ເຊັນສັນຍາວ່າຈ້າງທີ່ປຶກສາຄວບຄຸມການກໍ່ສ້າງ ແລະບໍລິສັດຮັບເໝົາກໍ່ສ້າງໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ ເມືອງໄຊພູທອງ

​ໃນວັນທີ 4 ຕຸລາ 2024 ທີ່ຫ້ອງປະຊຸມພະແນກໂຍທາທິການ ແລະ ຂົນສົ່ງ (ຍທຂ) ໄດ້ຈັດພິທີເຊັນສັນຍາວ່າຈ້າງທີ່ປຶກສາຄວບຄຸມການກໍ່ສ້າງ ແລະບໍລິສັດຮັບເໝົາກໍ່ສ້າງໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ (ໄລຍະ 1 ແລະໄລຍະ 2) ບ້ານຄັນທ່າຈານ ເມືອງໄຊພູທອງ ແຂວງສະຫວັນນະເຂດຂຶ້ນຢ່າງເປັນທາງການ ໂດຍການເຂົ້າຮ່ວມລົງນາມໃນພິທີຄັ້ງນີ້ມີທ່ານ ຄຳຜອງ ສົມວິຈິດ ຫົວໜ້າພະແນກ ຍຂທ ແຂວງ, ທ່ານ ແກ້ວປະເສີດ ສຸລິນພູມີ ຮອງຫົວໜ້າພະແນກແຜນການ ແລະ ການລົງທຶນແຂວງ ພ້ອມດ້ວຍປະທານບໍລິສັດທີ່ປຶກສາຄວບຄຸມການກໍ່ສ້າງ (ບໍລິສັດເຄຊີຄອນຊາວຕິງຄອຣ໌ບຈຳກັດຜູ້ດຽວ) ແລະ ປະທານບໍລິສັດຮັບເໝົາກໍ່ສ້າງໂຄງການທັງສອງໄລຍະ(ບໍລິສັດຊາດຈະເລີນຈຳກັດຜູ້ດຽວ ແລະບໍລິສັດເອັສຊີກໍ່ສ້າງຈຳກັດຜູ້ດຽວ). ເຊິ່ງມີຄະນະກຳມະການຈັດຊື້-ຈັດຈ້າງໂຄງການລົງທຶນຂອງລັດປີ 2024 (ວຽກຂະແໜງທາງນໍ້າ) ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມເປັນສັກຂີພະຍານໃນພິທີຄັ້ງນີ້.

