ບໍລິສັດ ພູເບ້ຍ ມາຍນິງ ເສີມຂະຫຍາຍເຕັກໂນໂລຊີດ້ານຄວາມປອດໄພທີ່ທັນສະໄໝໃຫ້ໂຄງການຂອງບໍລິສັດ ແລະຊຸມຊົນທ້ອງຖິ່ນ

ບໍລິສັດ ພູເບ້ຍ ມາຍນິງ ແມ່ນບໍລິສັດບໍ່ແຮ່ລະດັບໂລກຢູ່ລາວ, ແລະ ພູມໃຈດ້ານການປັບປຸງຄວາມປອດໄພຂອງບໍລິສັດ ໃນຂະບວນລົດຂຸດຄົ້ນຢູ່ໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ ແລະ ໂຄງການຂຸດຄົ້ນ-ປຸງແຕ່ງ ຄໍາ-ເງິນ ບ້ານຫ້ວຍຊາຍ. ໂຄງການຕ່າງໆຂອງບໍລິສັດ, ຊຶ່ງເປັນສ່ວນໜຶ່ງຂອງບໍລິສັດ ແພນອອສ໌ ແລະ ບໍລິສັດໃນເຄືອຂອງບໍລິສັດກວ່າງດົງ ຣາຍຊິງ ໂຮລດິງ ກຼຸບ (GDRH), ສືບຕໍ່ເອົາແຜນລິເລີ້ມດ້ານຄວາມປອດໄພເປັນບູລິມະສິດທີ່ສໍາຄັນໃນການປ້ອງກັນພະນັກງານບັນຊາລົດຂຸດຄົ້ນ ແລະ ຊຸມຊົນທ້ອງຖິ່ນ. 

ບໍລິສັດໄດ້ຕິດຕັ້ງກ້ອງກວດຈັບຄວາມອິດເມື່ອຍດ້ວຍເຄື່ອງ MyCadian ທີ່ທັນສະໄໝ ແລະ ລະບົບຕ່າງໆຂອງຄາເທິພິລາ (Caterpillar), ຊຶ່ງຄຸ້ມຄອງຄວາມອິດເມື່ອຍຂອງຄົນຂັບລົດໃນພາຫະນະທຸກຄັນຂອງບໍລິສັດ. ກ້ອງດັ່ງກ່າວມີເຕັກໂນໂລຊີເຊັນເຊີ້ກວດຕາທີ່ລໍ້າສະໄໝ ຊຶ່ງຕິດຕາມມ້ານຕາຂອງຄົນຂັບລົດຢ່າງຕໍ່ເນື່ອງ ເພື່ອກວດ ແລະ ເຕືອນພວກເຂົາທັນທີ່ໃນເວລາາທີ່ມີສັນຍານຄວາມອິດເມື່ອຍ. ເຄື່ອງກວດເຫຼົ່ານີ້ຈະຈັບການເໜັງຕີງຂອງໃບໜ້າ ຊຶ່ງລວມມີ: ການຫາວໃນເວລາສອງວິນາທີຕິດຕໍ່ກັນ, ຫຼັບຕາໃນເວລາສອງວິນາທີຕິດຕໍ່ກັນ ແລະ ຄວາມຖີ່ຂອງການກະພິບຕາ. ຫຼັງຈາກນັ້ນ ລະບົບດັ່ງກ່າວຈະສົ່ງລາຍງານຄວາມອິດເມື່ອຍຂອງຄົນຂັບລົດທີ່ອາດເປັນໄປໄດ້ ຫາທີມງານຄາເທິພິລາ (Caterpillar) ຊຶ່ງປະຈໍາຢູ່ອາເມລິກາ ແລະ ການແຈ້ງເຕືອນກໍ່ຈະຖືກສົ່ງໄປຫາບ່ອນນັ່ງຂອງຄົນຂັບລົດ ຜ່ານເຄື່ອງສັ່ນຕໍ່ເນື່ອງ.   

