ເຈົ້າແຂວງຈໍາປາສັກ ເຄື່ອນໄຫວຊຸກຍູ້ການບໍລິຫານ ແລະການບໍລິການຢູ່ຕະຫຼາດໃໝ່ປາກເຊ ໃຫ້ດີກວ່າເກົ່າ

ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ, ພ້ອມດ້ວຍການນໍາພະແນກການຂອງແຂວງ, ການນໍານະຄອນປາກເຊ, ຂະແໜງການກ່ຽວຂ້ອງຂອງແຂວງ ແລະ ນະຄອນປາກເຊ ໄດ້ລົງເຄື່ອນໄຫວຕິດຕາມຊຸກຍູ້ກ່ຽວກັບການບໍລິຫານ ແລະການບໍລິການໃນແຕ່ລະດ້ານຢູ່ຕະຫຼາດໃໝ່ປາກເຊ. ໃນໂອກາດລົງເຄື່ອນໄຫວຂອງທ່ານເຈົ້າແຂວງ, ພ້ອມຄະນະໃນຄັ້ງນີ້ແມ່ນໄດ້ຮັບການຕ້ອນຮັບຈາກທ່ານ ສົມພອນ ລາດສິນສະຫງວນ ຮອງອໍານວຍການບໍລິສັດ ບໍລິການ-ການຄ້າ ປາກເຊ ຈໍາກັດ (ຕະຫຼາດໃໝ່ປາກເຊ), ພ້ອມຄະນະ ໂດຍໄດ້ນໍາພາທ່ານເຈົ້າແຂວງຕິດຕາມເບິ່ງຕາມແຕ່ລະຈຸດຕ່າງໆຂອງຕະຫຼາດ ເປັນຕົ້ນ: ຕິດຕາມເບິ່ງບັນຍາກາດການຊື້-ຂາຍ ຕົວຈິງຂອງຜູ້ປະກອບການຄ້າ-ຂາຍ, ຕິດຕາມເບິ່ງຄວາມເປັນລະບຽບ, ການຮັກສາຄວາມສະອາດພາຍໃນຕະຫຼາດ, ການຈັດສັນຄິວລົດໂດຍສານ, ການຈັດສັນບ່ອນຈອດລົດຂອງຜູ້ມາໃຊ້ບໍລິການຢູ່ຕະຫຼາດ. ຈາກນັ້ນກໍໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານແຕ່ລະດ້ານຂອງບໍລິສັດ ບໍລິການ-ການຄ້າ ປາກເຊ ຈໍາກັດ (ຕະຫຼາດໃໝ່ປາກເຊ), ໃນຊຸມປີຜ່ານມາ ເຊິ່ງມີທັງຂໍສະດວກ ແລະຂໍ້ຫຍຸ້ງຍາກທີ່ຈະຕ້ອງໄດ້ສືບຕໍ່ແກ້ໄຂໃຫ້ດີຂຶ້ນ.

ໂອກາດນີ້ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ກໍມີຄໍາເຫັນຊີ້ນໍາຕໍ່ຄະນະອໍານວຍການ ແລະພະນັກງານນໍາພາຂອງບໍລິສັດ ບໍລິການ-ການຄ້າ ປາກເຊ ຈໍາກັດ (ຕະຫຼາດໃໝ່ປາກເຊ), ໂດຍສະແດງຄວາມຊົມເຊີຍຕໍ່ການບໍລິຫານ ແລະ ການບໍລິການຢູ່ຕະຫຼາດໃນໄລຍະຜ່ານມາ, ພ້ອມດຽວກໍມີຄໍາເຫັນເນັ້ນໜັກຕື່ມຕໍ່ການບໍລິຫານ ແລະ ການບໍລິການຢູ່ຕະຫຼາດໃໝ່ປາກເຊ ຄື: ໃຫ້ມີການສຶກສາອົບຮົມພະນັກງານທີ່ເຮັດໜ້າທີ່ບໍລິການພາຍໃນຕະຫຼາດ ດ້ວຍການເພີ່ມທະວີພາລະບົດບາດການເຮັດໜ້າທີ່ດ້ວຍຄວາມຮັບຜິດຊອບສູງຕໍ່ຜູ້ເຂົ້າມາໃຊ້ບໍລິການໃນຕະຫຼາດ, ຮັບຟັງຫາງສຽງຂອງຊາວຄ້າ-ຂາຍ ໃນດ້ານຕ່າງໆເພື່ອນໍາມາພິຈາລະນາແກ້ໄຂ ເປັນຕົ້ນ: ລາຄາຄ່າເຊົ່າ, ບັນຫາຄວາມສະອາດ.