​ທ່ານ ສຸກສະຫງວນ ໄຊຍະວົງ ຫົວໜ້າຂະແໜງທາງນໍ້າ, ພະແນກ ຍທຂ ແຂວງ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ (ໄລຍະ 1 ແລະໄລຍະ 2) ບ້ານຄັນທ່າຈານ ເມືອງໄຊພູທອງ ແຂວງສະຫວັນນະເຂດ ໄດ້ຮັບອະນຸມັດຕາມແຜນການລົງທຶນຂອງລັດຄັ້ງທີ III ປີ 2024 ຕາມແຈ້ງການຂອງພະແນກແຜນການ ແລະການລົງທຶນແຂວງ ເລກທີ 1991/ພຜທ.ສຂ, ລົງວັນທີ 2/7/2024 ເຊິ່ງມີມູນຄ່າໂຄງການທີ່ອະນຸມັດດັ່ງນີ້: 1. ໂຄງການກໍ່ສ້າງປ້ອງກັນຕາຝັ່ງເຈື່ອນດອນຖ້ຳເງິນ ໄລຍະ 1 ມູນຄ່າທັງໝົດ 46.56 ຕື້ກວ່າກີບ ໃນນີ້: ມູນຄ່າກໍ່ສ້າງ 45 ຕື້ກວ່າກີບ, ມູນຄ່າທີ່ປຶກສາ 1.08 ຕື້ກວ່າກີບ, ມູນຄ່າຄຸ້ມຄອງ 484 ລ້ານກວ່າກີບ ແລະ2. ໂຄງການກໍ່ສ້າງປ້ອງກັນຕາຝັ່ງເຈື່ອນດອນຖ້ຳເງິນ ໄລຍະທີ 2 ມີມູນຄ່າທັງໝົດ 43.53 ຕື້ກວ່າກີບ ໃນນີ້: ມູນຄ່າກໍ່ສ້າງ 42 ຕື້ກວ່າກີບ, ມູນຄ່າທີ່ປຶກສາ 1.04 ຕື້ກວ່າກີບ ແລະມູນຄ່າຄຸ້ມຄອງ 486 ລ້ານກວ່າກີບ. ໃນການຈັດຕັ້ງປະຕິບັດໂຄງການດັ່ງກ່າວ ໄດ້ດຳເນີນໄປຕາມຂັ້ນຕອນ ແລະສອດຄ່ອງກັບກົດໝາຍການລົງທຶນຂອງລັດເປັນຕົ້ນແມ່ນ: ໃນຄັ້ງວັນທີ 8 ສິງຫາ 2024 ໄດ້ດໍາເນີນການປະມູນຈັດຊື້-ຈັດຈ້າງເອົາບໍລິສັດທີ່ປຶກສາຄວບຄຸມການກໍ່ສ້າງດ້ວຍການປະມູນເປີດກວ້າງ ແລະໃນຄັ້ງວັນທີ 16 ສິງຫາ 2024 ໄດ້ໄດ້ດໍາເນີນການປະມູນຈັດຊື້-ຈັດຈ້າງເອົາບໍລິສັດຮັບເໝົາກໍ່ສ້າງ ດ້ວຍການປະມູນເປີດກວ້າງເຊັ່ນດຽວກັນ, ພາຍຫຼັງສຳເລັດການປະມູນແລ້ວ, ພະແນກ ຍທຂ ໃນນາມເຈົ້າຂອງໂຄງການໄດ້ເຮັດບົດລາຍງານສະເໜີທ່ານເຈົ້າແຂວງເພື່ອຮັບຮອງຜົນການປະມູນ ແລະ ອະນຸຍາດເຊັນສັນຍາ ກັບບໍລິສັດຮັບເໝົາກໍ່ສ້າງ ແລະ ບໍລິສັດທີ່ປຶກສາຄວບຄຸມການກໍ່ສ້າງ ມີລາຍລະອຽດດັ່ງນີ້: ວຽກທີ່ປຶກສາໂຄງການກໍ່ສ້າງ ເຫັນດີຮັບຮອງເອົາບໍລິສັດເຄຊີຄອນຊາວຕິງຄອຣ໌ບຈຳກັັດຜູ້ດຽວ ເປັນທີ່ປຶກສາຄວບຄຸມການກໍ່ສ້າງໂຄງການປ້ອງກັນຕາຝັ່ງເຈື່ອນດອນຖໍ້າເງິນ(ໄລຍະ 1 ແລະໄລຍະ 2) ແລະອະນຸມັດເຊັນສັນຍາໂຄງການໃນມູນຄ່າ 1.08 ຕື້ກວ່າກີບ ແລະ1.04 ຕື້ກວ່າກີບຕາມລໍາດັບ ແລະວຽກໂຄງການກໍ່ສ້າງ ໄດ້ເຫັນດີຮັບຮອງເອົາບໍລິສັດຊາດຈະເລີນຈຳກັດຜູ້ດຽວ ເປັນຜູ້ຊະນະການປະມູນໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ ໄລຍະ 1 ໃນມູນຄ່າ 45 ຕື້ກວ່າກີບ ແລະເຫັນດີຮັບຮອງເອົາບໍລິສັດເອັສຊີກໍ່ສ້າງຈຳກັດຜູ້ດຽວ ເປັນຜູ້ຊະນະການປະມູນໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ ໄລຍະ 2 ໃນມູນຄ່າ 42 ຕື້ກວ່າກີບ.

​ຈາກນັ້ນ, ໃນພິທີ ກໍ່ໄດ້ມີການລົງນາມໃນສັນຍາວ່າຈ້າງທີ່ປຶກສາຄວບຄຸມການກໍ່ສ້າງ ແລະ ບໍລິສັດຮັບເໝົາກໍ່ສ້າງໂຄງການກໍ່ສ້າງປ້ອງກັນຕາຝັ່ງເຈື່ອນດອນຖໍ້າເງິນ (ໄລຍະ 1 ແລະໄລຍະ 2) ຢ່າງເປັນທາງການ./.

แชร์