ຄວາມປອດໄພຂອງພາຫະນະຕາມເສັ້ນທາງຂົນສົ່ງພະນັກງານ ແລະ ຂົນສົ່ງແຮ່ເຂັ້ມຂຸ້ນຂອງບໍລິສັດ ຢູ່ລາວ ເປັນສ່ວນໜຶ່ງທີ່ບໍລິສັດສຸມໃສ່. ບໍລິສັດ ປ້ອງກັນຄວາມປອດໄພຂອງບັນດາຊຸມຊົນທ້ອງຖິ່ນທີ່ຢູ່ຕາມເສັ້ນທາງດັ່ງກ່າວ ດ້ວຍການເຄື່ອນລົດບັນທຸກເປັນຂະບວນທີ່ມີລົດນໍາໜ້າຂະບວນ. ພາຫະນະຕ່າງໆຈະຢຸດພັກຢູ່ຈຸດພັກລົດທີ່ກໍານົດໄວ້ຂອງບໍລິສັດ, ຄຸ້ມຄອງຄວາມໄວຂອງລົດ ຜ່ານການນໍາໃຊ້ເຕັກໂນໂລຊີທີ່ເປັນລະບົບກໍານົດຕໍາແໜ່ງເທິງໂລກ (GPS) ແລະ ດ້ວຍການສະໜັບສະໜູນຊຸມຊົນທ້ອງຖິ່ນໃຫ້ມີຄວາມຮູ້ ແລະ ເຂົ້າໃຈກ່ຽວກັບອຸປະຕິເຫດຕາມທ້ອງຖະໜົນ.

ທ່ານ ດາລິງ ເຊັງ, ຜູ້ອໍານວຍການ ແລະ ປະທານບໍລິຫານ ຂອງບໍລິສັດ ແພນອອສ໌, ໄດ້ກ່າວເຖິງຄວາມສໍາຄັນຂອງຄວາມເປັນເລີດດ້ານຄວາມປອດໄພໃນການດໍາເນີນງານຂອງບໍລິສັດ ພູເບ້ຍ ມາຍນິງ ຢູ່ລາວ.

“ບໍລິສັດ ແພນອອສ໌ ແລະ ບໍລິສັດ ພູເບ້ຍ ມາຍນິງ ມຸ້ງໝັ້ນຕໍ່ຫຼັກການ “ເຮັດໃຫ້ການບາດເຈັບເປັນສູນ” ຊຶ່ງສຸມໃສ່ຮັບປະກັນວ່າພວກເຮົາຮັກສາສະຖິຕິບໍ່ໃຫ້ມີອຸປະຕິເຫດ ແລະ ການບາດເຈັບ ຢູ່ທຸກໂຄງການຂອງພວກເຮົາ. ໂຄງການຂອງພວກເຮົາຢູ່ລາວ ສືບຕໍ່ປະຕິບັດໄດ້ດີກວ່າບໍລິສັດໃນຂະແໜງການດຽວກັນໃນໂລກ ກ່ຽວກັບເລື້ອງຄວາມປອດໄພ.

“ນີ້ແມ່ນການພິສູດໃຫ້ເຫັນເຖິງຄວາມສໍາເລັດຂອງແຜນງານຕ່າງໆດ້ານຄວາມປອດໄພຂອງພວກເຮົາ ທີ່ສອດຄ່ອງກັບປັດສະຍາຂອງບໍລິສັດ GDRH ວ່າດ້ວຍນະວັດຕະກໍາ. ພວກເຮົາສືບຕໍ່ສຸມໃສ່ເຕັກໂນໂລຊີບໍ່ແຮ່ທັນສະໄໝ ເພື່ອປັບປຸງປະສິດທິພາບໃນການດໍາເນີນງານ ແລະ ການປະຕິບັດຕ່າງໆທີ່ຕິດພັນກັບຄວາມປອດໄພ ຢູ່ບໍລິສັດ ພູເບ້ຍ ມາຍນິງ.”

ທ່ານ ຈັນເພັງ ບຸນນະຜົນ ໄດ້ໃຫ້ຮູ້ຕື່ມອີກວ່າ: “ບໍລິສັດ ພູເບ້ຍ ມາຍນິງ ປະຕິບັດຕາມເກນມາດຕະຖານຂອງສາກົນຢ່າງເຂັ້ມງວດ ເພື່ອປົກປ້ອງພະນັກງານຂອງພວກເຮົາ ແລະ ປະຊາຊົນທີ່ອາໄສຢູ່ໃນບັນດາຊຸມຊົນທ້ອງຖິ່ນ. ແນວທາງການວາງຄົນເປັນທີ່ຕັ້ງ ແມ່ນເພື່ອຮັບປະກັນວ່າທຸກຄົນກັບບ້ານດ້ວຍຄວາມປອດໄພທຸກໆມື້ ແລະ ຄຸນນະທໍາທີ່ສໍາຄັນດັ່ງກ່າວນີ້ ສະທ້ອນໃຫ້ເຫັນເຖິງຄວາມມຸ້ງໝັ້ນຂອງພວກເຮົາຕໍ່ການເຕີບໂຕຂອງທຸລະກິດຢ່າງຕໍ່ເນື່ອງ ແລະ ການດໍາເນີນງານຢ່າງຕໍ່ເນື່ອງຢູ່ລາວ.”

แชร์