ທະນາຄານພັດທະນາອາຊີ ແຕ່ງຕັ້ງຫົວໜ້າຫ້ອງການປະຈຳ ສປປ ລາວ ຄົນໃໝ່

ທະນາຄານພັດທະນາອາຊີ (ADB) ໄດ້ແຕ່ງຕັ້ງ ທ່ານ ນາງ ແຊນນີ ແຄມເບວ ເປັນຫົວໜ້າຫ້ອງການ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເປັນຜູ້ຊີ້ນໍາ ແລະ ນໍາພາການດໍາເນີນງານຂອງ ADB ຢູ່ ສປປ ລາວ ໃນການສະໜັບສະໜູນບັນດາເປົ້າໝາຍການພັດທະນາຂອງປະເທດ, ລວມທັງເປົ້າໝາຍຫລຸດຜ່ອນການປ່ອຍອາຍຜິດເຮືອນແກ້ວ ໃຫ້ບັນລຸ 60% ພາຍໃນປີ 2030.

ທ່ານ ນາງ ແຊນນີ ແຄມເບວ ໄດ້ກ່າວວ່າ: ຮູ້ສຶກມີກຽດຢ່າງຍິ່ງທີ່ໄດ້ຮັບໜ້າທີ່ໃນບົດບາດໃໝ່ ໃນຖານະຫົວໜ້າຫ້ອງການປະຈໍາປະເທດຂອງ ADB ຢູ່ ສປປ ລາວ ໂດຍທ່ານໄດ້ສະແດງຄວາມຫວັງວ່າ ຈະໄດ້ເຮັດວຽກຢ່າງໃກ້ຊິດກັບລັດຖະບານລາວ ແລະ ບັນດາຄູ່ຮ່ວມພັດທະນາໃນການສະໜັບສະໜູນ, ສົ່ງເສີມການເງິນພາກລັດຂອງປະເທດໃຫ້ໜັ້ນຄົງ, ການເພີ່ມທະວີການເຂົ້າເຖິງການບໍລິການຕ່າງໆທີ່ເທົ່າທຽມ.
ທ່ານ ນາງ ແຊນນີ ແຄມເບວ ແມ່ນຄົນສັນຊາດນິວຊີແລນ ແລະ ອັງກິດ, ໄດ້ເຂົ້າເຮັດວຽກຢູ່ ADB ໃນປີ 2010, ມີປະສົບການເຮັດວຽກ 31 ປີຢູ່ 26 ປະເທດໃນຂະແໜງການດ້ານຂົນສົ່ງ, ພະ ລັງ, ກະສິກໍາ ແລະ ຊັບພະຍາກອນນໍ້າ ແລະ ການເງິນ. ກ່ອນໜ້າທີ່ໄດ້ຮັບມອບໝາຍມາປະຈຳການຢູ່ ສປປ ລາວ,ທ່ານ ນາງ ແຄມເບວໄດ້ເປັນຫົວໜ້າຫ້ອງການ ADB ປະຈຳປະເທດຕາຈິກິສຕານ.
ສປປ ລາວ ເຂົ້າເປັນສະມາຊິກຂອງ ADB ແຕ່ປີ 1966, ມາຮອດເດືອນທັນວາປີ 2023, ADB ໄດ້ສະໜອງທຶນມູນຄ່າລວມທັງໝົດ 2,7 ຕື້ໂດລາສະຫະລັດ ໃຫ້ແກ່ 365 ໂຄງການ ຊຶ່ງລວມທັງໂຄງການທຶນກູ້ຢຶມ, ຊ່ວຍເຫລືອລ້າ ແລະ ຊ່ວຍເຫລືອທາງດ້ານວິຊາການ.
ADB ມີຄວາມມຸ່ງໝັ້ນເພື່ອບັນລຸໃຫ້ພາກພື້ນອາຊີ ແລະ ປາຊີຟິກ ຈະເລີນຮຸ່ງເຮືອງ, ພັດທະນາຢ່າງທົ່ວເຖິງ, ພ້ອມຮັບການປ່ຽນປ່ຽນ ແລະ ຍືນຍົງ, ພ້ອມທັງມີຄວາມພະຍາຍາມໃນການລົບລ້າງຄວາມທຸກຍາກ. ສ້າງຕັ້ງຂຶ້ນໃນປີ 1966, ADB ມີ 69 ປະເທດສະມາຊິກ. ໃນນັ້ນມີ 49 ປະເທດມາຈາກພາກພື້ນອາຊີ ແລະ ປາຊີຟິກ.

แชร์