຍງານກ່ຽວກັບການຫັນປ່ຽນນໍາໃຊ້ຊິງຊັ່ງດີຈິຕ້ອນ ເຊິ່ງໃນໄລຍະຜ່ານມາ ຂະແໜງຊັບສິນທາງປັນຍາ, ມາດຕະຖານ ແລະ ວັດແທກ ໄດ້ເອົາໃຈໃສ່ໃນການຕິດຕາມ, ຄຸ້ມຄອງ, ກ່ຽວກັບການສອບທຽບ, ກວດທຽບ ແລະ ການຂຶ້ນທະບຽນ ຊິງຊັ່ງທີ່ນໍາໃຊ້ເຂົ້າໃນການບໍລິການຊື້ - ຂາຍ ຢ່າງເປັນປົກະຕິ ໂດຍປະສານສົມທົບກັບ ການນໍາ ແລະ ເຈົ້າໜ້າທີ່ບັນດາຕະຫຼາດພາຍໃນນະຄອນຢາກເຊ ແຕ່ໄລຍະປີ 2021 ຫາປະຈຸບັນ ສາມາດກວດທຽບ ແລະ ຂຶ້ນທະບຽນຊິງຊັ່ງ ໄດ້ທັງໝົດ 2.054 ເທື່ອ/ໜ່ວຍ, ກວດຢຶດຊິງຊັ່ງທີ່ມີການດັດແປງສະພາບທີ່ບ່ໍຖືກຕ້ອງຕາມມາດຕະຖານ ຄື ມີການປັບເຂັມ, ດັດແປງໜ້າປັດ ຫຼື ດັດແປງລໍຂໍ ແລະ ອື່ນໆ ຈໍານວນ 15 ເທື່ອ/ໜ່ວຍ. ນອກນັ້ນ, ຍັງໄດ້ລົງຕິດຕາມ, ກວດກາ ຢ່າງເປັນປົກະຕິ ໃນແຕ່ລະເດືອນ. ແຕ່ຜ່ານມາໄດ້ມີທາງສຽງຂອງສັງຄົມຕໍ່ກັບການນໍາໃຊ້ຊິງຊັ່ງເຂົ້າໃນການບໍລິການຊື້-ຂາຍ. ຍ້ອນແນວນັ້ນ,ເພື່ອຫັນເປັນທັນສະໄໝເທື່ອລະກ້າວ ເຮັດໃຫ້ການຊັ່ງຜອງ, ມີຄວາມຖືກຕ້ອງ, ຊັດເຈນ - ໂປ່ງໃສ ແລະ ສ້າງຄວາມເຊື່ອໝັ້ນຕໍ່ການບໍລິການ ທັງແກ້ໄຂບັນຫາຫາງສຽງຈາກສັງຄົມຕໍ່ກັບການໃຊ້ບໍລິການຊື້ - ຂາຍ ໃຫ້ຫຼຸດນ້ອຍຖອຍລົງເທື່ອລະກ້າວ ຈຳເປັນຕ້ອງໄດ້ມີການຫັນປ່ຽນເຕັກນິກໃນການຄຸ້ມຄອງ ແລະ ນໍາໃຊ້ຊິງຊັ່ງເຂົ້າໃນການຊື້ - ຂາຍ ເປັນຕົ້ນແມ່ນຊິງຊັ່ງຊື້ - ຂາຍປະເພດ ຊີ້ນ, ປາ, ຜັກ ແລະ ເຂົ້າສານ.
