ເອກະຊົນ ກຳລັງສຶກສາຄວາມເປັນໄປໄດ້ໂຄງການພັດທະນາພະລັງງານລົມ ຢູ່ເມືອງຕະໂອ້ຍ

ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງສາລະວັນ ສະບັບເລກທີ 1067/ຈຂ.ສວ ວ່າດ້ວຍການອະນຸຍາດໃຫ້ບໍລິສັດ MIND BRIDGE CONSULTING & DEVELOPING PTE LTD ສຶກສາສຳຫຼວດຄວາມເປັນໄປໄດ້ໂຄງການພັດທະນາພະລັງງານດ້ວຍລົມ ທີ່ມີກໍາລັງຕິດຕັ້ງ 5 ເມກາວັດ ຢູ່ເມືອງຕະໂອ້ຍ ແຂວງສາລະວັນ, ບົນພື້ນຖານເຫັນດີເປັນເອກະພາບທັງສອງຝ່າຍ ລະຫວ່າງ ອົງການປົກຄອງແຂວງ ກັບ ບໍລິສັດດັ່ງກ່າວ ຢູ່ເຂດເມືອງຕະໂອ້ຍ, ມີທ່າແຮງ ແລະ ເງື່ອນໄຂໃນພັດທະນາໂຄງການເພື່ອຜົນປະໂຫຍດລວມຂອງປະຊາຊົນ, ເຊິ່ງການພັດທະນາໂຄງການຜະລິດພະລັງງານລົມ ແມ່ນນອນຢູ່ໃນເປົ້າໝາຍການພັດທະນາຂອງແຂວງໃນການຜະລິດ ແລະ ສະໜອງໄຟຟ້າພາຍໃນ.

ພາຍຫຼັງລົງນາມເຊັນບົດບັນທຶກຄວາມເຂົ້າໃຈ (MOU) ແຂວງສາລະວັນ ອະນຸຍາດໃຫ້ບໍລິສັດ ດຳເນີນການສຶກສາ-ສຳຫຼວດເນື້ອທີ່ຕາມຂອບເຂດໂຄງການ, ສຶກສາຄວາມເປັນໄປໄດ້ດ້ານເສດຖະກິດ-ເຕັກນິກ (FS), ສໍາຫຼວດວິເຄາະ, ວິໄຈຂໍ້ມູນ ແລະຕີລາຄາຄວາມອາດສາມາດກ່ຽວກັບເນື້ອທີ່ຂອງໂຄງການແລະປະສິດທິຜົນການລົງທຶນໃນໂຄງການພັດທະນາພະລັງງານລົມເພື່ອສ້າງບົດວິພາກເສດຖະກິດ-ເຕັກນິກ, ສຶກສາການປະເມີນຜົນກະທົບດ້ານສິ່ງແວດລ້ອມ (IEE), ປະເມີນຜົນກະທົບເບື້ອງຕົ້ນຕໍ່ສັງຄົມ.

ພິທີລົງນາມເຊັນບົດບັນທຶກຄວາມເຂົ້າໃຈ (MOU), ໄດ້ຈັດຂຶ້ນໃນວັນທີ 25 ຕຸລານີ້, ຝ່າຍອົງການປົກຄອງແຂວງສາລະວັນ ເຊັນໂດຍ ທ່ານ ໂພສີ ແກ້ວສີພັນດອນ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ໂພທີຍາ ວົງຈອມສີ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ຝ່າຍບໍລິສັດ ລົງນາມໂດຍ: ທ່ານ ເຊີ່ນ ເຕີຊ້າຍ ປະທານບໍລິສັດ MIND BRIDGE CONSULTING & DEVELOPING PTE LTD, ໂດຍຊ້ອງໜ້າຂອງ ທ່ານ ປະເດີມພອນ ສົນທະນີ ຮອງເລຂາພັກແຂວງ ຮອງເຈົ້າແຂວງສາລະວັນ ພ້ອມດ້ວຍຄະນະກໍາມະການຄຸ້ມຄອງການລົງທຶນຂັ້ນແຂວງ, ຮອງເຈົ້າເມືອງຕະໂອ້ຍ, ຂະແໜງການທີ່ກ່ຽວຂ້ອງ ແລະ ຜູ້ຕ່າງໜ້າບໍລິສັດເຂົ້າຮ່ວມເປັນສັກຂີພິຍານ.

ຂ່າວພາບ: ວິໄລວອນ ສິດທິໄຊ

แชร์