ຮອງນາຍົກ ຕ້ອນຮັບຮອງຜູ້ອໍານວຍການໃຫຍ່ IMF

ທ່ານ ສະເຫຼີມໄຊ ກົມມະສິດ ຮອງນາຍົກຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ Kenji Okamura ຮອງຜູ້ອໍານວຍການໃຫຍ່ອົງການກອງທຶນການເງິນສາກົນ (IMF) ພ້ອມດ້ວຍຄະນະ ໃນວັນທີ 10 ຕຸລານີ້ ທີ່ຫໍປະຊຸມແຫ່ງຊາດ, ໃນໂອກາດມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 - 45 ແລະກອງປະຊຸມປິ່ນອ້ອມອື່ນໆ ໃນໄລຍະວັນທີ 9-11 ຕຸລາ 2024 ທີ່ນະຄອນຫຼວງວຽງຈັນ.
ການພົບປະຢ້ຽມຢາມຄັ້ງນີ້ເພື່ອເສີມຂະຫຍາຍການຮ່ວມມືລະຫວ່າງ ສປປ ລາວ ແລະ ອົງການກອງທຶນການເງິນສາກົນໂດຍສະເພາະການຮ່ວມມືໃນຂົງເຂດວຽກງານການຄຸ້ມຄອງເສດຖະກິດມະຫາພາກໃນ ສປປ ລາວ ແລະ ພາກພື້ນພ້ອມທັງເປັນການຕອບສະໜອງຕາມການເຊື້ອເຊີນຂອງ ສປປ ລາວ ໃນການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 - 45 ທີ່ ສປປ ລາວ.
ໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີ ແລະ ຊົມເຊີຍຕໍ່ການພົວພັນຮ່ວມມືລະຫວ່າງ ສປປ ລາວ ແລະ ອົງການກອງທຶນການເງິນສາກົນ ພ້ອມທັງສະແດງຄວາມຂອບໃຈທີ່ອົງການກອງທຶນການເງິນສາກົນໄດ້ໃຫ້ການສະໜັບສະໜູນ ແລະຊ່ວຍເຫຼືອໃນໄລຍະຜ່ານມາລວມທັງການໃຫ້ຄຳປຶກສາດ້ານນະໂຍບາຍທີ່ເປັນປະໂຫຍດ ຕໍ່ການຈັດຕັ້ງປະຕິບັດເສດຖະກິດມະຫາພາກຂອງ ສປປ ລາວ ລວມທັງໄດ້ຮັບການຊ່ວຍເຫຼືອຍົກລະດັບດ້ານວິຊາການປະກອບສ່ວນເຂົ້າໃນການຄຸ້ມຄອງເສດຖະກິດຂອງ ສປປ ລາວ ໃຫ້ມີສະຖຽນລະພາບ ແລະ ເຂັ້ມແຂງ.
ຂ່າວ: ກະຊວງການຕ່າງປະເທດ

แชร์