ນັກທຸລະກິດໜຸ່ມບໍລິຄໍາໄຊ ຂໍໃຫ້ທຸກຄົນກ້າຕັດສິນໃຈ-ປ່ຽນແປງ ເພື່ອປ່ຽນວິກິດນີ້ໃຫ້ເປັນໂອກາດ

ກ້າຕັດສິນໃຈ ກ້າເຮັດ ກ້າສ້າງ ແລະກ້າປ່ຽນແປງ ເຖິງຈະບໍ່ສໍາເລັດໃນຄັ້ງແລກແຕ່ເຊື່ອບໍ່ວ່າທຸກວິກິດຍ່ອມມີໂອກາດສະເໝີຄໍາເວົ້າຂອງປະທານສະມາຄົມໜຸ່ມແຂວງບໍລິຄໍາໄຊ ຝາກເຖິງລຸ້ນນ້ອງນັກທຸລະກິດສາຍເລືອດໃຫມ່ທີ່ພ້ອມຈະສາຍແວວ.

ທ່ານ ຄອນສະຫວັນ ສອນຄໍາໄຊ ປະທານສະມາຄົມນັກທຸລະກິດໜຸ່ມແຂວງບໍລິຄໍາໄຊ, ປະທານບໍລິສັດ ບີເອັມ ການຄ້າຂາອອກ – ຂາເຂົ້າ ຈໍາກັດຜູ້ດຽວ ໄດ້ໃຫ້ສຳພາດຕໍ່ສື່ມວນຊົນເນື່ອງໃນໂອກາດທີ່ໄດ້ຮັບລາງວັນນັກທຸລະກິດໜຸ່ມດີເດັ່ນອາຊຽນ 2024 ເຊິ່ງເປັນຄວາມພາກພູມໃຈຫລາຍ ເປັນນິມິດຫມາຍແຫ່ງຄວາມສຳເລັດ ແລະ ເພີ່ມແຮງບັນດານໃຈໃຫ້ຍິ່ງຕ້ອງສູ້ຊົນດໍາເນີນທຸລະກິດຕິດພັນກັບການພັດທະນາຊ່ວຍເຫລືອສັງຄົມ.

" ພວກເຮົາກໍຈະສືບຕໍ່ໃນການດຶງດູດການລົງທຶນ ສ້າງສາພັດທະນາ ຂະແໜງທຸລະກິດພາຍໃນແຂວງບໍລິຄໍາໄຊ ກໍຄືດຶງດູດການລົງທຶນສູ່ປະເທດລາວເຮົາ,​ ເປັນການດຶງດູດລາຍຮັບ ເຂົ້າໃນແຂວງ ກໍຄືການພັດທະນາຂອງປະເທດ ເຊິ່ງທຸລະກິດຂອງຂ້າພະເຈົ້າແມ່ນການນໍາເຂົ້າ ນໍ້າມັນ, ນໍາເຂົ້າພາຫະນະ, ເຄື່ອງອາໄຫຼ່ ພ້ອມດຽວກັນນັ້ນ ກໍສົ່ງເສີມການສົ່ງອອກ ສິນຄ້າກະສິກໍາ ແລະ ອໍານວຍຄວາມສະດວກ ໃຫ້ພາກທຸລະກິດ ໃນການນໍາເຂົ້າ - ສົ່ງອອກອີກດ້ວຍ".

ທ່ານກ່າວອີກວ່າ: ການໄດ້ຮັບລາງວັນຄັ້ງນີ້ ກໍຖືວ່າເປັນສິ່ງຢັ້ງຢືນຜົນງານຜ່ານມາໃນການດໍາເນີນທຸລະກິດເນື່ອງຈາກວ່າ ເຮົາຕ້ອງໄດ້ຕາມມາດຖານເງື່ອນໄຂຕາມລະບຽບຂອງຄະນະກໍາມະການຈັດງານ ສະນັ້ນຂ້າພະເຈົ້າກໍຝາກຜົນງານນີ້ໄວ້ເປັນ ບົດຮຽນເພື່ອໃຫ້ຄົນລຸ້ນຫຼັງ, ນັກທຸລະກິດໜຸ່ມນ້ອຍໄດ້ຖອດຖອນໝູນໃຊ້ຕໍ່ໄປ.

ປັດຈຸບັນສະມາຄົມນັກທຸລະກິດຫນຸ່ມແຂວງບໍລິຄຳໄຊ ແລະ​ ໃນນາມສ່ວນຕົວໄດ້ມີການພົວພັນຮ່ວມມື ກັບນັກທຸລະກິດຫລາຍປະເທດເຊັ່ນ: ສປ ຈີນ, ສສ ຫວຽດນາມ, ອິນໂດເນເຊຍ, ສິງກະໂປ,​ ມາເລເຊຍ...​

ແນວໃດກໍດີ ທ່ານຍັງຝາກເຖິງສັງຄົມ ເຖິງວ່າເສດຖະກິດກໍາລັງປະເຊີນກັບຂໍ້ຫຍຸງຍາກຫຼາຍ ຂໍເປັນກໍາລັງໃຈໃຫ່້ພໍ່ແມ່ປະຊາຊົນ ຈົ່ງມີຄວາມອົດທົນດູໝັ່ນ ແລະ ຊອກຮູ້ຢູ່ສະເໝີ ເພື່ອປ່ຽນແປງ ເພື່ອສ້າງວິກິດໃຫ້ເປັນໂອກາດ. ໃຫ້ຄິດວ່າປະເທດອື່ນ ຫຼື ພາກພື້ນອື່ນ ກໍປະເຊີນກັບວິກິດ ແລະ ສະພາບຄວາມຫຍຸ້ງຍາກເຊັ່ນກັນ ເຊິ່ງອາດຈະຫຼາຍກວ່າເຮົາ ແຕ່ເຂົາເຈົ້າກໍຍັງຜ່ານຜ່າໄປໄດ້ ສະນັ້ນ ຂ້າພະເຈົ້າ ເຊື່ອວ່າປະເທດລາວເຮົາ ຍັງມີທ່າແຮງຫຼາຍ ທີ່ຈະເຮັດໃຫ້ຜູ້ປະກອບການ ຄົນລຸ້ນໃໝ່ ກ້າຕັດສິນໃຈ ແລະ ກ້າປ່ຽນແປງ ເພື່ອປ່ຽນວິກິດໃຫ້ເປັນໂອກາດ ຝາກເຖິງລຸ້ນນ້ອງ ຫຼື ລຸ້ນອ້າຍ ຫຼື ພາກສ່ວນອື່ນໆ ຂໍໃຫ້ພວກທ່ານເຮັດເພື່ອສັງຄົມ ເພື່ອຊີວິດຄອບຄົວ ແນ່ນອນວ່າຍຸກສະໄໝມັນປ່ຽນໄປໄວຫຼາຍ ຖ້າເບິ່ງເຫັນໂອກາດ ເຊື່ອວ່າຈະໄປໄວ ແລະ ໄກກວ່າລຸ້ນຂ້າພະເຈົ້າອີກ,​ ທ່ານ ຄອນສະຫວັນ ກ່າວ.

ຂ່າວ ເສດຖະກິດການຄ້າ

แชร์