ສະຖາບັນຄົ້ນຄວ້າເພື່ອການພັດທະນາປະເທດຝຣັ່ງ ແລະນ້ຳເທີນ 2 ຮ່ວມມືກັນເປີດ ສູນສຶກສາ ແລະ ຄົ້ນຄວ້າສາກົນດ້ານສິ່ງແວດລ້ອມ

ສະຖາບບັນຄຄຄົ້ນຄວວ້າເພພພື່ອການພພັດທະນາປະເທດຝຣຣຣັ່ງ (IRD) ແລະ ບໍລິສັດ ໄຟຟ້າ ນ້ຳເທີນ 2 ໄດ້ຈັດພິທີເປີດ ສູນສຶກສາ ແລະຄົ້ນຄວ້າສາກົນດ້ານສິ່ງແວດລ້ອມ (CIREN) ທີ່ ເມືອງນາກາຍ. ​ໃນ​ງານ​ຄັ້ງ​ນີ້​ມີ​ການເຂົ້າຮ່ວມຈາກ​ບັນດາກະຊວງ, ຜູ້ຊ່ຽວຊານດ້ານສິ່ງແວດລ້ອມ, ຜູ້ຕາງໜ້າຊຸມຊົນ ແລະ ຄູ່ຮ່ວມງານສາກົນ.

ສູນ CIREN ຈະເປັນສູນກາງສໍາລັບ ການສຶກສາ, ການຄົ້ນຄວ້າ ແລະການສ້າງຄວາມອາດສາມາດດ້ານການອະນຸລັກສິ່ງແວດລ້ອມ. ສູນດັ່ງກ່າວຈະສຸມໃສ່ການສ້າງຄວາມສາມາດແກ່ນັກຮຽນທ້ອງຖິ່ນໃຫ້ມີຄວາມຮູ້ ແລະ ທັກສະທີ່ຈໍາເປັນເພື່ອແກ້ໄຂບັນຫາສິ່ງແວດລ້ອມ ແລະມີສ່ວນຮ່ວມໃນການຄຸ້ມຄອງຊັບພະຍາກອນທໍາມະຊາດແບບຍືນຍົງ.

“ໃນປັດຈຸບັນສິ່ງອໍານວຍຄວາມສະດວກປະກອບມີຫ້ອງທົດລອງທາງຊີວະວິທະຍາທີ່ພ້ອມທີ່ໃຊ້ງານ ແລະ ມີອຸປະກອນຄົບເຄື່ອງຢ່າງທັນສະໄໝເຊັ່ນ ຕັ່ງນັ່ງ,ກ້ອງຈຸລະທັດ, ຕູ້ອະເຊື້ອ, ເຄື່ອງປັ່ນວ່ຽງຕະກອນ ແລະອຸປະກອນທີ່ສໍາຄັນອື່ນໆອີກ. ຫ້ອງທົດລອງນີ້ມີຄວາມຊ່ຽວຊານໃນການວິເຄາະທາງຊີວະວິທະຍາຂອງກ້ອງຈຸລະທັດ ແລະໂມເລກຸນ ເຊິ່ງເປັນສິ່ງສໍາຄັນສໍາລັບການຄົ້ນຄວ້າດ້ານສິ່ງແວດລ້ອມ,ສັດ ແລະສຸຂະພາບຂອງມະນຸດ. ໃນອະນາຄົດອັນໃກ້ນີ້ພວກເຮົາມີແຜນທີ່ຈະຂະຫຍາຍຫ້ອງທົດລອງ ເພື່ອໃຫ້ມີພື້ນທີ່ສະເພາະສໍາລັບການຮັບ ແລະ ເກັບຮັກສາຕົວຢ່າງຊີວະພາບຕ່າງໆ ລວມໄປຈົນເຖິງຫ້ອງຮຽນທີ່ມີອຸປະກອນການສອນທີ່ມີພ້ອມສິ່ງອຳນວຍຄວາມສະດວກດ້ານການສຶກສາຕ່າງໆ. ການພັດທະນານີ້ຈະເສີມຂະຫຍາຍຄວາມສາມາດໃນການດໍາເນີນການຄົ້ນຄ້ວາແບບລົງເລິກ ແລະການລິເລີ່ມການຝຶກອົບຮົມຕ່າງໆ.” ກ່າວໂດຍທ່ານນາງ ຊາບຣີນາ ໂລກາເຕລີ, ຕາງໜ້າປະຈຳປະເທດ ຂອງ IRD.

