ໂຮງງານທໍ່ຄໍາມ່ວນ ຈະເປີດຜະລິດໃນກາງເດືອນພະຈິກ

ທ້າຍອາທິດຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນພ້ອມດ້ວຍພະແນກການກ່ຽວຂ້ອງໄດ້ເຄື່ອນໄຫວກວດກາຄວາມພ້ອມການກໍ່ສ້າງໂຮງງານຜະລິດທໍ່ ຂອງບໍລິສັດຄໍາມ່ວນ ອຸດສາຫະກໍາ ຈໍາກັດ ຢູ່ບ້ານນາແງວ ເມືອງທ່າແຂກ, ເພື່ອກະກຽມເປີດການຜະລິດຢ່າງເປັນທາງການໃນກາງເດືອນພະຈິກນີ້, ໂດຍມີທ່ານ ຊຸຍ ຫວນຟູ ຜູ້ຈັດການບໍລິສັດໃຫ້ການຕ້ອນຮັບ.

ໂຮງງານທໍ່ຄໍາມ່ວນ ໄດ້ເລີ່ມລົງມືກໍ່ສ້າງແຕ່ຕົ້ນເດືອນເມສາ 2024, ຮູບແບບ ແລະ ຂະໜາດຂອງຜະລິດຕະພັນເໝາະແກ່ການນໍາໃຊ້ເຂົ້າໃນວຽກງານປ້ອງກັນອັກຄີໄພ, ບໍລິຫານເທສະບານ, ວຽກງານນໍ້າປະປາ, ການກໍ່ສ້າງອາຄານທີພັກອາໄສ ແລະ ວຽກງານການກະສິກຳເປັນຫຼັກ. ຂະໜາດຂອງຜະລິດຕະພັນປະກອບມີ : ປະເພດທໍ່ PVC ຂະໜາດຕັ້ງແຕ່ 20 mm - 200 mm, ປະເພດທໍ່ PE ຂະໜາດຕັ້ງແຕ່ 20 mm -315 mm, ປະເພດທໍ່ PPR ຂະໜາດຕັ້ງແຕ່ 20 mm -75 mm. ປັດຈຸບັນ, ປະລິມານການຜະລິດ ປະມານ 1,000 ໂຕນ/ເດືອນ, ປະລິມານການຜະລິດຕໍ່ປີແມ່ນຫຼາຍກ່ວາ 10,000 ໂຕນ. ຫຼັງຈາກການຕິດຕັ້ງເຄື່ອງກົນຈັກຜະລິດທໍ່ PE ຂະຫນາດໃຫຍ່ສຳເລັດ, ກໍາລັງການຜະລິດຈະເພີ່ມຂຶ້ນຢ່າງຫຼວງຫຼາຍ, ຈະສາມາດສ້າງປະລິມານການຜະລິດຕໍ່ປີຫຼາຍກວ່າ 50,000 ໂຕນ.

ໂອກາດນີ້ທ່ານເຈົ້າແຂວງຄໍາມ່ວນ ຍັງໄດ້ມີຄໍາເຫັນແນະນໍາມາຍັງບໍລິສັດເອົາໃຈໃສ່ສືບຕໍ່ປັບປຸງບັນດາໜ້າວຽກທີ່ຍັງຄ້າງ, ໂດຍສະເພາະການກໍ່ສ້າງພື້ນຖານໂຄງລ່າງ, ການຕົບແຕ່ງປະດັບປະດາ ແລະປັບໜ້າດິນຢູ່ໃນຂອບເຂດບໍລິເວນໂຮງງານໃຫ້ສໍາເລັດ, ປັບປຸງຜະລິດຕະພັນເພີ່ມຕື່ມໃຫ້ມີຄວາມຫຼາກຫຼາຍເພື່ອເປັນທ່າແຮງອັນແຂງແກ່ນໃຫ້ກັບການຈຳໜ່າຍ ແລະຕອບສະໜອງໄດ້ຕາມຄວາມຕ້ອງການຂອງຜູ້ຊົມໃຊ້.
ຂ່າວ: ມະນີວັນ

แชร์