ລາວ-ກຳປູເຈຍ ສືບຕໍ່ເພີ່ມທະວີຮັດແໜ້ນການຮ່ວມມື ດ້ານນິຕິບັນຍັດ

ທ່ານ  ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ພົບປະກັບ ສົມເດັດ ມະຫາຣັດສະເພຍທິກາ ທິພະໄດ ຄູນ ສຸດາຣິ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ໃນວັນທີ 23 ຕຸລາ ນີ້ ທີ່ ຫໍສະພາແຫ່ງຊາດ, ໃນໂອກາດເດີນທາງມາເຂົ້າຮ່ວມກອງປະຊຸມສະມັກຊາໃຫຍ່ ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ທີ່ ສປປ ລາວ ເປັນເຈົ້າພາບ.

ໃນໂອກາດດັ່ງກ່າວ ທ່ານ ໄຊສົມພອນ ພົມວິຫານ ໄດ້ຕີລາຄາສູງຕໍ່ ການເດີນທາງມາເຂົ້າຮ່ວມກອງປະຊຸມໄອປາ ຄັ້ງທີ 45 ທີ່ ສປປ ລາວ ເປັນເຈົ້າພາບ ຂອງ ສົມເດັດ ມະຫາຣັດສະເພຍທິກາ ທິພະໄດ ຄູນ ສຸດາຣິ ຊຶ່ງເປັນການປະກອບສ່ວນ ສືບຕໍ່ເສີມຂະຫຍາຍສາຍພົວພັນມິຕະພາບທີ່ເປັນມູນເຊື້ອ, ການພົວພັນແບບຄູ່ຮ່ວມຍຸດທະສາດ ຮອບດ້ານ ແລະ ໝັ້ນຄົງ ຍາວນານ ລະຫວ່າງ ສອງປະເທດ ລາວ-ກໍາປູເຈຍ ທັງເປັນການໃຫ້ກໍາລັງໃຈ ແລະ ສະໜັບສະໜູນ ສະພາແຫ່ງຊາດລາວ ປະຕິບັດພັນທະສາກົນ ໃຫ້ສໍາເລັດຢ່າງຈົບງາມ. ຂໍຖືໂອກາດນີ້ ຝາກຄວາມຢື້ຢາມຖາມຂ່າວ ແລະ ຄໍາເຊື້ອເຊີນ ຜ່ານສົມເດັດປະທານສະພາແຫ່ງຊາດ ໄປຍັງ ສົມເດັດ ຮຸນເຊນ, ປະທານສະພາສູງ ແຫ່ງ ຣາຊະອານາຈັກກຳປູເຈຍ ມາຢ້ຽມຢາມ ສປປ ລາວ ຢ່າງເປັນທາງການ ໃນວັນເວລາທີ່ເໝາະສົມ.

ປະທານສະພາແຫ່ງຊາດ ກຳປູເຈຍ ໄດ້ສະແດງຄວາມຂອບໃຈຢ່າງຈິງໃຈ ຕໍ່ຄໍາເວົ້າອັນຈົບງາມຕໍ່ສາຍພົວພັນມິດ ຕະພາບ ແລະ ການຮ່ວມມື ລະຫວ່າງສອງຊາດ ກໍຄື ລະຫວ່າງ ສອງອົງການນິຕິບັນຍັດ ຂອງພວກເຮົາ ແລະ ໄດ້ແຈ້ງສະພາບການອັນພົ້ນເດັ່ນໃນການພັດທະນາເສດຖະກິດ-ສັງຄົມ ຂອງກໍາປູເຈຍ, ສະພາບການເຄື່ອນໄຫວ ຂອງສະພາແຫ່ງຊາດກໍາປູເຈຍ ແລະ ບັນຫາອື່ນໆ ໃຫ້ແກ່ ທ່ານ ປະທານສະພາແຫ່ງຊາດ ແຫ່ງ ສປປ ລາວ ພ້ອມຄະນະໄດ້ຮັບຊາບ.

