ເຈົ້າຫນ້າທີ່ ລົງຕິດກວດກາລາຄາຊີ້ນໝູ ຢູ່ຕະຫຼາດໃໝ່ປາກເຊ
ວັນທີ 24 ຕຸລາ 2024, ເຈົ້າໜ້າທີ່ກວດກາການຄ້າ ແຂວງຈຳປາສັກ ນໍາໂດຍທ່ານ ຄໍາແດງ ພົມມາພັກດີ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງຈຳປາສັກ ພ້ອມດ້ວຍ ທ່ານ ທອງສຸກ ກອງແກ້ວ ຫົວໜ້າຂະແໜງການຄ້າພາຍໃນ ແລະ ເຈົ້າໜ້າທີ່ກວດກາການຄ້າທີ່ກ່ຽວຂ້ອງ ໄດ້ເຄື່ອນໄຫວຕິດຕາມເກັບກໍາຂໍ້ມູນລາຄາຊີ້ນໝູ ທີ່ມີການເໜັງຕີງ ຢູ່ຕະຫຼາດໃໝ່ປາກເຊ.
ທ່ານ ທອງສຸກ ກອງແກ້ວ ຫົວໜ້າຂະແໜງການຄ້າພາຍໃນ ກ່າວວ່າ: ຈຸດປະສົງ ກໍເພື່ອເກັບກໍາຂໍ້ມູນລາຄາຊີ້ນໝູ ຢູ່ຕະຫຼາດໃໝ່ປາກເຊ ໃຫ້ເຫັນສະພາບຕົວຈິງດ້ານລາຄາ ທີ່ຜູ້ຄ້າຂາຍໄດ້ວາງຂາຍ; ໂດຍອີງຕາມການຄິດໄລ່ໂຄງສ້າງລາຄາຊີ້ນໝູ ທີ່ໄດ້ປຶກສາຫາລືກັບຜູ້ປະກອບການຜ່ານມາ ພາກລັດອະນຸຍາດໃຫ້ຂາຍຊີ້ນໝູ ປະເພດຊີ້ນສົດ 75 - 80 ພັນກີບ/ກິໂລກຣາມ, ແຕ່ຜູ້ປະກອບການສະເໜີຂໍຂຶ້ນລາຄາໃໝ່ 85 ພັນກີບ/ກິໂລກຣາມ, ຕໍ່ກັບລາຄາຊີ້ນໝູູທີ່ຜູ້ປະກອບການສະເໜີໃໝ່ນີ້ ພາກລັດໄດ້ເປີດກອງປະຊຸມປຶກສາຫາລືກັນ ແລະ ບໍ່ທັນໄດ້ອະນຸມັດຈາກຂັ້ນເທິງ ແຕ່ລາຄາຊີ້ນໝູ ປະເພດຊີ້ນສົດທີ່ຊື້ - ຂາຍ ໃນປັດຈຸບັນ 90 ພັນກີບ/ກິໂລກຣາມ. ຍ້ອນແນວນັ້ນ, ເຈົ້າໜ້າທີ່ກວດກາການຄ້າພວກເຮົາ ຈິ່ງໄດ້ລົງມາເຄື່ອນໄຫວຕິດຕາມເກັບກໍາຂໍ້ມູນການເໜັງຕີງຂອງຊີ້ນໝູ ຢູ່ຕະຫຼາດໃໝ່ປາກເຊ.
ຜ່ານການເຄື່ອນໄຫວເກັບກໍາຂໍ້ມູນຕົວຈິງ, ສາເຫດທີ່ເຮັດລາຄາຊີ້ນໝູມີການເໜັງຕີງ ແມ່ນຍ້ອນຜູ້ປະກອບການລາຍໃຫຍ່ ຂຶ້ນລາຄາ ຈິ່ງເຮັດໃຫ້ ລາຄາຊີ້ນໝູ ຂັ້ນລູກຂຽງ ແລະ ຜູ້ຂາຍຍ່ອຍ ຂຶ້ນລາຄາ. ພາຍຫຼັງທີ່ເກັບກໍາຂໍ້ມູນຄັ້ງນີ້ແລ້ວ ພວກເຮົາຈະໄດ້ລາຍງານຕໍ່ຂັ້ນເທິງ ແລະ ເຊີນຜູ້ປະກອບການລາຍໃຫຍ່ ມາປະຊຸມຮ່ວມກັນ ເພືາອປຶກສາຫາລື ແລະ ຊອກວິທີແກ້ໄຂທີ່ເໝາະສົມ ຕ່າງຝ່າຍຕ່າງມີຜົນປະໂຫຍດຮ່ວມກັນ ທັງເປັນການປົກປ້ອງຜູ້ຊົມໃຊ້ຕື່ມອີກ.
ຈາກນັ້ນ, ຍັງໄດ້ເຄື່ອນໄຫວຕິດຕາມເບິ່ງບັນຍາກາດການຊື້ - ຂາຍສິນຄ້າທີ່ນໍາເຂົ້າ ແລະ ການຊື້ - ຂາຍພືດຜັກຕ່າງໆທີ່ຜະລິດໄດ້ພາຍໃນ. ພ້ອມນີ້ກໍໄດ້ປຸກລະດົມຊຸກຍູ້ໃຫ້ແມ່ຄ້າ ພໍ່ຄ້າ ຈົ່ງຂາຍສິນຄ້າຂອງຕົນໃຫ້ຖືກຕ້ອງຕາມລາຄາທີ່ລັດກໍານົດໃຫ້.
ຂ່າວ-ພາບ: ທູນທອງໃຈ
