ມອບ-ຮັບ ແລະ ເປີດນໍາໃຊ້ໂຄງການຢ້ຽມຢາມນັກໂທດແບບທັນສະໄໝ

ພິທີມອບ-ຮັບ ແລະເປີດນໍາໃຊ້ໂຄງການຢ້ຽມຢາມນັກໂທດແບບທັນສະໄໝ ຈັດຂຶ້ນໃນວັນທີ 26 ມັງກອນ 2024 ໃຫ້ກຽດເຂົ້າຮ່ວມຂອງ ພົທ ກົງທອງ ວົງວິຈິດ ຮອງລັດຖະມົນຕີ ກະຊວງ ປກສ, ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງ ປກສ ຫົວໜ້າກົມໃຫຍ່ຕໍາຫຼວດ, ພົຕ ທອງສຸກ ຍ່າເອີລາວລີ ຫົວໜ້າກົມໃຫຍ່ພາລາທິການ, ພຈົວ ສົມລິດ ດາວຮຸ່ງສຸລິ ຫົວໜ້າກົມຕຳຫຼວດຄຸມຂັງ-ດັດສ້າງ ແລະທ່ານ ປອ ພອນປະເສິດ ອິນທະສອນ ປະທານບໍລິສັດ 3S ພັດທະນາ ຈໍາກັດ ພ້ອມດ້ວຍແຂກຖືກເຊີນເຂົ້າຮ່ວມ.

ທ່ານ ປອ ພອນປະເສິດ ອິນທະສອນ ໄດ້ກ່າວວ່າໂຄງການຢ້ຽມຢາມນັກໂທດແບບທັນສະໄໝສ້າງຂຶ້ນເພື່ອຮ່ວມມືພັດທະນາລະບົບຢ້ຽມຢາມນັກໂທດແບບທັນສະໄໝຢູ່ກົມຕຳຫຼວດຄຸມຂັງ-ດັດສ້າງ ແລະ ບັນດາຄ້າຍຄຸມຂັງ-ດັດສ້າງ ແຕ່ລະທ້ອງຖິ່ນ ໃນຂອບເຂດທົ່ວປະເທດໂດຍແມ່ນບໍລິສັດເປັນຜູ້ລົງທຶນ 100% ປັດຈຸບັນ ບໍລິສັດແມ່ນໄດ້ຈັດຕັ້ງປະຕິບັດໂຄງການສໍາເລັດຕາມສັນຍາແລ້ວ 8 ຄ້າຍຄຸມຂັງ ແລະ 1 ສູນບັນຊາຢູ່ກົມຄື: ຄ້າຍຄຸມຂັງໂພນຕ້ອງ, ຄ້າຍຄຸມຂັງນາຂ່າ ນະຄອນຫຼວງວຽງຈັນ, ຄ້າຍຄຸມຂັງຕານປ່ຽວ ແຂວງວຽງຈັນ, ຄ້າຍຄຸມຂັງບຸນເໜືອ ແຂວງຜົ້ງສາລີ, ຄ້າຍຄຸມຂັງຄັງໄຂ ແຂວງຊຽງຊວາງ, ຄ້າຍຄຸມຂັງລອງເລີກ ແຂວງຫຼວງພະບາງ, ຄ້າຍຄຸມຂັງແກ້ງຄັນ ແຂວງສະຫວັນນະເຂດ, ຄ້າຍຄຸມຂັງ ບັງລຽງ ແຂວງຈຳປາສັກ ແລະ 1 ສູນບັນຊາອະນຸມັດ ກົມຕຳຫຼວດຄຸມຂັງ-ດັດສ້າງ.

ພົຈວ ສົມລິດ ດາວຮຸ່ງສຸລິ ຫົວໜ້າກົມຕຳຫຼວດຄຸມຂັງ-ດັດສ້າງ ກ່າວວ່າ: ໂຄງການດັ່ງກ່າວມີຄວາມສຳຄັນຫຼາຍຕໍ່ການພັດທະນາພື້ນຖານວຽກງານປ້ອງກັນຄວາມສະຫງົບ ເວົ້າລວມ, ເວົ້າສະເພາະວຽກງານຄຸມຂັງ-ດັດສ້າງ ຫັນເປັນທັນສະໄໝ ໂດຍຜ່ານລະບົບສື່ສານ, ສົນທະນາທາງໄກແບບເຫັນໜ້າ ລະຫວ່າງ ນັກໂທດ, ຜູ້ຖືກດັດສ້າງ, ຜູ້ກຳລັງບໍາບັດປິ່ນປົວ ທີ່ມີເງື່ອນໄຂ ແລະຄອບຄົວຍາດພີ່ນ້ອງຜູ້ທີ່ມີຈຸດປະສົງຢ້ຽມຢາມໂດຍຜ່ານລະບົບແອັບພິເຄຊັນ (Smart Prison Visitor) ດ້ວຍການສື່ສານຜ່ານອອນລາຍຮູບແບບວີດີໂອທີ່ມີລະບົບປ້ອງກັນຄວາມປອດໄພສູງເຊັ່ນ: ຜ່ານຄອມພີວເຕີ, ສະມັສໂຟນ ເປັນຕົ້ນ ໂດຍເສຍຄ່າທໍານຽມຜ່ານ BCEL ONE, LDB Trust, ຜູ້ທີ່ຕ້ອງການຢ້ຽມຢາມແມ່ນລົງທະບຽນຂໍ້ມູນສ່ວນບຸກຄົນໂດຍຜ່ານລະບົບທີ່ຖືກອອກແບບໄວ້ແລ້ວເຊິ່ງມີເຈົ້າໜ້າທີ່ຄວບຄຸມລະບົບເປັນຜູ້ກວດສອບ ແລະອະນຸມັດ ພ້ອມບັນທຶກໄວ້ເປັນຂໍ້ມູນ.

ໂອກາດທີ່ມີຄວາມໝາຍສໍາຄັນຜູ້ເຂົ້າຮ່ວມໄດ້ພ້ອມກັນຕັດແຖບຜ້າເປີດນຳໃຊ້ໂຄງການຢ້ຽມຢາມນັກໂທດແບບທັນສະໄໝຢ່າງເປັນທາງການ.

ຂ່າວ ປກສ

แชร์