ລາວ-ສ. ເກົາຫຼີ ຫາລືວຽກງານປ່າໄມ້

ໃນຕອນບ່າຍວັນທີ 9 ຕຸລາ 2024 ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງກະສິກຳ ແລະປ່າໄມ້ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມພົບປະ ຂອງ ທ່ານ ລີມ ຊັງຊອບ (LIM Sang-seop) ລັດຖະມົນຕີ ກະຊວງປ່າໄມ້ ສ. ເກົາຫຼີ ພ້ອມດ້ວຍຄະນະ ການພົບປະຄັ້ງນີ້ແມ່ນເນື່ອງໃນໂອກາດການເດີນທາງມາເຂົ້າຮ່ວມກອງປະຊຸມສຸດຍອດອາຊຽນ ໃນວັນທີ 10 ຕຸລາ 2024 ແລະ ພິທີເຊັນ ບົດບັນທຶກຮ່ວມມືດ້ານວຽກງານ REDD+ ກ່ຽວກັບການຈັດຕັ້ງປະຕິບັດ ສົນທິສັນຍາປາຣີທີ່ທຳນຽບປະທານປະເທດ, ການພົບປະຄັ້ງນີ້ທ່ານລັດຖະມົນຕີກະຊວງກະສິກໍາ ແລະ ປ່າໄມ້ຂອງລາວ ໄດ້ຍົກໃຫ້ເຫັນຄວາມສໍາຄັນ, ການຈັດຕັ້ງປະຕິບັດ, ຄວາມຮັບຜິດຊອບຕໍ່ກັບວຽກງານປ່າໄມ້ໃນຂະແໜງການ, ການຄຸ້ມຄອງປົກປັກຮັກສາຊັບພະຍາກອນປ່າໄມ້ ແລະ ການເພີ່ມຄວາມປົກຫຸ້ມຂອງປ່າໄມ້ ລວມທັງບັນດາແຜນງານຫຼັກຂອງກະຊວງກະສິກໍາ ແລະປ່າໄມ້ ທີ່ກໍາລັງຈັດຕັ້ງປະຕິບັດຢູ່ໃນປັດຈຸເປັນ, ທ່ານ ລີມ ຊັງຊອບ ລັດຖະມົນຕີ ກະຊວງປ່າໄມ້ ສ. ເກົາຫຼີ ໄດ້ກ່າວວ່າ ນັບແຕ່ປີ 2013 ເປັນຕົ້ນມາ ກະຊວງກະສິກໍາ ແລະ ປ່າໄມ້ ສປປ ລາວ ແລະ ກະຊວງປ່າໄມ້ ແຫ່ງ ສ. ເກົາຫຼີ ໄດ້ມີລົງນາມໃນບົດບັນທຶກຄວາມເຂົ້າໃຈ ໃນກອບການຮ່ວມມືດ້ານການຫຼຸດຜ່ອນທາດອາຍເຮືອນແກ້ວຈາກການທໍາລາຍປ່າໄມ້ ແລະ ເຮັດໃຫ້ປ່າໄມ້ ຊຸດໂຊມ ໂດຍລັດຖະບານ ສ. ເກົາຫຼີ ໄດ້ໃຫ້ການສະໜັບສະໜູນດ້ານງົບປະມານ ເພື່ອຈັດຕັ້ງປະຕິບັດໂຄງການພັດທະນາສິນເຊື່ອກາກບອນ ຊຶ່ງຜ່ານການຈັດຕັ້ງປະຕິບັດບັນດາໂຄງການເຫຼົ່ານັ້ນ ໄດ້ເປັນບາດກ້າວທີ່ສໍາຄັນ ລະຫວ່າງ 2 ປະເທດ ໃນການຮ່ວມມືດ້ານການສົ່ງເສີມກິດຈະກໍາການຫຼຸດຜ່ອນທາດອາຍເຮືອນແກ້ວຈາກການທໍາລາຍປ່າໄມ້, ໂດຍທ່ານໄດ້ສະແດງຄວາມປິຕິຍິນດີຕໍ່ກັບການມາຢ້ຽມຢາມພົບປະ ແລະປຶກສາຫາລືກັບກະຊວງກະສິກໍາ ແລະ ປ່າໄມ້ ຂອງ ສປປ ລາວ ດ້ານວຽກງານປ່າໄມ້ ຄັ້ງນີ້ ແລະ ເຊື່ອໝັ້ນວ່າ 2 ປະເທດຈະຮ່ວມກັນສືບຕໍ່ການປະກອບສ່ວນໃນການແກ້ໄຂບັນຫາການປ່ຽນແປງດິນຟ້າອາກາດ, ໃນຕອນທ້າຍຂອງການພົບປະ ທ່ານ ລິນຄໍາ ດວງສະຫວັນ ລັດຖະມົນ ຕີກະຊວງກະສິກໍາ ແລະປ່າໄມ້ ຍັງໄດ້ສະແດງຄວາມຍິນດີທີ່ການຮ່ວມມືສອງຝ່າຍຈະມີໃບໜ້າໃໝ່ໂດຍສະເພາະໃນຂົງເຂດວຽກງານປ່າໄມ້ ແລະສະແດງຄວາມດີໃຈທີ່ຈະເກີດມີໂຄງການໃໝ່ໆເກີດຂຶ້ນພາຍຫຼັງການເຊັນສັນຍານີ້ ແລະ ດີໃຈເປັນຢ່າງຍິ່ງທີ່ໄດ້ຮັບຮູ້ວ່າ ສປປ ລາວ ໄດ້ຮັບການພິຈາລະນາການ ກ່ຽວກັບການຈະຊ່ວຍເຫຼືອດ້ານລົດດັບໄຟປ່າຈາກຂອງ ສ. ເກົາຫຼີ ໃນອະນາຄົດເຊິ່ງເປັນຜົນອັນເນື່ອງມາຈາກການຮ່ວມມື 2 ຝ່າຍຂອງພວກເຮົາ.

ຂ່າວ: ນ ສີອໍາມອນ ໄຊຍະລາດ

 

แชร์