ກອງປະຊຸມສະພາບໍລິຫານ ທຫລ ຄັ້ງທີ II ຄົ້ນຄວ້າ 4 ຮ່າງເອກະສານສໍາຄັນ

ກອງປະຊຸມສະພາບໍລິຫານ ທະນາຄານແຫ່ງ ສປປ ລາວ ຄັ້ງທີ II ປະຈຳປີ 2024 ໄດ້ຈັດຂຶ້ນໃນວັນທີ 2 ຕຸລາ 2024 ນີ້ ທີ່ ທຫລ, ເພື່ອສະຫຼຸບ-ຕີລາຄາໝາກຜົນຂອງການຈັດຕັ້ງປະຕິບັດແຜນເງິນຕາ ກໍ່ຄື ການເຄື່ອນໄຫວວຽກງານພົ້ນເດັ່ນຂອງຂະແໜງທະນາຄານໃນໄລຍະ 9 ເດືອນຕົ້ນ ປີ 2024 ຜ່ານມາ, ພ້ອມທັງ ຄົ້ນຄວ້າເພື່ອກຳນົດທິດທາງແຜນການ 3 ເດືອນທ້າຍປີ 2024 ແລະ ຜ່ານເອກະສານສຳຄັນທີ່ຕິດພັນກັບວຽກງານຂອງຂະແໜງທະນາຄານ ຈຳນວນໜຶ່ງ.

ທ່ານນາງ ວັດທະນາ ດາລາລອຍ ປະທານສະພາບໍລິຫານທະນາຄານແຫ່ງ ສປປ ລາວ, ຮັກສາການຜູ້ວ່າການທະນາຄານແຫ່ງ ສປປ ລາວ ກ່າວວ່າ: ນັບຕັ້ງແຕ່ກອງປະຊຸມສະພາບໍລິຫານທະນາຄານແຫ່ງ ສປປ ລາວ ຄັ້ງທີ I ທີ່ຜ່ານມາ, ສະພາບເສດຖະກິດ-ການເງິນ ຂອງປະເທດເຮົາ ຍັງສືບຕໍ່ມີຄວາມທ້າທາຍຫຼາຍດ້ານ, ຕໍ່ສະພາບດັ່ງກ່າວ ທຫລ ໄດ້ສຸມທຸກກຳລັງແຮງເຂົ້າໃນການຄຸ້ມຄອງ ເພື່ອຮັກສາສະຖຽນລະພາບເງິນຕາແຫ່ງຊາດ ເປັນຕົ້ນ: ໄດ້ທົບທວນດັດປັບຄົ້ນຄວ້າພັດທະນາເຄື່ອງມືນະໂຍບາຍເງິນຕາໃຫ້ມີປະສິດທິພາບ ຊີ້ນຳຕະຫຼາດໄດ້ໂດຍປັບຂຶ້ນອັດຕາດອກເບ້ຍພື້ນຖານ ຂອງ ທຫລ ສະກຸນເງິນກີບ ໄລຍະບໍ່ເກີນ 7ວັນ 3ຄັ້ງ; ໄດ້ສືບຕໍ່ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດ ທີ່ມີການຄຸ້ມຄອງຂອງລັດ, ໂດຍຮັກສາກອບການກໍານົດອັດຕາແລກປ່ຽນອ້າງອີງ ໃຫ້ແກ່ທະນາຄານທຸລະກິດປະຕິບັດທີ່ລະດັບ ±7.5%; ໄດ້ສຸມໃສ່ຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ, ສະບັບເລກທີ 15/ສພຊ,ລົງວັນທີ7 ກໍລະກົດ 2022 ແລະ ຄໍາສັ່ງເລກທີ 10/ນຍ, ລົງວັນທີ 14 ກໍລະກົດ 2023; ພ້ອມທັງໄດ້ສ້າງກົນໄກການປະສານຮ່ວມມືກັບຫຼາຍຂະແໜງການທີ່ກ່ຽວຂ້ອງ ເພື່ອປຶກສາຫາລືວຽກງານທີ່ຕິດພັນກັບນະໂຍບາຍມະຫາພາກເສດຖະກິດ-ການເງິນ, ການຄ້າ, ການປະຕິບັດລະບຽບກົດໝາຍ ແລະ ແລກປ່ຽນຂໍ້ມູນຂ່າວສານທີ່ຈໍາເປັນໃນການປະສານສົມທົບ ແລະ ການຈັດຕັ້ງປະຕິລັດວຽກງານລະຫວ່າງຂະແໜງການໃຫ້ມີປະສິດທິພາບ.


