ສະຫຼຸບການທົດລອງນຳໃຊ້ ປຸ໋ຍ ກາຫົວຄວາຍ ເມືອງສອງຄອນ

ເມືອງສອງຄອນ ກໍແມ່ນເມືອງໜຶ່ງ ທີ່ປະຊາຊົນປູກເຂົ້າໄດ້ຫຼາຍ ສາມາດຂາຍເປັນສິນຄ້າ, ປະຊາຊົນສ່ວນຫຼາຍແມ່ນນຳໃຊ້ຝຸ່ນວິທະຍາສາດ ຫຼື ປຸ໋ຍ ເປັນສ່ວນຫຼາຍ ເພື່ອຍົກສູງສະມັດຕະພາບເຂົ້າໃຫ້ໄດ້ຫຼາຍ, ຕາມການລາຍງານຂອງຄະນະຫ້ອງການກະສິກຳ ແລະປ່າໄມ້ເມືອງສອງຄອນ ໃຫ້ຮູ້ວ່າ ໃນທົ່ວເມືອງມີເນື້ອທີ່ນາປີທັງໝົດທີ່ສາມາດປັກດຳໄດ້ຕົວຈິງ 35.597 ເຮັກຕາ, ສ່ວນຫຼາຍແມ່ນນາຫວ່ານ, ນຳໃຊ້ພັນປັບປຸງ ແລະນຳໃຊ້ປຸ໋ຍເປັນສ່ວນຫຼາຍ, ປັດຈຸບັນຊາວນາຊາວກະສິກອນກໍໄດ້ເກັບກ່ຽວເຂົ້າເປັນສ່ວນໃຫຍ່ສະເພາະແມ່ນເຂົ້າດໍທີ່ເກັບກ່ຽວສຳເລັດຫຼາຍແລ້ວ ກວມເອົາ 30% ຂອງເນື້ອທີ່ນາປີທັງໝົດໃນທົ່ວເມືອງ.

ຍ້ອນມີການນຳໃຊ້ປຸ໋ຍ ເປັນສ່ວນຫຼາຍ ພາຍໃຕ້ການຮ່ວມມືຂອງບໍລິສັດປຸ໋ຍບິງດ່ຽນ ກຸ່ມບໍລິສັດພົງສະຫວັນຄືບໍລິສັດໄພບູນການຄ້າ ຈຶ່ງໄດ້ນຳເອົາປຸ໋ຍກາຫົວຄວາຍ ມາໃຫ້ປະຊາຊົນໄດ້ທົດລອງນຳໃຊ້ ເພື່ອເພີ່ມສະມັດຕະພາບຂອງເຂົ້າ, ຜົນການທົດລອງນຳໃຊ້ ໃນນາຂອງປະຊາຊົນໃນ 1 ຄອບຄົວ ບ້ານທ່າຂາມລຽນ ເມືອງສອງຄອນ ແຂວງສະຫວັນະເຂດ ລວມເນື້ອທີ່ປະມານ 1.500 ຕາແມັດ ເຫັນວ່າຂຽວງາມດີ, ໃຫ້ໝາກດົກໝາ ເຂົ້າມີລຳຕົ້ນທີ່ແຂງແຮງ ແລະ ກໍ່ງາມກ່ວາປີທີ່ຜ່ານມາ, ດັ່ງການໃຫ້ສຳພາດ ຂອງທ່ານ ວິໄລສັກ ໄຊຍະວົງ ປະທານກຸ່ມຜະລິດເມັດພັນເຂົ້າຮຸ່ນ 3 ບ້ານທ່າຂາມລຽນ ຕໍ່ຜູ້ສື່ຂ່າວຂອງພວກເຮົາໃນວັນທີ 24 ຕຸລາ 2024 ນີ້ວ່າ: ຕົນໄດ້ທົດລອງນຳໃຊ້ປຸ໋ຍກາຫົວຄວາຍ ໃນເນື້ອທີ່ນາປີຂອງຕົນ ເຫັນວ່າໃຫ້ໝາກດົກໜາ, ງາມດົນ, ຢູ່ຕາມຄັນນາ ແລະ ດິນອ້ອມບ່ອນທີ່ໃສ່ປຸ໋ຍ ແມ່ນມີຂຸຍຂີ້ກະເດືອນ ສະແດງວ່າໃຫ້ຝຸ່ນ ແລະ ປັບປຸງດິນໄປພ້ອມ, ເມັດເຂົ້າໃສ ມີຮວງຍາວ ແລະ ໝາກດົກໜາ, ເຖິງຈະບໍ່ທັນໄດ້ເກັບກ່ຽວກໍສາມາດເວົ້າໄດ້ວ່າ ຈະໃຫ້ຜົນຜະລິດສູງກວ່າປີທີ່ຜ່ານມາ, ເຊິ່ງໃນປັດຈຸບັນກໍມີຫຼາຍຄົນໃຫ້ຄວາມສົນໃຈ. ເຊິ່ງຕົນເອງຄາດວ່າຈະນຳໃຊ້ໃນລະດູນາແລ້ງ ແລະ ສືບຕໍ່ໃຊ້ຕະຫຼອດໄປ.

ບ້ານທ່າຂາມລຽນ ມີ 198 ຫຼັງຄາ 204 ຄອບຄົວ, ເນື້ອທີ່ນາປີ 634 ເຮັກຕາ ສະມັດຕະພາບ 3ໂຕນເຄິ່ງຕໍ່ເຮັກຕາ, ນາແຊງ 120 ເຮັກຕາ ສະມັດຕະພາບສະເລ່ຍ4 ໂຕນເຄິ່ງຕໍ່ເຮັກຕາ, ເຊິ່ງສ່ວນຫຼາຍ ແມ່ນພັນເຂົ້າປັບປຸງ ນ້ຳໃຊ້ຝຸ່ນເຄມີ ແລະ ຝຸ່ນບົ່ມ.

