ອາຊຽນ-ຈີນ ຮັບຮອງ 5 ເອກະສານສຳຄັນ

ກອງປະຊຸມສຸດຍອດອາຊຽນ-ຈີນ ຄັ້ງທີ 27 ໄດ້ຈັດຂຶ້ນວັນທີ 10 ຕຸລາ 2024 ທີ່ ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ສປປ ລາວ, ມີບັນດາຜູ້ນໍາອາຊຽນ ແລະ ທ່ານ ຫຼີ ສຽງ ນາຍົກລັດຖະມົນຕີ ສປ ຈີນ ເຂົ້າຮ່ວມ ແລະ ນາຍົກລັດຖະມົນຕີຂອງ ຕີມໍເລສເຕ ເຂົ້າຮ່ວມໃນນາມຜູ້ສັງເກດການ.

ສຳລັບກອງປະຊຸມຄັ້ງນີ້ໄດ້ທົບທວນຄືນ ແລະ ກໍານົດທິດທາງໃນການຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ ເພື່ອເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອຜົນປະໂຫຍດ ລວມຂອງປະຊາຊົນໃນອາຊຽນ ແລະ ສປ ຈີນ ແລະ ໃນໂລກ ບັນດາຜູ້ນໍາອາຊຽນ ແລະ ສປ ຈີນ ໄດ້ຕີລາຄາສູງຕໍ່ໝາກຜົນຂອງການຮ່ວມມືອາຊຽນ-ຈີນ ໃນຕະຫຼອດໄລຍະ 33 ປີທີ່ຜ່ານມາທີ່ກວມເອົາການຮ່ວມມືດ້ານການເມືອງ-ຄວາມໝັ້ນຄົງ ດ້ານເສດຖະກິດ ແລະວັດທະນະທໍາ-ສັງຄົມ ໄດ້ປະ ກອບສ່ວນເຂົ້າໃນຂະບວນການສ້າງປະຊາຄົມອາຊຽນກໍຄືການປົກປັກຮັກສາ ແລະສົ່ງເສີມສັນຕິພາບ ສະຖຽນລະພາບ ແລະ ການຮ່ວມມື ກອງປະຊຸມໄດ້ເນັ້ນຢໍ້າເຖິງຄວາມສໍາຄັນໃນການຮ່ວມມືດ້ານເສດຖະກິດ ນັບແຕ່ປີ 2008 ເປັນຕົ້ນມາ ສປ ຈີນ ໄດ້ເປັນຄູ່ຄ້າທີ່ໃຫຍ່ທີ່ສຸດຂອງອາຊຽນ 15 ປີຊ້ອນ ແລະ ອາຊຽນເອງກໍໄດ້ເປັນຄູ່ຄ້າທີ່ໃຫຍ່ທີ່ສຸດຂອງ ສປ ຈີນ 3 ປີຊ້ອນ ນັບແຕ່ປີ 2020 ເປັນຕົ້ນມາ ໃນໂອກາດກອງປະຊຸມຄັ້ງນີ້ ຜູ້ນໍາອາຊຽນ-ຈີນ ໄດ້ຮ່ວມກັນປະກາດການຍົກລະດັບສັນຍາເຂດການຄ້າເສລີອາຊຽນ-ຈີນ 3.0 ທີ່ເປັນເອກະສານພື້ນຖານທີ່ສໍາຄັນໃນການສົ່ງເສີມ ແລະ ເພີ່ມທະວີການຮ່ວມມືດ້ານເສດຖະກິດອາຊຽນ-ຈີນ.

ໃນກອງປະຊຸມຄັ້ງນີ້ ຜູ້ນຳອາຊຽນ-ຈີນ ໄດ້ຮັບຮອງເອົາ 5 ເອກະສານຜົນຂອງກອງປະຊຸມສຳຄັນຄື: 1). ຖະແຫຼງການຮ່ວມອາຊຽນ-ຈີນ ວ່າດ້ວຍ ການຕ້ານການສໍ້ໂກງດ້ານເຄືອຂ່າຍໂທລະຄົມ ແລະ ການພະນັນອອນລາຍ; 2). ຖະແຫຼງການຮ່ວມອາຊຽນ-ຈີນ ວ່າດ້ວຍ ການຮັດແໜ້ນການຮ່ວມມືດ້ານໄປມາຫາສູ່ລະຫວ່າງປະຊາຊົນກັບປະຊາຊົນ; 3). ຖະແຫຼງການຮ່ວມອາຊຽນ-ຈີນ ວ່າດ້ວຍ ການສົ່ງເສີມການພັດທະນາກະສິກໍາທັນສະໄໝ; 4). ຖະແຫຼງການຮ່ວມອາຊຽນ-ຈີນ ວ່າດ້ວຍ ການຮ່ວມມືເພື່ອອໍາ ນວຍຄວາມສະດວກ ໃນການສ້າງລະບົບນິເວດດີຈີຕອນ ທີ່ກວມລວມ ແລະ ຍືນຍົງ; 5). ຖະແຫຼງການຮ່ວມວ່າດ້ວຍການສະຫຼຸບເນື້ອໃນສໍາຄັນຂອງການເຈລະຈາ ຍົກລະດັບສັນຍາການຄ້າເສລີ ອາຊຽນ-ຈີນ ສະບັບທີ 3.0.

ສຳລັບ ສປ ຈີນ ເປັນຄູ່ເຈລະຈາທີ່ສໍາຄັນໜຶ່ງ ແລະຫ້າວຫັນຂອງອາຊຽນ ການພົວພັນອາຊຽນ-ຈີນ ໄດ້ຮັບການສ້າງຕັ້ງຂຶ້ນ ໃນປີ 1991 ໄດ້ຖືກຍົກລະດັບຂຶ້ນເປັນຄູ່ຮ່ວມຍຸດທະສາດ ໃນປີ 2018 ແລະເປັນຄູ່ຮ່ວມຍຸດທະສາດຮອບດ້ານ ໃນປີ 2021.

ຂ່າວ: ສາວລາວໃຕ້

แชร์