ໃນການກ່າວເປີດງານຂອງ ທ່ານ ມາກ-ອອງຕວນ ຣຸບ ຜູ້ອຳນວຍການໃຫຍ່ ຂອງ ບໍລິສັດ ໄຟຟ້າ ນ້ຳເທີນ 2, ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ຕໍ່​ທຸກ​ພາກສ່ວນທີ່​ສະໜັບສະໜູນ​ການ​ສ້າງ​ຕັ້ງສູນ CIREN. ​ທ່ານ​ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ໂຄງການ​ໃນ​ການ​ຊຸກຍູ້​ການ​ຄົ້ນຄວ້າ​ວິທະຍາສາດ​ທ້ອງ​ຖິ່ນ ທີ່ຈະມີຜົນດີຕໍ່ການສຶກສາຊີວະນາໆພັນທີ່ອຸດົມສົມບູນໃນພື້ນທີ່ໃນຕໍ່ໜ້າ.

"ສູນ CIREN ແມ່ນບາດກ້າວທີ່ສໍາຄັນກັບຄວາມມຸ່ງໝັ້ນຂອງພວກເຮົາໃນວຽກງານອະນຸລັກ ແລະ ການສຶກສາ. ຜ່ານການຮ່ວມມືກັບ IRD ແລະ ອູທິຍານແຫ່ງຊາດ ນາກາຍ ນ້ຳເທີນ ພວກເຮົາຕັ້ງໃຈໃນການສ້າງຕົວແບບຂອງທ້ອງຖິ່ນ ເພື່ອການພັດທະນາແບບຍືນຍົງໃນ ສປປ ລາວ.” ທ່ານ ຣຸບ ກ່າວຕື່ມ.

ທີ່ຕັ້ງຂອງສູນ ແມ່ນຢູ່ໃກ້ກັບອູທິຍານແຫ່ງຊາດ ນາກາຍ ນ້ຳເທີນ ເຊິ່ງເປັນໂອກາດພິເສດຂື້ນໄປຕື່ມສໍາລັບການຮຽນຮູ້ ແລະການຄົ້ນຄວ້າໃນພື້ນທີ່ທີ່ມີຄວາມຫຼາກຫຼາຍທາງດ້ານຊີວະນາໆພັນ ແລະລະບົບນິເວດທີ່ສຳຄັນ.

ທ່ານ ຣຸບ ​ຍັງ​ໄດ້​ຮຽກຮ້ອງ​ໃຫ້​ທຸກ​ພາກສ່ວນ​ທີ່​ກ່ຽວຂ້ອງ​ຈົ່ງ​ຮ່ວມ​ກັນ​ສະໜັບສະໜູນ​ພາລະກິດ​ຂອງ ສູນ CIREN. “ພວກເຮົາສາມາດສ້າງຄວາມເຂັ້ມແຂງໃຫ້ແກ່ຊຸມຊົນວິທະຍາສາດຂອງ ສປປ ລາວ ແລະຮຽນຮູ້ຕື່ມກ່ຽວກັບຊີວະນາໆພັນທີ່ອຸດົມສົມບູນຂອງປະເທດ ໂດຍການເຮັດວຽກຮ່ວມກັນ”.

“ມື້ນີ້, ກໍເປັນຂີດໝາຍອັນດີ ຂອງການຮ່ວມມື ຂອງພາກສ່ວນຕ່າງໆ ເພື່ອເພີ່ມທະວີການຮ່ວມມືດ້ານວິທະຍາສາດ ແລະ ເຕັກນິກ ຢູ່ ສປປລາວ, ຊຶ່ງໄດ້ສະແດງອອກໃຫ້ເຫັນການສ້າງຕັ້ງ « ສູນສຶກສາ ແລະຄົ້ນຄວ້າສາກົນດ້ານສິ່ງແວດລ້ອມ » ນີ້ຂຶ້ນເພື່ອເປັນສູນເຝິກອົບຮົມໃຫ້ແກ່ນັກຄົ້ນຄວ້າວິທະຍາສາດ ແລະນັກຮຽນ-ນັກສຶກສາ, ເປັນບ່ອນເຮັດການຄົ້ນຄວ້າ-ວິໄຈ ເພື່ອສະໜອງຂໍ້ມູນໃຫ້ແກ່ສັງຄົມ. ໃນນາມຕາງໜ້າໃຫ້ແກ່ກະຊວງສຶກສາທິການ ແລະກິລາ ແລະຝ່າຍລາວທຸກພາກສ່ວນ. ຂ້າພະເຈົ້າຫວັງວ່າພວກເຮົາຈະໄດ້ມີການສືບຕໍ່ການຮ່ວມມືກັນທັງທາງດ້ານວຽກງານການຄົ້ນຄວ້າ-ວິໄຈວິທະຍາສາດ ແລະຈັດກິດຈະກໍາຕ່າງໆຮ່ວມກັນອີກເລື້ອຍໆ.” ກ່າວໂດຍ ທ່ານ ຮສ. ປອ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະກິລາ.

แชร์