ນາຍົກ ພົບປະກັບ ປະທານສະພາຜູ້ແທນປະຊາຊົນ ສະພາແຫ່ງຊາດ ແຫ່ງ ສ. ເບລາຣຸດຊີ

ໃນວັນທີ 19 ຕຸລານີ້ ທີ່ນະຄອນຫຼວງວຽງຈັນ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະໄດ້ພົບກັບ ທ່ານ ອີກໍ ເຊີເກເຢນໂກ ປະທານສະພາຜູ້ແທນປະຊາຊົນ ສະພາແຫ່ງຊາດ ແຫ່ງ ສ. ເບລາຣຸດຊີ ພ້ອມຄະນະ.

ທ່ານ ສອນໄຊ ສີພັນດອນ ສະແດງຄວາມຍິນດີ ແລະ ຕີລາຄາສູງ ຕໍ່ການຢ້ຽມ ຢາມທາງການ ແລະ ການເຂົ້າຮ່ວມກອງປະຊຸມ AIPA ຄັ້ງທີ 45, ຊຶ່ງເປັນການປະ ກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະ ຫວ່າງ ສອງປະເທດ ລາວ-ເບລາຣຸດຊີ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ, ທັງເປັນການສະໜັບສະໜູນ ແລະ ໃຫ້ກໍາລັງໃຈແກ່ ສປປ ລາວ ທີ່ເຮັດສໍາເລັດໜ້າທີ່ພັນທະສາກົນຂອງຕົນ; ພ້ອມທັງຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ເຖິງ ທ່ານ ໂຣມັນ ໂກລ໋ອຟເຊັນໂກ້, ນາຍົກລັດຖະມົນຕີ ແຫ່ງ ສ. ເບລາຣຸດຊີ ມາໃນໂອກາດນີ້.

ເຖິງວ່າປັດຈຸບັນສະພາບການໃນໂລກ, ພາກພື້ນມີຄວາມສັບສົນ, ສະຫລັບຊັບຊ້ອນ, ແຕ່ສາຍພົວພັນມິດຕະພາບ ແລະ ການຮ່ວມມືລະຫວ່າງ 2 ປະເທດຍັງສືບຕໍ່ຂະຫຍາຍຕົວຢ່າງບໍ່ຢຸດຢັ້ງຕໍ່ເນື່ອງ. ສອງຝ່າຍໄດ້ມີການແລກປ່ຽນຄະນະຜູ້ແທນນໍາກັນ ແລະ ມີການກະກຽມບັນດາຮ່າງສັນຍາການຮ່ວມມືຮ່ວມກັນທາງດ້ານການເມືອງ, ເສດຖະກິດ-ການຄ້າ, ການລົງທຶນ, ການສຶກສາ, ສາທາລະນະສຸກ, ວັດທະນະທໍາ, ທ່ອງທ່ຽວ ແລະ ດ້ານອື່ນໆ ແຕ່ເຫັນວ່າບັນດາສັນຍາຮ່ວມມືເຫລົ່ານັ້ນ ຍັງບໍ່ທັນໄດ້ຮັບການເສີມຂະຫຍາຍ ໃຫ້ແຕກດອກອອກຜົນເທົ່າທີ່ຄວນຍ້ອນການລະບາດຂອງພະຍາດໂຄວິດ 19; ພ້ອມນີ້ຍັງໄດ້ຕີລາຄາສູງຕໍ່ຜົນສໍາເລັດການພົບປະລະຫວ່າງ ສອງປະທານສະພາແຫ່ງຊາດ ລາວ-ເບລາຣຸດຊີ ທີ່ໄດ້ພ້ອມກັນຕີລາຄາຄືນການພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດໃນໄລຍະຜ່ານມາ, ແລກປ່ຽນຄໍາຄິດຄໍາເຫັນກ່ຽວກັບສະພາບການພາກພື້ນ, ສາກົນ ແລະພ້ອມກັນປຶກສາຫາລືທິດທາງແຜນການຮ່ວມມືໃນຕໍ່ໜ້າກໍຄືຕີລາຄາຄືນການຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການ ຮ່ວມມື ຂອງສອງສະພາແຫ່ງຊາດ ແລະ ຮ່ວມກັນເຊັນບົດບັນທຶກສະບັບໃໝ່.

ທ່ານນາຍົກລັດຖະມົນຕີ ກ່າວຕື່ມວ່າ: ໃນນາມລັດຖະບານ ແຫ່ງ ສປປ ລາວ ມີຄວາມຍິນດີສະໜັບສະໜູນການພົວພັນຮ່ວມມື ລະຫວ່າງ 2 ສະພາແຫ່ງຊາດລາວ-ເບລາຣຸດຊີ ໃນການສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມື ໂດຍສະເພາະສືບຕໍ່ແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນ ແລະ ການຕິດຕາມກວດກາ ແລະຊຸກຍູ້ການຈັດຕັ້ງປະຕິບັດບັນດາສົນທິສັນຍາ,ສັນຍາ ແລະຂໍ້ຕົກລົງຕ່າງໆ ທີ່ສອງລັດຖະບານໄດ້ລົງນາມຮ່ວມກັນໃຫ້ເປັນຮູບປະທໍາຍິ່ງຂຶ້ນ.

แชร์