ສະພາລັດຖະມົນຕີເສດຖະກິດອາຊຽນ ຫາລືຫລາຍບັນຫາສໍາຄັນ

ກອງປະຊຸມສະພາລັດຖະມົນຕີເສດຖະກິດອາຊຽນ ຄັ້ງທີ 24 (24th ASEAN Economic Community Council Meeting) ໄດ້ຈັດຂຶ້ນໃນວັນທີ 7 ຕຸລາ 2024 ທີ່ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ, ສປປ ລາວ, ໃຫ້ກຽດເຂົ້າຮ່ວມມີທ່ານ ພິໄຊ ນະລິບທະພັນ ລັດຖະມົນຕີ ກະຊວງພານິດ, ຣາຊະອານາຈັກໄທ, ມີບັນດາທ່ານລັດຖະມົນຕີສະພາປະຊາຄົມເສດຖະກິດອາຊຽນ, ທ່ານເລຂາທິການໃຫຍ່ອາຊຽນ, ທ່ານລັດຖະມົນຕີກະຊວງເສດຖະກິດ ຕີມໍເລສເຕ, ພ້ອມດ້ວຍທ່ານຫົວໜ້າຄະນະຜູ້ແທນຂອງປະເທດສະມາຊິກອາຊຽນ.

ທ່ານ ມະໄລທອງ ກົມມະສິດ ກ່າວວ່າ: ກອງປະຊຸມຄັ້ງນີ້ ຈັດຂຶ້ນໃນທ່າມກາງທີ່ສະພາບການຂອງໂລກ ແລະພາກພື້ນກໍາລັງຜັນແປໄປຢ່າງສະຫຼັບຊັບຊ້ອນ ໂດຍສະເພາະ ສະພາບເສດຖະກິດ ແລະ ການເງິນ ຂອງພາກພື້ນ ແລະ ສາກົນ ຍັງສືບຕໍ່ປະເຊີນກັບຄວາມບໍ່ໝັ້ນທ່ຽງ, ຕົວເລກການຂະຫຍາຍຕົວທາງດ້ານເສດຖະກິດ ຂອງອາຊຽນ ສະເລ່ຍ ແມ່ນ 4.1% ໃນປີ 2023 ແລະ ຄາດວ່າ ຈະເພີ່ມຂຶ້ນເປັນ 4.6% ໃນປີ 2024; ການລົງທຶນໃນອາຊຽນ ໄດ້ເພີ່ມຂຶ້ນ 0.3% ຈາກ 229 ຕື້ໂດລາ ໃນປີ 2022 ມາເປັນ 230 ຕື້ໂດລາ ໃນປີ 2023. ມູນຄ່າການຄ້າດ້ານສິນຄ້າຂອງອາຊຽນ ໄດ້ຫຼຸດລົງ 1.2% ຈາກ 3,846 ຕື້ໂດລາ ໃນ ປີ 2022 ມາເປັນ 3,525 ຕື້ໂດລາ ໃນປີ 2023 ແລະ ຄາດວ່າ ຈະເພີ່ມຂຶ້ນມາເປັນ 3,617 ຕື້ໂດລາ ໃນປີ 2024 ນີ້.
ກອງປະຊຸມຄັ້ງນີ້ ມີຄວາມໝາຍສໍາຄັນຢ່າງຍິ່ງ ເພືື່ອກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ຈະຈັດຂຶ້ນ ໃນລະຫວ່າງວັນທີ 8-11 ຕຸລາ 2024 ທີ່ ນະຄອນຫຼວງວຽງຈັນ. ກອງປະຊຸມຈະໄດ້ພ້ອມກັນສືບຕໍ່ປຶກສາຫາລື ກ່ຽວກັບ ສະພາບການພັດທະນາເສດຖະກິດໃນພາກພື້ນ ແລະ ສາກົນ, ການຈັດຕັ້ງປະຕິບັດບັນດາແຜນວຽກບູລິມະສິດເສດຖະກິດອາຊຽນ ປີ 2024, ການພັດທະນາເສດຖະກິດແບບຍືນຍົງ ແລະ ການຫັນເປັນດິຈິຕອນໃນອາຊຽນ. ນອກຈາກນັ້ນ, ກອງປະຊຸມ ຈະໄດ້ຮັບຊາບ ແລະ ແລກປ່ຽນທັດສະນະ ກ່ຽວກັບ ການສ້າງແຜນຍຸດທະສາດປະຊາຄົມເສດຖະກິດອາຊຽນ ໄລຍະປີ 2026-2030.

ພ້ອມກັນນັ້ນ, ກອງປະຊຸມຍັງຈະໄດ້ພິຈາລະນາ ແລະຮັບຮອງເອົາບັນດາເອກະສານສໍາຄັນຂອງເສົາຄໍ້າເສດຖະກິດເພື່ອນໍາສະເໜີຕໍ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45. ໃນໂອກາດດັ່ງທ່ານ ມະໄລທອງ ກົມມະສິດ ໃນນາມປະທານກອງປະຊຸມໄດ້ຮຽກຮ້ອງມາຍັງບັນດາທ່ານລັດຖະມົນຕີ ໃຫ້ການສະໜັບສະໜູນ ແລະປະກອບຄໍາເຫັນຢ່າງສ້າງສັນເພື່ອຮັບປະກັນຜົນສໍາເລັດຂອງກອງປະຊຸມໃນຄັ້ງນີ້ .
ຂ່າວ: ສາວລາວໃຕ້

แชร์