ມີນັກຮຽນຈົບ ມ7 ຈາກເມືອງອາດສະພອນ ໄປຮຽນຕໍ່ຄູເກືອບ 20 ຄົນໃນສົກປີ 2024-2025

ໂດຍປະຕິບັດຕາມແຈ້ງການຂອງທ່ານເຈົ້າແຂວງສະຫວັນນະເຂດ ວ່າດ້ວຍການຮັບເອົານັກຮຽນໄປສຶກສາຕໍ່ທີ່ມະຫາວິທະຍາໄລສະຫວັນນະເຂດ ແລະວິທະຍາໄລຄູສະຫວັນນະເຂດ ສົກປີ 2024-2025 ເຊິ່ງເມືອງອາດສະພອນມີນ້ອງນັກຮຽນທີ່ຮຽນຈົບຊັ້ນ ມ7 ສະໝັກໃຈໄປຮຽນຕໍ່ຄູຈຳນວນ 18 ຄົນ, ຍິງ 12 ຄົນ ຊຶ່ງແຍກຕາມສາຂາວິຊາຮຽນດັ່ງນີ້: ຄູໄອທີ 7ຄົນ, ຄູອະນຸບານ 4 ຄົນ, ຄູພາສາອັງກິດ 1 ຄົນ ແລະຄູພູມສາດ 2 ຄົນ, ໂດຍບັນດານ້ອງນັກຮຽນຈຳນວນດັ່ງກ່າວ ຈະໄດ້ສິດທິພິເສດຄື: ຈະໄດ້ເງິນອູດໜູນອັດຕາເບ້ຍລ້ຽງ 9 ແສນກີບຕໍ່ຄົນຕໍ່ເດືອນ, ຍົກເວັ້ນຄ່າທຳນຽມ, ຄານໍ້າ, ຄ່າໄຟຟ້າ, ຄ່າອະນາໄມ ແລະຄ່າຫໍພັກ.

ເຊິ່ງມາໃນຕອນເຊົ້າວັນທີ 24 ຕຸລາ 2024 ທີ່ສະໂມສອນຫ້ອງການສຶກສາທິການ ແລະກິລາເມືອງອາດສະພອນ ໄດ້ຈັດພິທີຮັບ-ສົ່ງນັກຮຽນທີ່ຈົບຊັ້ນມັດທະຍົມສຶກຊັ້ນ ມ7 ຈຳນວນ 18 ນ້ອງ ເພື່ອໄປຮຽນວິຊາຊີບຄູຢູ່ມະຫາວິທະຍາໄລສະຫວັນນະເຂດ ແລະວິທະຍາໄລຄູສະຫວັນນະເຂດ ປະຈຳສົກປີ 2024-2025 ໂດຍການເຂົ້າຮ່ວມຂອງ ທ່ານ ບຸນລັດ ລໍບານເຢັນ ວ່າການເຈົ້າເມືອງ, ທ່ານ ຖາວອນ ໄຊຍະເຄື່ອງ ຫົວໜ້າຫ້ອງການສຶກສາ-ກິລາເມືອງ ພ້ອມດ້ວຍວິຊາການ ແລະ ພໍ່ແມ່ຜູ້ປົກຄອງເຂົ້າຮ່ວມນຳ.        

ໂອກາດນີ້, ທ່ານ ບຸນລັດ ລໍບານເຢັນ ໄດ້ກ່າວມີຄຳເຫັນວ່າ: ຂໍໃຫ້ລູກຫຼານນັກຮຽນທຸກຄົນຈົ່ງມີຄວາມເຊື່ອໝັ້ນ ແລະມີຫ້າວຫັນຕັ້ງໃຈຮໍ່າຮຽນເພື່ອຈະໄດ້ມາເຊິ່ງຄວາມຮູ້, ຄວາມສາມາດເພື່ອຈະມາໝູນໃຊ້ໃຫ້ເກີດປະໂຫຍດແກ່ປະເທດຊາດບ້ານເມືອງເຮົາໃນຕໍ່ໜ້າ.

แชร์