ເອກະຊົນ ຈະພັດທະນາໂຄງການປູກໝາກຖົ່ວລຽນ ແລະພຶດກະສິກຳເພື່ອຟື້ນຟູປ່າ ເມືອງສະໜາມໄຊ

ບໍລິສັດເອກະຊົນ ຈະມີການພັດທະນາໂຄງການ ປູກໝາກຖົ່ວລຽນ ແລະ ພຶດກະສິກຳ ເພື່ອຟື້ນຟູປ່າ ໃນເນື້ອທີ່ 100 ເຮັກຕາ ຢູ່ເຂດບ້ານຈັນຕໍ, ເມືອງສະໜາມໄຊ ແຂວງອັດຕະປື.

ພິທີເຊັນສັນຍາ ເພື່ອພັດທະນາໂຄງການດັ່ງກ່າວ ໄດ້ມີຂື້ນໃນວັນທີ 23 ຕຸລາ 2024 ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງອັດຕະປື ໂດຍການເຊັນສັນຍາກັນ ລະຫວ່າງ ອົງການປົກຄອງແຂວງ ອັດຕະປື ກັບ ບໍລິສັດ ຫົງເພັດຈະເລີນການກະເສດ ຈຳກັດຜູ້ດຽວ, ຕາງໜ້າອົງການປົກຄອງແຂວງອັດຕະປື ລົງນາມໂດຍທ່ານ ສູນນະຄອນ ແກ້ວວຽງຄຳ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ຄໍາສິງ ທອງສະຫວັດ ຮອງຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ທ່ານ ທອງສະຫວັດ ສິດທິຈັກ ຮອງຫົວໜ້າ ພະແນກກະສິກຳ ແລະ ປ່າໄມ້ແຂວງ ແລະ ທ່ານ ສຸລິວົງ ອະໄພວົງ ເຈົ້າເມືອງ ສະໜາມໄຊ, ຝ່າຍບໍລິສັດ ລົງນາມໂດຍທ່ານ ນາງ ອະນຸລັກ ບຸດຕິວົງ ຜູ້ອໍານວຍການບໍລິສັດ ຫົງເພັດ ຈະເລີນການກະເສດ ຈຳກັດຜູ້ດຽວ ແລະ ທ່ານ ນາງ ອຸດອນ ແກ້ວເຮືອງຮຸ່ງ
ຈຸດປະສົງ ໃນການເຊັນສັນຍາ ສະບັບນີ້ ຝ່າຍອົງການປົກຄອງແຂວງອັດຕະປື ມີຈຸດປະສົງ ຢາກພັດທະນາເສດຖະກິດ-ສັງຄົມພາຍໃນແຂວງ ໃຫ້ມີການຂະຫຍາຍຕົວ ທັງເປັນການສົ່ງເສີມການ ແລະ ພັດທະນາວຽກງານກະສິກຳ ຢູ່ພາຍໃນແຂວງໃຫ້ມີການເຕີບ ໃຫຍ່ຂະຫຍາຍຕົວຂຶ້ນໄປເລື້ອຍໆ, ສ່ວນທາງບໍລິສັດ ແມ່ນມີຈຸດປະສົງ ທີ່ຈະພັດທະນາໂຄງການ ປູກໝາກຖົ່ວລຽນ ແລະ ພຶດກະສິກຳ ເພື່ອຟື້ນຟູປ່າໄມ້ ໃນເນື້ອທີ່ 100 ເຮັກຕາ ຢູ່ເຂດບ້ານຈັນຕໍ ເມືອງສະໜາມໄຊ ໃຫ້ມີການຂະຍາຍຕົວ ແລະ ຍືນຍົງ ແລະ ສັນຍາດັ່ງກ່າວນີ້ ທັງສອງຝ່າຍໄດ້ມີການດໍາເນີນການຈັດຕັ້ງປະຕິບັດສອດຄ່ອງຖືກຕ້ອງຕາມລະບຽບກົດໝາຍຂອງສາທາ ລະນະລັດ ປະຊາທິປະໄຕ ປະຊາຊົນລາວ ໃນທຸກຂັ້ນຕອນ.

ຂ່າວ: ສິດຕິພອນ

แชร์