ພ້ອມນີ້ກໍຕ້ອງໄດ້ລົງໃກ້ຊິດກຸ່ມຂົນສົ່ງ, ຊາວຄ້າຂາຍເຄື່ອງແຫ້ງ, ເຄື່ອງສົດ, ການຈັດສັນຄວາມເປັນລະບຽບໂດຍກໍານົດສະຖານທີ່ຈອດລົດ, ກຳນົດບ່ອນຄ້າຂາຍ, ການຮັກສາຄວາມສະອາດ, ຄວາມສວາຍງາມໃນຕະຫຼາດໂດຍເປີດຂະບວນການອະນາໄມລວມ ໃຫ້ຜູ້ປະກອບການຄ້າ-ຂາຍ ມີສ່ວນຮ່ວມແລ້ວມອບຄວາມຮັບຜິດຊອບໃຫ້ເຂົ້າເຈົ້າສືບຕໍ່ຮັກສາຄວາມສະອາດໃນແຕ່ລະວັນ. ແກ້ໄຂເລື່ອງຄົນຂໍທານ, ຄົນເລລ້ອນ ບໍ່ໃຫ້ມີໃນຕະຫຼາດ.

ນອກຈາກນີ້ກໍໃຫ້ຄະນະອໍານວຍການ ແລະ ພະນັກງານນໍາພາຂອງບໍລິສັດ ບໍລິການ-ການຄ້າ ປາກເຊ ຈໍາກັດ (ຕະຫຼາດໃໝ່ປາກເຊ), ເພີມທະວີສຶກສາອົບຮົມການເມືອງແນວຄິດໃຫ້ພະນັກງານບໍລິຫານຕະຫຼາດ, ຊາວຄ້າ-ຂາຍ, ມີການປັບປຸງໜ່ວຍງານບໍລິການຕະຫຼາດໃຫ້ມີຄວາມໂປ່ງໃສ, ເຂັ້ມແຂງ, ເອົາໃຈໃສ່ຍົກສູງການບໍລິຫານ ແລະ ການບໍລິການໃຫ້ດີກ່ວາເກົ່າ, ພ້ອມທັງວາງລະບົບປ້ອງກັນຄວາມປອດໄພຮອບດ້ານພາຍໃນຕະຫຼາດໃຫ້ມີຄວາມຮັບປະກັນ ໃຫ້ໄດ້ 100%,

ເອົາໃຈໃສ່ຍົກສູງສະພາບຄວາມສະອາດໃນຕະຫຼາດ ສະເພາະແມ່ນເຂດຕະຫຼາດສົດ ບໍ່ໃຫ້ມີນໍາຈື້ນ, ມີການປະດັບປະດາດ້ວຍຕົ້ນໄມ້ສົດ, ສຸມໃສ່ແກ້ໄຂການຈອດລົດຕາມແຄມທາງໃຫ້ມີຄວາມເປັນລະບຽບຮຽບຮ້ອຍ,

ຖືສໍາຄັນການຄຸ້ມຄອງສິນຄ້າ ແລະ ລາຄາສິນຄ້າເປັນຕົ້ນ:ການຕັ້ງຕາຊິງ, ການຕິດລາຄາສິນຄ້າ ແລະ ໃຫ້ບໍລິສັດ ຫຼື ຕະຫຼາດໃໝ່ປາກເຊໄດ້ເຂົ້າຮ່ວມຂະບວນການຂອງແຂວງເຊັ່ນ: ມີການຕິດຄໍາຂວັນ, ປະດັບປະດາຕິດທຸງພັກ-ທຸງຊາດ, ທຸງທິວ ເພື່ອສ້າງຂະບວນການປະດັບເອ້ໃສ່ ງານບຸຸນອອກພັນສາ​ ແລະ​ ຊ່ວງເຮືອປະເພນີ​ ປະຈໍາປີ 2024 ທີ່ນະຄອນປາກເຊ​.

ໃນການເຄື່ອນໄຫວຄັ້ງນີ້ທ່ານເຈົ້າແຂວງຈໍາປາສັກ ຍັງໄດ້ແນະນໍາໃຫ້ຜູ້ທີ່ມາຄ້າຂາຍ ແລະ ຜູ້ບໍລິການລົດໂດຍສານ ໃນຕະຫຼາດໃໝ່ປາກເຊ ຊ່ວຍເປັນເຈົ້າການໃນເລື່ອງຂອງການຮັກສາຄວາມສະອາດສວາຍງາມ, ການເຄື່ອນໄຫວດັ່ງກ່າວມີຂຶ້ນໃນວັນທີ 7 ຕຸລາ 2024 ນີ້.
ຂ່າວ-ພາບ: ຈັນທະວີສັກ

แชร์