ມາໃນວັນທີ 24 ຕຸລາ 2024 ນີ້ ບໍລິສັດໄພບູນການຄ້າ ຂາອອກ-ຂາເຂົ້າ ຈຳກັດ ແລະ ບໍລິສັດຫຸ້ນສ່ວນ ປຸ໋ຍ ບິງດ່ຽນ ຈຳກັດ ຈຶ່ງໄດ້ຈັດພິທີສະຫຼຸບຜົນການທົດລອງນຳໃຊ້ປຸ໋ຍ ຫົວຄວາຍ ຢູ່ບ້ານທ່າຂາມລຽນ ເມືອງສອງຄອນ, ໂດຍການເຂົ້າຮ່ວມຂອງທ່ານ ນາງ ທຸມມີ ລາດສຸລິນ ຮອງປະທານແນວລາວສ້າງຊາດແຂວງສະຫວັນະເຂດ, ທ່ານ ຄໍາໃສ ວິໄລວົງ ຄະນະຊີ້ນຳໂຄງການກອງທຶນສາມັກຄີ ແລະ ພັດທະນາ ແນວລາວສ້າງຊາດ, ມີຄະນະຂະແໜງການທີ່ກ່ຽວຂ້ອງອ້ອມຂ້າງພະແນກກະສິກຳ ແລະ ປ່າໄມ້ແຂວງ, ຄະນະຫ້ອງການກະສິກຳ ແລະ ປ່າໄມ້ ເມືອງສອງຄອນ, ຄະນະອຳນວຍການພ້ອມພະນັກງານວິຊາການບໍລິສັດໄພບູນການຄ້າ ຂາອອກ-ຂາເຂົ້າ ຈຳກັດ ແລະ ບໍລິສັດຮຸ້ນສ່ວນ ປຸ໋ຍບິງດ່ຽນ ຈຳກັດ, ອຳນາດການປົກຄອງບ້ານອ້ອມຂ້າງ ແລະປະຊາຊົນບ້ານທ່າຂາມລຽນ ເຂົ້າຮ່ວມ.

ເຊິ່ງໃນກອງປະຊຸມກໍໄດ້ມີການນຳສະເໜີກ່ຽວກັບຜົນການຕະຫຼາດການຊື້-ຂາຍປຸ໋ຍ ກາຫົວຄວາຍທີ່ປະຊາຊົນສາມາດຊື້ໄດ້ໂດຍຜ່ານກອງທຶນສາມັກຄີ ແລະ ພັດທະນາ ແນວລາວສ້າງຊາດ, ຜ່ານການຕະຫຼາດຂອງບໍລິສັດໄພບູນການຄ້າ ຂາອອກ-ຂາເຂົ້າ ຈຳກັດ ແລະຕົວແທນຈຳໜ່າຍ ທີ່ມີຕາມເມືອງຕ່າງໆ. ຄອບຄົວທີ່ທົດລອງໃຊ້ ກໍໄດ້ຍົກໃຫ້ເຫັນຜົນການທົດລອງວ່າໄດ້ຮັບຜົນດີໃນເມື່ອທົດລອງແລ້ວ. ຫຼັງຈາກນັ້ນທ່ານ ວໍ ເລ ຢຸຍ ເລີມ ຜູ້ອຳນວຍການຝ່າຍຂາຍ ບໍລິສັດຮຸ້ນສ່ວນ ຝຸ່ນເຄມີ ບິ໋ງດ່ຽນ ຈຳກັດ ກໍໄດ້ສະເໜີໃຫ້ຮູ້ກ່ຽວກັບຄວາມເປັນມາຂອງບໍລິສັດ, ຄຸນປະໂຫຍດຂອງປຸ໋ຍກາຫົວຄວາຍ, ການນຳໃຊ້ປຸ໋ຍກາຫົວຄວາຍ ທີ່ຖືກຕ້ອງກັບນາເຂົ້າ, ເຊີ່ງໃນຜ່ານມາ ຊ່ຽວຊານຂອງບໍລິສັດປຸ໋ຍ ບິງດ່ຽນ ໄດ້ມາເອົາດິນຈາກເມືອງຕ່າງໆຂອງແຂວງສະຫວັນະເຂດ ໄປວິໄຈແລ້ວ ເພື່ອຜະລິດປຸ໋ຍເຄມີ ໃຫ້ຖືກຕ້ອງກັບດີນຂອງປະຊາຊົນ ເຮັດໃຫ້ປະຊາຊົນໄດ້ຮັບຜົນຜະລິດທີ່ສູງ ສາມາດປູກເຂົ້າຂາຍເປັນສິນຄ້າສົ່ງອອກໄດ້ເພີ່ມຂຶ້ນ. ເຊິ່ງປະຊາຊົນກໍມີຄວາມສົນໃຈຖາມຂໍ້ມູນຕ່າງໆ ເພື່ອນຳໃຊ້ປຸຍເຄມີກາຫົວຄວາຍ ພ້ອມນັ້ນກໍມີການຖາມ-ຕອບ ໃຫ້ຄວາມຮູ້ ເພື່ອແຈກຂອງລາງວັນໃຫ້ກັບປະຊາຊົນທີ່ເຂົ້າຮ່ວມ.

แชร์