ຈາກການຈັດຕັ້ງປະຕິບັດຄືດັ່ງກ່າວ ເຮັດໃຫ້ຜົນໄດ້ຮັບມີທ່າອ່ຽງຕັ້ງໜ້າດີຂຶ້ນເຊັ່ນ: ອັດຕາເງິນເຟີ້ຄ່ອຍໆປັບຕົວຫຼຸດລົງ ຄື:ໃນເດືອນ 9 ປີ 2024 ຫຼຸດລົງມາຢູ່ໃນລະດັບ 21.7%ຈາກ 24.3% ໃນເດືອນ 8/2024 ອັດຕາແລກປ່ຽນເລີ່ມມີຄວາມສະຫງົບ ແລະ ເໜັງຕີງໃນທິດທາງທີ່ແຂງຄ່າຂຶ້ນ.

ຢ່າງໃດກໍ່ຕາມ, ເຖິງວ່າຈະມີຜົນໄດ້ຮັບທີ່ຕັ້ງໜ້າດີຂຶ້ນແຕ່ເຫັນວ່າ ຍັງບໍ່ທັນສາມາດແກ້ໄຂບັນຫາເຄັ່ງຮ້ອນທີ່ມີຢູ່ໃນປັດຈຸບັນໃຫ້ຂາດຕົວໝົດໄປໄດ້ ແລະ ຍັງບໍ່ທັນບັນລຸທຸກຄາດໝາຍເງິນຕາ ທີ່ສະພາແຫ່ງຊາດກຳນົດໄວ້. ສະນັ້ນ, ເພື່ອສືບຕໍ່ໜ້າທີ່ການເມືອງຂອງຂະແໜງທະນາຄານ, ກອງປະຊຸມໃນຄັ້ງນີ້ຈະໄດ້ຮັບຟັງ ແລະຮ່ວມກັນຄົ້ນຄວ້າປະກອບຄໍາເຫັນໃສ່ 4 ຮ່າງເອກະສານສໍາຄັນຄື: 1) ການຈັດຕັ້ງປະຕິບັດແຜນເງິນຕາ ແລະການເຄື່ອນໄຫວວຽກງານພົ້ນເດັ່ນຂອງ ທຫລ ປະຈຳ 9 ເດືອນຕົ້ນປີ 2024 ແລະ ທິດທາງແຜນການ3 ເດືອນທ້າຍປີ 2024; 2)ການຈັດຕັ້ງປະຕິບັດແຜນງົບປະມານລາຍຮັບ-ລາຍຈ່າຍຂອງ ທຫລ ປະຈຳ 9 ເດືອນຕົ້ນປີ 2024 ແລະຄາດຄະເນປະຕິບັດ3 ເດືອນທ້າຍປີ 2024; 3) ການຕັດສິນຄະດີຂອງທະນາຄານລາວກໍ່ສ້າງ ຈຳກັດ ແລະການແກ້ໄຂບັນຫາຂອງສະຖາບັນການເງິນທີ່ບໍ່ແມ່ນທະນາຄານ ທີ່ມີຄວາມອ່ອນແອ; 4) ການເຄື່ອນໄຫວວຽກງານພົ້ນເດັ່ນຂອງຄະນະກຳມະການກວດກາ ປະຈຳໄຕມາດ1 ແລະ 2ປີ 2024 ແລະທິດທາງແຜນການໃນໄຕມາດ 3 ປີ 2024.

ໂອກາດດັ່ງກ່າວ ທ່ານນາງ ວັດທະນາ ດາລາລອຍ ໄດ້ຮຽກຮ້ອງມາຍັງບັນດາທ່ານສະມາຊິກສະພາບໍລິຫານ ແລະ ຜູ້ແທນກອງປະຊຸມທັງໝົດຈົ່ງສຸມໃສ່ຄົ້ນຄວ້າປະກອບຄໍາຄິດ-ຄໍາເຫັນໃສ່ເນື້ອໃນເອກະສານຢ່າງເລິກເຊິ່ງ ແລະ ກົງໄປກົງມາ ເພື່ອເຮັດໃຫ້ແຕ່ລະບັນຫາທີ່ຍົກຂຶ້ນມາປຶກສາຫາລືກັນນັ້ນມີວິທີທາງອອກທີ່ເໝາະສົມ ແລະ ສາມາດນໍາໄປຈັດຕັ້ງປະຕິບັດຕົວຈິງຢ່າງເປັນຮູບປະທຳ.

แชร์