ປະທານສະພາແຫ່ງຊາດ ຢ້ຽມຢາມ ແລະເຮັດວຽກ ຢູ່ເມືອງຫາດຊາຍຟອງ

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຫາດຊາຍຟອງ ນະຄອນຫຼວງວຽງຈັນ ເມື່ອວັນທີ 3 ຕຸລາ ຜ່ານມາ, ໂດຍໄດ້ຮັບການຕ້ອນຮັບຈາກທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ມີທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ, ມີການນຳເມືອງ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ບຸນເພັງ ສີນະວົງພອນ ໄດ້ລາຍງານໃຫ້ຊາບໂດຍຫຍໍ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການກະກຽມກອງປະຊຸມໃຫຍ່ຂອງອົງຄະນະພັກເມືອງ ແລະ ແຜນການຟື້ນຟູຫຼັງໄພພິບັດນ້ຳຖ້ວມໃນໄລຍະທີ່ຜ່ານມາ.

ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ມີຄໍາເຫັນໂອ້ລົມວ່າ: ໃນໄລຍະທີ່ປະເທດເຮົາກໍາລັງປະສົບກັບໄພທໍາມະຊາດທີ່ຮ້າຍແຮງທີ່ເກີດຂຶ້ນຢູ່ຫຼາຍແຂວງ ລວມທັງຢູ່ເມືອງຫາດຊາຍຟອງນັ້ນ, ສູນກາງພັກ, ສະພາແຫ່ງຊາດ ກໍຄືອໍານາດການປົກຄອງນະຄອນຫຼວງວຽງຈັນ ໄດ້ມີຄວາມເປັນຫ່ວງເປັນໃຍຫຼາຍຕໍ່ປະຊາຊົນທີ່ປະສົບກັບໄພນໍ້າຖ້ວມ ໂດຍໄດ້ຄົ້ນຄວ້າອອກນິຕິກໍາຕ່າງໆເພື່ອເປັນບ່ອນອີງໃຫ້ບັນດາອົງການຈັດຕັ້ງແຕ່ລະຂັ້ນ ໃນການຈັດຕັ້ງປະຕິບັດ, ແກ້ໄຂບັນຫາໃນສະພາວະສຸກເສີນ; ພ້ອມກັນນັ້ນ, ກໍໄດ້ຄົ້ນຄວ້າດ້ານງົບປະມານ, ວັດຖຸອຸປະກອນ, ເຂົ້າປາອາຫານ, ເຄື່ອງໃຊ້, ຢາປົວພະຍາດ ເພື່ອສົ່ງມາຊ່ວຍອໍານາດການປົກຄອງ ກໍຄືປະຊາຊົນ; ໄດ້ເຕົ້າໂຮມບັນດາອຸປະກອນ, ເຄື່ອງມື, ພາຫະນະ ທີ່ນໍາໃຊ້ເຂົ້າໃນການຕ້ານໄພນໍ້າຖ້ວມ ເພື່ອສະກັດກັ້ນບັນຫານໍ້າຖ້ວມໃຫ້ສົ່ງຜົນກະທົບຕໍ່ປະຊາຊົນໜ້ອຍທີ່ສຸດ. ຈາກຄວາມພະຍາຍາມຂອງທຸກພາກສ່ວນ ເຮັດໃຫ້ການແກ້ໄຂບັນຫາໄພນໍ້າຖ້ວມ ໄດ້ຮັບຜົນສໍາເລັດ, ລະດັບນໍ້າຫຼຸດລົງເປັນກ້າວໆ. ການແກ້ໄຂບັນຫາໄພນໍ້າຖ້ວມມາຮອດປັດຈຸບັນ ໄດ້ກັບຄືນສູ່ສະພາບປົກກະຕິແລ້ວ, ແຕ່ກໍຍັງມີບາງວຽກງານທີ່ຈະຕ້ອງໄດ້ສືບຕໍ່ຊ່ວຍເຫຼືອປະຊາຊົນຈຶ່ງສະເໜີໃຫ້ອໍາການປົກຄອງນະຄອນຫຼວງວຽງຈັນ ແລະເມືອງຫາດຊາຍຟອງ ປຸກລະດົມກໍາລັງແຮງຂອງພະນັກງານ, ທະຫານ, ຕໍາຫຼວດ, ນັກຮຽນ-ນັກສຶກສາ, ປະຊາຊົນທຸກທົ່ວໜ້າ ໃນການປົວແປງເຮືອນຊານ, ສໍານັກງານອົງການ, ໂຮງຮຽນ, ໂຮງໝໍ ທີ່ຖືກນໍ້າຖ້ວມ ດ້ວຍການເຮັດອະນາໄມ, ປັບປຸງບ່ອນເປ່ເພ ໃຫ້ກັບຄືນສູ່ສະພາບປົກກະຕິ ແລະ ສາມາດນໍາໃຊ້ໄດ້ໂດຍໄວ; ເກັບກໍາຂໍ້ມູນຄວາມເສຍຫາຍໃນດ້ານຕ່າງໆ ເປັນຕົ້ນລະບົບຊົນລະປະທານ, ເນື້ອທີ່ເຮັດການຜະລິດກະສິກໍາ, ສັດລ້ຽງ ແລະ ອື່ນໆ ເພື່ອຄົ້ນຄວ້າມາດຕະການຊ່ວຍເຫຼືອປະຊາຊົນທີ່ຖືກຜົນກະທົບຈາກໄພນໍ້າຖ້ວມທັນເວລາ ແລະ ທັນລະດູການຜະລິດ; ເກັບກໍາຂໍ້ມູນຄວາມເສຍຫາຍດ້ານຖະໜົນຫົນທາງ, ລະບົບສາຍສົ່ງໄຟຟ້າ, ລະບົບໂທລະຄົມມະນາຄົມ ເພື່ອຮີບຮ້ອນປັບປຸງ, ແກ້ໄຂ ບໍ່ໃຫ້ປະຊາຊົນຖືກຕັດຂາດຈາກສິ່ງອໍານວຍຄວາມສະດວກທີ່ຈໍາເປັນພື້ນຖານໃນການດໍາລົງຊີວິດເປັນເວລາດົນນານ; ຈັດຕັ້ງໜ່ວຍງານແພດໝໍ ເປັນສູນລວມເຝົ້າລະວັງ ແລະ ຕິດຕາມສຸຂະພາບຂອງປະຊາຊົນໃຫ້ດີ, ວາງແຜນການກວດກາສຸຂະພາບ, ການສະໜອງຢາປິ່ນປົວພະຍາດປະເພດຕ່າງໆໃຫ້ທັນເວລາ.

ໃນການເຄື່ອນໄຫວຢ້ຽມຢາມ ແລະເຮັດວຽກຄັ້ງນີ້, ສະພາແຫ່ງຊາດໄດ້ມອບເງິນຊ່ວຍເຫຼືອໃຫ້ແກ່ເມືອງຫາດຊາຍຟອງ ຈຳນວນ 200 ລ້ານກີບ ເພື່ອຊຸກຍູ້ເຂົ້າໃນວຽກງານຟື້ນຟູສະພາບຫຼັງໄພພິບັດນໍ້າຖ້ວມ ພ້ອມທັງໄປເບິ່ງຄອງລະບາຍນ້ຳປາກຫ້ວຍເດື່ອຢູ່ເຂດຊາຍແດນລະຫວ່າງບ້ານນາໄຮ່-ສີຖານໃຕ້ ແລະ ເຂດກະສິກຳປູກພືດຜັກຢູ່ທາງລົງບ້ານດອນເກີດ ອີກດ້ວຍ.
ຂ່າວ: ສະພາແຫ່ງຊາດ

• 07/10/2024