 ທ່ານ ໄຊສົມພອນ ພົມວິຫານ ໄດ້ຕີລາຄາສູງ ຕໍ່ບັນດາຜົນສຳເລັດອັນໃຫຍ່ຫຼວງໃນຫຼາຍດ້ານ ທີ່ປະຊາຊົນກໍາປູເຈຍຍາດມາໄດ້, ເຮັດໃຫ້ຣາຊະອານາຈັກກໍາປູເຈຍ ມີສະຖຽນລະພາບດ້ານການເມືອງ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປົວແປງດີຂຶ້ນເປັນກ້າວໆ ແລະ ບົດບາດອິດທິພົນຊື່ສຽງຂອງກໍາປູເຈຍ ນັບມື້ນັບໄດ້ຮັບການຍົກສູງຂຶ້ນ ໃນເວທີພາກພື້ນ ແລະ ສາກົນ.

ສຳລັບ ສປປ ລາວ ໄດ້ເອົາໃຈໃສ່ປະຕິບັດນະໂຍບາຍເຊື່ອມໂຍງ ເຊື່ອມຈອດ ເພື່ອຫັນປ່ຽນຈາກເປັນປະເທດ ບໍ່ມີທາງອອກສູ່ທະເລ ເປັນປະເທດເຊື່ອມຈອດໃນພາກພື້ນ ແລະ ສາກົນ ໂດຍຖືເອົາເສັ້ນທາງລົດໄຟ ລາວ-ຈີນ ເປັນທ່າແຮງໃນການຂົນສົ່ງສິນຄ້າ ແລະ ການທ່ອງທ່ຽວ ຈາກບັນດາປະເທດອາຊຽນ ໄປສູ່ ສປ ຈີນ ແລະ ປະເທດອື່ນໆ. ພ້ອມນີ້, ກໍມີແຜນຈະສ້າງເສັ້ນທາງລົດໄຟ, ທາງດ່ວນ ຈາກນະຄອນຫຼວງວຽງຈັນ ໄປສູ່ພາກກາງ ແລະ ພາກໃຕ້ ຂອງ ສປປ ລາວ ແລະ ເຊື່ອມຕໍ່ ກັບປະເທດໃກ້ຄຽງ ຊຶ່ງລວມທັງຣາຊະອານາຈັກກໍາປູເຈຍ ທີ່ມີທ່າແຮງຫຼາຍດ້ານໃນການຮ່ວມມື ແລະ ພັດທະນາຮ່ວມກັນ.

 ທ່ານ ໄຊສົມພອນ ພົມວິຫານ ຕີລາຄາສູງ ຕໍ່ການພົວພັນ ແລະ ການຮ່ວມມື ລະຫວ່າງ ລາວ ແລະ ກຳປູເຈຍ ທີ່ໄດ້ ຮັດແໜ້ນ ແລະ ເສີມຂະຫຍາຍຢ່າງຕໍ່ເນື່ອງ ຊຶ່ງສະແດງອອກໃນການແລກປ່ຽນຄະນະຜູ້ແທນຂັ້ນສູງສຸດ ແລະ ຂັ້ນຕ່າງໆ ນັບແຕ່ສູນກາງ ຮອດທ້ອງຖິ່ນ ຢ່າງເປັນປົກກະຕິ. ນອກນີ້, ບັນດາຂະແໜງການ ຂອງສອງປະເທດ ກໍມີການພົວພັນຮ່ວມມື ແລະ ການຊ່ວຍເຫຼືອ ເຊິ່ງກັນ ແລະ ກັນ ຊຶ່ງໄດ້ມີສົນທິສັນຍາ, ສັນຍາ, ບົດບັນທຶກ ແລະ ນິຕິກໍາອື່ນໆ ນໍາກັນ ທີ່ພົວພັນເຖິງການຮ່ວມມື ດ້ານການເມືອງ-ການຕ່າງປະເທດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ ດ້ານພະລັງງານ, ການຄົມມະນາຄົມ-ຂົນສົ່ງ, ການສຶກສາ-ກິລາ, ການທ່ອງທ່ຽວ ແລະ ອື່ນໆ. ຕີລາຄາສູງ ຕໍ່ຜົນສໍາເລັດການຢ້ຽມຢາມ ສປປ ລາວ ຂອງ ສົມເດັດ ມະຫາ ບໍວໍ ທິບໍດີ ຮຸນ ມາເນັດ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ພ້ອມຄະນະ ໃນຕົ້ນປີ 2024 ແລະ  ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດກ່ຽວຂ້ອງ ທີ່ຫາກໍ່ສຳເລັດຜ່ານມານີ້ ຊຶ່ງມີຄວາມໝາຍສໍາຄັນຕໍ່ການເສີມຂະຫຍາຍການພົວພັນຮ່ວມມືທີ່ເປັນມູນເຊື້ອມາແຕ່ດົນນານ ລະຫວ່າງ ລາວ ແລະ ກໍາປູເຈຍ.

 ສຳລັບການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ກຳປູເຈຍ ເຫັນວ່າ ໄດ້ມີມູນເຊື້ອແຫ່ງການພົວພັນຮ່ວມມືທີ່ດີງາມ ສະໜິດສະໜົມມາແຕ່ດົນນານ, ສະແດງອອກໃນການຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດ ເປັນຕົ້ນແມ່ນ ການແລກປ່ຽນຢ້ຽມຢາມ ຄະນະຜູ້ແທນທຸກໆຂັ້ນທີ່ຕິດພັນກັບການແລກປ່ຽນບົດຮຽນປະສົບການ ໃນການປະຕິບັດພາລະບົດບາດດ້ານນິຕິບັນຍັດ.

 ສຳລັບ ການພົວພັນຮ່ວມມື ໃນຕໍ່ໜ້າ ສະເໜີສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ທີ່ສອງສະພາແຫ່ງຊາດ ໄດ້ລົງນາມຮ່ວມກັນ ໃນໄລຍະຜ່ານມາ ໃຫ້ເປັນຮູບປະທໍາກວ່າເກົ່າ ໂດຍສືບຕໍ່ແລກປ່ຽນການຢ້ຽມຢາມ ຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ນັບແຕ່ສູນກາງຮອດທ້ອງຖິ່ນ ຢ່າງເປັນປົກກະຕິ ໂດຍສະເພາະການແລກ ປ່ຽນຢ້ຽມຢາມ ລະຫວ່າງ ສະພາປະຊາຊົນຂັ້ນແຂວງ ທີ່ມີຊາຍແດນຕິດຈອດກັນ ເພື່ອແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ ນໍາກັນ; ສືບຕໍ່ຊຸກຍູ້ ແລະ ສົ່ງເສີມ ໃຫ້ຂະແໜງການ ຂອງສອງລັດຖະບານ ໄດ້ເອົາໃຈໃສ່ໃນການຈັດຕັ້ງປະຕິບັດບັນດາສົນທິສັນຍາ, ສັນຍາ ແລະ ນິຕິກຳອື່ນໆ ທີ່ສອງຝ່າຍໄດ້ລົງນາມຮ່ວມກັນ ໃຫ້ມີປະສິດທິຜົນສູງກວ່າເກົ່າ ແລະ ນໍາເອົາປະໂຫຍດຕົວຈິງ ມາສູ່ປະຊາຊົນສອງຊາດ; ສອງຝ່າຍ ສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມື ທີ່ເປັນມູນເຊື້ອທີ່ດີງາມມາແຕ່ດົນນານ ຂອງສອງອົງການນິຕິບັນຍັດ ໃນການສະໜັບສະໜູນ ແລະ ຮ່ວມມືກັນ ໃນເວທີລັດຖະສະພາພາກພື້ນ ແລະ ສາກົນ.

ຂ່າວ-ພາບ:ສຳນານ

• 23/10/2024