ເຈົ້າແຂວງສະຫວັນນະເຂດພົບປະໂອ້ລົມປະຊາຊົນບ້ານລູສະເລຍ-ບ້ານຕະປ໋ອງ ພ້ອມສະໜອງສັດລ້ຽງ, ໄຟແສງຕາເວັນ ແລະສ້າງລະບົບນໍ້າສະອາດ

ໃນວັນທີ 24 ຕຸລາ 2024 ນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ພ້ອມດ້ວຍຄະນະນຳຂອງແຂວງໄດ້ລົງເຄື່ອນໄຫວຊຸກຍູ້ພົບປະໂອ້ລົມປະຊາຊົນບ້ານລູສະເລຍ ແລະບ້ານຕະປ໋ອງ ທີ່ຂຶ້ນກັບຈຸດສຸມຈຽງຕູບ ເມືອງເຊໂປນ ແຂວງສະຫວັນນະເຂດ; ສະພາບລວມ, ທີ່ຕັ້ງ, ຈຸດພິເສດ, ທ່າແຮງຂອງບ້ານລູສະເລຍ, ມີພົນລະເມືອງທັງໝົດ 170 ຄົນ, ຍິງ 81 ຄົນ, ມີ 27 ຫຼັງຄາເຮືອນ, 28 ຄອບຄົວ. ໃນນັ້ນ, ມີຄອບຄົວອານາຖາ 5 ຄອບຄົວ,ທິດເໜືອຕິດກັບແຂວງກວາງບິ່ງ ສສ ຫວຽດນາມ, ທິດໃຕ້ຕິດກັບບ້ານສົບສະລູ, ທິດຕາເວັນອອກຕິດກັບບ້ານຕະປ໋ອງ, ທິດຕາເວັນຕົກຕິດກັບບ້ານລະເວີນ.

ໃນໂອກາດນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ໄດ້ຖາມເຖິງຄວາມຮຽກຮ້ອງຕ້ອງ ການຂອງປະຊາຊົນ, ເພື່ອສ້າງເສດຖະກິດຄອບຄົວໃຫ້ມີລາຍໄດ້, ເພື່ອໃຫ້ທາງຄະນະນຳຂອງແຂວງໄດ້ຊຸກຍູ້ສົ່ງເສີມໃຫ້ຄອບຄົວປະຊາຊົນມີລາຍຮັບ. ໃນນີ້, ປະຊາຊົນສ່ວນໃຫຍ່ມີຄວາມຕ້ອງໃຫ້ທາງຄະນະນໍາຂອງແຂວງ, ທ່ານເຈົ້າ ແຂວງສະໜອງສັດລ້ຽງ (ແບ້ ຫຼື ງົວ) ເພາະເງື່ອນໄຂການລ້ຽງງົວ ແລະແບ້ຢູ່ເຂດນີ້ແມ່ນເໝາະສົມຫຼາຍ, ເຊິ່ງທ່ານເຈົ້າກໍ່ເຫັນດີສະໜອງຕາມເງື່ອນໄຂທີ່ປະຊາຊົນຮຽກຮ້ອງ, ພ້ອມນັ້ນທາງແຂວງມີແຜນຈະຕິດຕັ້ງໄຟແສງຕາເວັນໃຫ້ປະຊາຊົນ ແລະຈະສ້າງລະບົບນໍ້າສະອາດ,ສ້າງວິດຖ່າຍ ແລະຈະສົ່ງເສີມທາງດ້ານການຮຽນ-ການສອນພາຍໃນໂຮງຮຽນພາຍໃນບ້ານໃຫ້ດີຂຶ້ນ.

ຈາກນັ້ນ,ທ່ານເຈົ້າແຂວງພ້ອມຄະນະໄດ້ລົງພົບປະຢ້ຽມຢາມອຳນາດການປົກຄອງ ແລະພໍ່ແມ່ປະຊາຊົນບ້ານຕະປ໋ອງຂຶ້ນກັບຈຸດສຸມຈຽງຕູບ ເມືອງເຊໂປນ ແຂວງສະຫວັນນະເຂດ, ເຊິ່ງບ້ານຕະປ໋ອງມີພົນລະເມືອງ 233 ຄົນ, ຍິງ 113 ຄົນ,ມີ 54 ຫຼັງເຮືອນ, ມີ 58 ຄອບຄົວ, ເປັນຊົນເຜົ່າຕຼີ 100%, ທີ່ຕັ້ງພູມສັນຖານທິດເໜືອຕິດກັບເມືອງເລທຸຍ ສສ ຫວຽດນາມ, ທິດໃຕ້ຕິດກັບບ້ານກ໋ອກ, ທິດຕາເວັນອອກຕິດກັບບ້ານຕະປ໋ອງ ສສ ຫວຽດນາມ ແລະ ທິດຕາເວັນຕົກຕິດກັບບ້ານລູສະເລຍ, ບ້ານຕະປ໋ອງມີໂຮງຮຽນປະຖົມ 2 ແຫ່ງ, ມີນັກຮຽນທັງໝົດ 30 ຄົນ, ຍິງ 22 ຄົນ.

ໂອກາດນີ້, ເຈົ້າແຂວງໄດ້ເຖິງບັນຫາຕ່າງໆຢ່າງໃກ້ຊິດກັບປະຊາຊົນ, ພ້ອມຖາມເຖິງຄວາມຮຽກຮ້ອງຕ້ອງການຂອງປະຊາຊົນ, ເຊິ່ງບັນຫາທັງໝົດທາງການນໍາຂອງແຂວງ, ຍິນດີຈະແກ້ໄຂໃຫ້ ແລະ ຈະສະໜອງສັດລ້ຽງໃຫ້ປະຊາຊົນຕາມສະພາບຕົວຈິງຂອງແຕ່ລະຄອບຄົວ. ໂອກາດດຽວກັນ, ທ່ານເຈົ້າແຂວງພ້ອມຄະນະນຳຂອງແຂວງໄດ້ມອບຊຸດກັນໜາວໃຫ້ປະຊາຊົນຢ່າງທົ່ວເຖິງ, ພ້ອມມອບອຸປະກອນການຮຽນ, ມອບເງິນສົດໃຫ້ນາຍບ້ານເພື່ອເປັນຄັງບ້ານ ແລະມອບຊຸດກັນໜາວໃຫ້ແກ່ປະຊາຊົນພາຍໃນບ້ານຕະປ໋ອງນໍາອີກດ້ວຍ.

แชร์