ອາຊຽນ-ສ ເກົາຫລີ ຫາລືຜັນຂະຫຍາຍການເປັນຄູ່ຮ່ວມມືຍຸດທະສາດຮອບດ້ານ

ກອງປະຊຸມສຸດຍອດອາຊຽນ-ສ ເກົາຫລີ ຄັ້ງທີ 25 ຈັດຂຶ້ນໃນວັນທີ 10 ຕຸລາ 2024 ນີ້ ຢູ່ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ໂດຍມີບັນດາຜູ້ນຳອາຊຽນ ແລະທ່ານ ຢຸນ ຊອກ ຢອນ ປະທານາທິບໍດີ ແຫ່ງ ສ ເກົາຫລີ, ທ່ານນາຍົກລັດຖະມົນຕີ ຕີມໍແລັດສະເຕ ເຂົ້າຮ່ວມໃນນາມຜູ້ສັງເກດການ.

ກອງປະຊຸມຄັ້ງນີ້, ມີຈຸດປະສົງເພື່ອສະເຫລີມສະຫລອງ ການພົວພັນອາຊຽນ-ສ ເກົາຫລີ ຄົບຮອບ 35 ປີ ໃນປີ 2024 ໂດຍບັນດາຜູ້ນຳຂອງອາຊຽນ ແລະ ສ ເກົາຫລີ ໄດ້ຕີລາຄາສູງ ຕໍ່ໝາກຜົນຂອງການພົວພັນຮ່ວມມື ອາຊຽນ-ສ ເກົາຫລີ ຕະຫລອດໄລຍະ 35 ປີຜ່ານມາ ແລະເຫັນດີຍົກລະດັບການພົວພັນ ອາຊຽນ-ສ ເກົາຫລີ ຂຶ້ນເປັນຄູ່ຮ່ວມມືຍຸດທະສາດຮອບດ້ານໂດຍໄດ້ຮັບຮອງເອົາຖະແຫລງ ການຮ່ວມຂອງຜູ້ນໍາວ່າດ້ວຍການສ້າງຕັ້ງການເປັນຄູ່ຮ່ວມຍຸດທະສາດຮອບດ້ານອາຊຽນ-ສ ເກົາຫລີ.

ສໍາລັບທິດທາງການຮ່ວມມືໃນຕໍ່ໜ້າ, ກອງປະຊຸມໄດ້ປຶກສາຫາລື ເພື່ອຜັນຂະຫຍາຍການເປັນຄູ່ຮ່ວມມືຍຸດທະສາດຮອບດ້ານໃຫ້ເປັນຮູບປະທຳລວມທັງຊຸກຍູ້ເພີ່ມທະວີການຮ່ວມມືດ້ານການຄ້າ, ການລົງທຶນ, ທ່ອງທ່ຽວ, ເສດຖະກິດດີຈິຕອນ ແລະຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ, ການສຶກສາ, ສາທາລະນະສຸກ, ການປ່ຽນແປງດິນຟ້າອາກາດ ແລະ ໄພພິບັດທໍາມະຊາດ ກໍຄື ການໄປມາຫາສູ່ຂອງປະຊາຊົນ.

ສ ເກົາຫລີ ເປັນຄູ່ເຈລະຈາໜຶ່ງທີ່ສຳຄັນ ແລະຫ້າວຫັນຂອງອາຊຽນ, ອາຊຽນ ແລະ ສ ເກົາຫລີ ໄດ້ສ້າງຕັ້ງສາຍພົວພັນ ໃນປີ 1989, ໄດ້ຍົກລະດັບເປັນຄູ່ຮ່ວມຍຸດທະສາດ ໃນປີ 2010 ແລະ ເປັນຄູ່ຮ່ວມຍຸດທະສາດຮອບດ້ານ ໃນປີ 2024.

แชร์