ຈາກນັ້ນ, ກໍໄດ້ສະເໜີຜົນໄດ້ - ຜົນເສຍ, ຂໍ້ສະດວກ ແລະ ຂໍ້ຫຍຸ້ງຍາກ ລະຫວ່າງ ການນໍາໃຊ້ຊິງຊັ່ງດີຈີຕ້ອນ ແລະຊິງຊັ່ງອານາລ໋ອກ, ຜົນດີໃນການນໍາໃຊ້ຊິງຊັ່ງດີຈີຕ້ອນ ຈະຊ່ວຍສ້າງຄວາມໝັ້ນໃຈໃຫ້ແກ່ລູກຄ້າ ໃນເວລາຊື້ສິນຄ້າຕ່າງໆ ເພາະວ່າຊິງຊັ່ງດີຈີຕ້ອນ ເວລາຕິດຊັ່ງ ຈະແຈ້ງລະອຽດທັງດ້ານຈໍານວນຕາຊັ່ງ ແລະ ລາຄາ. ພ້ອມທັງມີການປຶກສາຫາລື ຄວາມເປັນໄປໄດ້ ແລະ ຄວາມພ້ອມໃນການຈັດຕັ້ງປະຕິບັດວຽກງານດັ່ງກ່າວ ໂດຍຖືເອົາຕະຫຼາດໃໝ່ປາກເຊ ເປັນຕົວແບບໃນການນໍາໃຊ້ຊິງຊັ່ງດີຈີຕ້ອນ, ຕໍ່ໄປ ຈິ່ງຈະໄດ້ຂະຫຍາຍການຊົມໃຊ້ໄປສູ່ຕະຫຼາດອື່ນໆ ພາຍໃນນະຄອນປາກເຊ ແລະ 9 ເມືອງ. ພ້ອມນີ້ກໍຮຽກຮ້ອງໃຫ້ຄະນະຮັບຜິດຊອບຕະຫຼາດ ສືບຕໍ່ໂຄສະນາການນໍາໃຊ້ຊິງຊັ່ງດີຈີຕ້ອນ ໃຫ້ປະກອບການ ແລະ ຊາວຄ້າຂາຍມີຄວາມຮັບຮູ້ເຂົ້າໃຈ ແລະ ຫັນປ່ຽນ ຈາກເຄີຍນໍາໃຊ້ເປັນຊິງຊັ່ງລະບົບອານາລ໋ອກ (ຊິງຊັ່ງແບບບໍ່ໃຊ້ໄຟຟ້າ) ໃຫ້ປ່ຽນມານໍາໃຊ້ຊິງຊັ່ງ ລະບົບດີຈີຕ້ອນ (ຊິງຊັ່ງແບບໄຟຟ້າ) ເພື່ອໃຫ້ມີຄວາມເປັນເອກະພາບກັນພາຍໃນທົ່ວແຂວງຈໍາປາສັກ ກໍຄືໃນນະຄອນປາກເຊ ໂດຍເລີ່ມຈາກຕະຫຼາດໃໝ່ຍາກເຊ (ຕະຫຼາດດາວເຮືອງ) ເປັນຕົວແບບ, ດັ່ງນັ້ນ, ຄະນະກຳມະການ ແລະ ພາກສ່ວນທີ່ ກ່ຽວຂ້ອງຈຶ່ງຂໍຄວາມຮ່ວມມືນໍາບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ຊື້ - ຂາຍ ໃຫ້ປັບປ່ຽນຊິງຊັ່ງຂອງຕົນ ຕາມການແຈ້ງການ ຂອງພະແນກອຸດສາຫະກຳ ແລະ ການຄ້າ ເລກທີ 1871/ພອກ.ຈສ, ລົງວັນທີ 14 ຕຸລາ 2024. ພາຍຫຼັງສໍາເລັດກອງປະຊຸມ, ຍັງໄດ້ເຄື່ອນໄຫວຕິດຕາມກວດກາການນໍາໃຊ້ຊິງຊັ່ງ ໃນການບໍລິການຊື້ - ຂາຍ ຊີ້ນໝູ, ປາ, ໝາກໄມ້ ແລະເຂົ້າສານ. ພ້ອມນີ້ກໍໄດ້ປຸກລະດົມຊຸກຍູ້ໃຫ້ແມ່ຄ້າພໍ່ຄ້າຈົ່ງນໍາໃຊ້ຊິງຊັ່ງ ໃນການຊື້ - ຂາຍສິນຄ້າຂອງຕົນ ໃຫ້ຖືກຕ້ອງຕາມລະບຽບການທີ່ລັດກໍານົດໃຫ້.
ຂ່າວ-ພາບ: ທູນທອງໃຈ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |