ເຊັນສັນຍາການສະໜອງທຶນ ກອງທຶນພັດທະນານໍ້າເທີນ 2 ໄລຍະ II

ພິທີເຊັນສັນຍາການສະໜອງທຶນກອງທຶນພັດທະນານ້ຳເທີນ 2 ໄລຍະ II ເພື່ອສືບຕໍ່ຈັດຕັ້ງປະຕິບັດໃນປີ 2024, ລະຫວ່າງ ບໍລິສັດ ໄຟຟ້ານ້ຳເທີນ 2 ຈໍາກັດ ກັບ ແຂວງຄໍາມ່ວນ ຈັດຂຶ້ນໃນວັນທີ 22 ຕຸລາ 2024 ທີ່ສູນໂຄງການນໍ້າເທີນ 2 ເມືອງຍົມມະລາດ ແຂວງຄໍາມ່ວນ, ໃຫ້ກຽດລົງນາມໃນສັນຍາຄັ້ງນີ້ໂດຍທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະທ່ານ ມາກ-ອອງຕວນ ຣຸບ ຜູ້ອໍານວຍການໃຫຍ່ ບໍລິສັດ ໄຟຟ້ານໍ້າເທີນ 2, ມີຫົວໜ້າພະແນກການພາກລັດ ແລະບໍລິສັດຕະຫຼອດຮອດຂະແໜງການກ່ຽວຂ້ອງເຂົ້າຮ່ວມ.

ກອງທຶນດັ່ງກ່າວນີ້ໄດ້ຂະຫຍາຍຂອບເຂດການພັດທະນາຊຸມຊົນໃນພາກພື້ນໃຫ້ຫຼາຍຂຶ້ນ. ບໍລິສັດໄຟຟ້ານ້ຳເທີນ 2 ຈະເພີ່ມຄວາມມຸ່ງໝັ້ນໃນການພັດທະນາຊຸມຊົນໄປທົ່ວເມືອງນາກາຍ ແລະຂະຫຍາຍໄປສູ່ ເມືອງຍົມມະລາດ ແລະ ເມືອງມະຫາໄຊ, ໂດຍຈະສຸມໃສ່ 4 ແຜນຫຼັກຄື: ການສຶກສາ, ສາທາລະນະສຸກ, ພື້ນຖານໂຄງລ່າງທີ່ຈຳເປັນ ແລະນໍ້າເພື່ອການພັດທະນາ. ນອກນັ້ນ, ຍັງໄດ້ສຸມໃສ່ການປົກປັກຮັກສາສິ່ງແວດລ້ອມ ແລະ ການອະນຸລັກຊີວະນາໆພັນ. ບໍລິສັດຈະສືບຕໍ່ສົ່ງເສີມການປູກຈິດສໍານຶກ ແລະ ໂຄງການຂໍ້ມູນຂ່າວສານຂອງຊາວໜຸ່ມໃນຊຸມຊົນທ້ອງຖິ່ນ ເພື່ອຮັບປະກັນໃຫ້ກິດຈະກໍາການພັດທະນາດໍາເນີນໄປຢ່າງຍືນຍົງ. ບໍລິສັດມີຄວາມມຸ່ງໝັ້ນ ທີ່ຈະຮ່ວມມືຢ່າງໃກ້ຊິດກັບແຂວງຄໍາມ່ວນ ເພື່ອຕອບສະໜອງຄວາມຕ້ອງການ ແລະ ຄວາມມຸ່ງມາດປາດຖະໜາຂອງຊຸມຊົນທ້ອງຖິ່ນ, ໂດຍການເສີມສ້າງທ່າແຮງ ແລະ ຂີດຄວາມສາມາດແກ່ສະຖາບັນຕ່າງໆ. ກອງທຶນນີ້ຖືກຈັດຕັ້ງຂຶ້ນຕາມຂໍ້ຕົກລົງຄວາມຮ່ວມມື ກອງທຶນພັດທະນານໍ້າເທີນ 2 ຊຶ່ງລົງນາມລະຫວ່າງ ແຂວງຄຳມ່ວນ ແລະນໍ້າເທີນ 2 ໃນເດືອນ ມິຖຸນາ ປີ 2018, ໂດຍການສະໜັບສະໜູນທຶນໃຫ້ແກ່ໂຄງການຕ່າງໆ ທີ່ຕັ້ງໜ້າພັດທະນາເສດຖະກິດ-ສັງຄົມ ແບບຍືນຍົງແກ່ຊຸມຊົນທ້ອງຖິ່ນທີ່ຢູ່ໃນເຂດໂຄງການນ້ຳເທີນ 2 ກໍຄືໃນແຂວງຄໍາມ່ວນ. ເງິນທຶນທີ່ຈັດສັນໃຫ້ແກ່ກອງທຶນພັດທະນານໍ້າເທີນ 2 ແມ່ນຖືກຄິດໄລ່ຕາມປະລິມານພະລັງງານທີຜະລິດໄດ້ປະຈໍາປີຈາກ ນ້ຳເທີນ 2 ຫຼື ເທົ່າກັບ 1.000 ກີບຕໍ່ກິໂລວັດໂມງ ຈົນເຖິງປີ 2035.

แชร์