ກາເຟພູເບ້ຍ ໃຫ້ການສະໜັບສະໜູນ ໃນກອງປະຊຸມສຸດຍອດອາຊຽນ

ເພື່ອໃຫ້ແຂກທັງພາຍໃນ ແລະຕ່າງປະເທດທີ່ມາປະຕິບັດໜ້າທີ່ຮັບໃຊ້ກອງປະຊຸມສຸດຍອດອາຊຽນ ໄດ້ດື່ມກາເຟລາວ ແລະສຳພັດເຖິງກິ່ນຫອມຂອງກາເຟ, ທາງກາເຟພູເບ້ຍລາວ ໄດ້ຈັດບຸດສະຫນັບສະຫນູນເຄື່ອງດື່ມປະເພດກາເຟ ຕະຫລອດໄລຍະການດຳເນີນກອງປະກອງປະຊຸມ.

ທ່ານນາງ ສຸນັດຕາ ລິດປັນຍາ ປະທານກາເຟພູເບ້ຍລາວ ຈໍາກັດໃຫ້ສໍາພາດວ່າ: ໃນໄລຍະດໍາເນີນກອງປະຊຸມສຸດຍອດອາຊຽນຄັ້ງທີ 44 ແລະ 45 ແລະ ກອງປະຊຸມສຸດຍອດກ່ຽວຂ້ອງອື່ນໆ ທີ່ ສປປ ລາວໄດ້ຮັບກຽດເປັນເຈົ້າພາບໃນລະຫວ່າງວັນທີ 8 - 11 ຕຸລາ 2024 ນີ້, ທາງກາເຟພູເບ້ຍລາວ ກໍໄດ້ໃຫ້ການສະໜັບສະໜູນເຄື່ອງດື່ມປະເພດກາເຟໃຫ້ແຂກທັງພາຍໃນ ແລະ ຕ່າງປະເທດທີ່ມາປະຕິບັດໜ້າທີ່ຮັບໃຊ້ກອງປະຊຸມໃນຄັ້ງນີ້, ຊຶ່ງໄດ້ຈັດບູດ (ຮ້ານ) ຢູ່ສູນຂ່າວ ICTCເລີ່ມແຕ່ວັນທີ 8 ຕຸລາ ແລະ ຈະບໍລິການເຖິງວັນທີ 11 ຕຸລາ 2024, ຊຶ່ງເຫັນວ່າມີແຂກໃຫ້ຄວາມສົນໃຈ ນິຍົມມາດື່ມກາເຟພູເບ້ຍລາວຫຼາຍສົມຄວນ ຈາກມື້ໜຶ່ງ 800 ຈອກ ເພີ່ມຂຶ້ນເປັນ 1,000 ກວ່າຈອກຕໍ່ມື້.

ທ່ານນາງ ສຸນັດຕາ ລິດປັນຍາ ກ່າວຕື່ມວ່າ: ກາເຟພູເບ້ຍລາວ ເປັນກາເຟທໍາມະຊາດປູກເອງຈາກຄົນລາວຢູ່ທາງພາກເໜືອ. ໃນໄລຍະຜ່ານມາ ກາເຟພູເບ້ຍລາວຍັງໄດ້ໃຫ້ການສະໜັບສະໜູນຮັບໃຊ້, ບໍລິການຫຼາຍກອງປະຊຸມອາຊຽນທີ່ສປປ ລາວ ຈັດຂຶ້ນເລີ່ມແຕ່ຕົ້ນປີ 2024 ເປັນຕົ້ນມາ, ຊຶ່ງມີຄວາມຮູ້ສຶກດີໃຈ ແລະ ພາກພູມໃຈເປັນຢ່າງຍິ່ງທີ່ໄດ້ມີໂອ ກາດນໍາເອົາກາເຟພູເບ້ຍລາວມາບໍລິການ.

ກາເຟພູເບ້ຍລາວມີສະໂລແກນທີ່ວ່າ: ກາເຟພູເບ້ຍລາວຫອມຫວນ ຊວນສົດຊື່ນ ດີຕໍ່ສຸຂະພາບ, ຊຶ່ງປັດຈຸດໄດ້ກາຍເປັນທີ່ຮູ້ຈັກ ແລະ ນິຍົມຊົມຊອບຢ່າງກວ້າງຂວາງໃນສັງຄົມ. ສະນັ້ນ, ທາງກາເຟພູເບ້ຍລາວຈະເປີດສາຂາກາເຟດັ່ງກ່າວຢ່າງເປັນທາງການໃນທ້າຍປີ 2024 ນີ້ ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ. ດັ່ງນັ້ນ, ຂໍເຊີນຊວນສັງຄົມທັງພາຍໃນ ແລະ ຕ່າງປະເທດທີ່ມີຄວາມສົນໃຈ ສາມາດເຂົ້າມາລອງຊີມ, ດື່ມກາເຟພູເບ້ຍລາວໄດ້.

ໂດຍ: ໃພ້ໄຊທານີ

แชร์