ຄະນະຜູ້ແທນ ສ ເບລາຣຸດຊີ ວາງກະຕ່າດອກໄມ້ ຢູ່ພິພິທະພັນໄກສອນ ພົມວິຫານ

ໃນຕອນເຊົ້າວັນທີ 19 ຕຸລາ 2024 ນີ້, ທ່ານ ອີກໍ ເຊີເກເຢນໂກ ປະທານສະພາຜູ້ແທນປະຊາຊົນ, ສະພາແຫ່ງຊາດ ສ ເບລາຣຸດຊີ ພ້ອມຄະນະໄດ້ເຂົ້າວາງກະຕ່າດອກໄມ້ ຢູ່ພິພິທະພັນ ປະທານໄກສອນ ພົມວິຫານ ໃນໂອກາດທີ່ໄດ້ມາຢ້ຽມຍາມ ແລະເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຫລື ໄອປາ ຄັ້ງທີ 45 ທີ່ ສປປ ລາວ ເປັນເຈົ້າພາບ. ທັງນີ້ກໍເພື່ອສະແດງຄວາມເຄົາລົບຮັກ, ຈົດຈໍາບຸນຄຸນອັນໃຫຍ່ຫລວງ ແລະ ສືບຕໍ່ເສີມຂະຫຍາຍແນວຄິດຂອງປະທານໄກສອນ ພົມວິຫານ ທີ່ແສນເຄົາລົບຮັກກໍຄືມູນເຊື້ອຄວາມສາມັກຄີອັນດີງາມຂອງ ສປປ ລາວ ແລະ ສ ເບລາຣຸດຊີ ໃຫ້ໝັ້ນຄົງທະນົງແກ່ນຕະຫລອດໄປ.

ການເຂົ້າວາງກະຕ່າດອກໄມ້ຄັ້ງນີ້, ສະແດງຄວາມເຄົາລົບຮັກ, ຈາລຶກຄຸນງາມຄວາມດີຂອງປະທານ ໄກສອນ ພົມວິຫານ ທີ່ໄດ້ອຸດທິດຕະຫລອດຊີວິດເພື່ອຜົນປະໂຫຍດສ່ວນລວມຂອງຊາດ, ທ່ານໄດ້ສຸມສະຕິປັນຍາເຂົ້າໃນການນໍາພາຂະບວນການຕໍ່ສູ້ຕ້ານການຮຸກຮານຂອງພວກຕ່າງດ້າວສາມາດຍາດໄດ້ໄຊຊະນະ ແລະນໍາເອົາຄວາມຢູ່ເຢັນເປັນສຸກມາສູ່ປະຊາຊົນ, ປະທານໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ເປັນນັກປະຕິວັດຜູ້ດີເລີດ, ເປັນຜູ້ນໍາສູງສຸດຂອງການປະຕິວັດທີ່ມີຄວາມປີຊາສາມາດ, ມີຄວາມສະຫລາດຫລັກແຫລມ, ມີໄຫວພິບອັນແຫລມຄົມ, ມີນໍ້າໃຈຕໍ່ສູ້ເດັດດ່ຽວໜຽວແໜ້ນ, ນໍາພາສ້າງຕັ້ງ, ຖະນຸບຳລຸງ, ສ້າງສາ ແລະພັດທະນາປະເທດຊາດໃຫ້ຮຸ່ງເຮືອງສີວິໄລ, ສ້າງປະຖົມປັດໄຈກ້າວຂຶ້ນສັງຄົມນິຍົມຢ່າງໜັກແໜ້ນ.
ທີ່ມາ: ຂປລ

แชร์