ສອງປະທານປະເທດ ລາວ-ຫວຽດນາມ ຮ່ວມພົບປະສອງຝ່າຍ

 

ໂອກາດນີ້, ສອງປະທານປະເທດໄດ້ສະແດງຄວາມດີໃຈທີ່ໄດ້ພົບປະກັນໃນໂອກາດທີ່ເດີນທາງເຂົ້າຮ່ວມກອງປະຊຸມ ສຸດຍອດຝຣັງໂກໂຟນີ ຄັ້ງທີ 19 ຢູ່ນະຄອນຫລວງປາຣີ ປະເທດຝຣັ່ງ ແລະ ໄດ້ຕີລາຄາສູງຕໍ່ໝາກຜົນແຫ່ງການຢ້ຽມຢາມທາງລັດຖະກິດ ທີ່ ສສ ຫວຽດນາມ ຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ກໍຄື ການພົບປະປະຈຳປີລະຫວ່າງສອງກົມການເມືອງຂອງສອງປະເທດ ທີ່ຈັດຂຶ້ນໃນວັນທີ 10-13 ກັນຍາ ຜ່ານມາ. ພ້ອມນີ້, ສອງປະທານປະເທດລາວ-ຫວຽດນາມ ຍັງໄດ້ຕີລາຄາສູງຕໍ່ການເສີມຂະຫຍາຍ ສາຍພົວພັນມິດຕະພາບທີ່ຍິ່ງໃຫຍ່ ແລະ ຄວາສາມັກຄີພິເສດລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ- ຫວຽດນາມ; ໄດ້ເຫັນດີເປັນເອກະພາບມອບໃຫ້ລັດຖະບານກໍຄືບັນດາກະຊວງ, ຂະແໜງການ, ທ້ອງຖິ່ນທີ່ກ່ຽວຂ້ອງຂອງລາວ ແລະຫວຽດນາມ ນໍາໄປຈັດຕັ້ງປະຕິບັດໝາກຜົນຂອງການຢ້ຽມຢາມລັດຖະກິດ ແລະ ເນື້ອໃນຈິດໃຈທີ່ສອງກົມການເມືອງໄດ້ຕົກລົງເປັນເອກະພາບກັນ ໂດຍສະເພາະແມ່ນການຜັນຂະຫຍາຍບັນດາໂຄງການທີ່ສໍາຄັນ ທີ່ໄດ້ຮັບຮອງເອົາແລ້ວນັ້ນໃຫ້ປາກົດຜົນເປັນຈິງ.

ທ່ານ ປະທານປະເທດ ແຫ່ງ ສປປ ລາວ ໄດ້ຕາງໜ້າພັກ, ລັດ, ສະພາແຫ່ງຊາດ, ກອງທັບ ແລະປະຊາຊົນລາວ ໂດຍສະເພາະຜູ້ທີ່ຖືກເຄາະຮ້າຍ ແລະໄດ້ຮັບຜົນກະທົບຈາກໄພນໍ້າຖ້ວມສະແດງຄວາມຂອບໃຈ ແລະ ຮູ້ບຸນຄຸນມາຍັງພັກ, ລັດ, ສະພາແຫ່ງຊາດ, ກອງທັບ ແລະ ປະຊາຊົນ ຫວຽດນາມ ໂດຍສະເພາະທ່ານປະທານປະເທດ ແຫ່ງ ສສ ຫວຽດນາມ ທີ່ໄດ້ສົ່ງໂທລະເລກ ສະແດງຄວາມເຫັນໃຈມາຍັງ ສປປ ລາວ. ພິເສດ, ໄດ້ໃຫ້ການຊ່ວຍເຫລືອເພື່ອຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບໃຫ້ກັບຄືນມາສູ່ສະພາບປົກກະຕິໂດຍໄວ.

ຂ່າວ-ພາບ: ພອນໄຊ

แชร์