ໂຄງການນໍ້າໃຈມິດຕະພາບ-ລາວໄທ ຊ່ວຍເຫຼືອໄພພິບັດນໍ້າຖ້ວມ 2024

ໂຄງການນໍ້າໃຈມິດຕະພາບ-ລາວໄທ ຊ່ວຍເຫຼືອໄພພິບັດນໍ້າຖ້ວມ 2024 ຢູ່ ສປປ ລາວ ໄດ້ມອບຢາປົວພະຍາດ, ຖົງບັນເທົາທຸກ ແລະ ເຄື່ອງບໍລິໂພກ ມາມອບໃຫ້ກະຊວງແຮງງານ ແລະ ສະຫວັດດີການສັງຄົມ (ຮສສ) ໃນວັນທີ 2 ຕຸລານີ້ ທີ່ ກະຊວງ ຮສສ ລວມມູນຄ່າ 5,200,000 ບາດ (ສະກຸນເງິນໄທ), ໃນນີ້ມີຢາປົວພະຍາດ 520 ແກັດ, ຖົງບັນເທົາທຸກ 368 ຖົງ, ນໍ້າດື່ມ 420 ແພັກ, ເຂົ້າສານເປົານ້ອຍ 5 ເປົາ-ເປົາໃຫຍ່ 5 ເປົາ ໃຫ້ກຽດກ່າວມອບໂດຍ ທ່ານ ພິພັດພົນ ສາຣະໂນທະຍານ ເປັນຜູ້ກໍ່ຕັ້ງ ແລະ ສະໜັບສະໜູນໂຄງການ ທັງເປັນປະທານບໍລິສັດປະທະມາວັດປີໂຕຣລຽນລາວ ໃຫ້ກຽດກ່າວຮັບໂດຍ ທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ ທັງເປັນຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ.

ໂອກາດນີ້, ທ່ານນາງ ໃບຄຳ ຂັດທິຍະ ໄດ້ກ່າວວ່າ: ເຄື່ອງທີ່ນໍາມາມອບໃນຄັ້ງນີ້, ສຳລັບຢາປົວພະຍາດມອບໃຫ້ກະຊວງສາທາລະນະສຸກເປັນຜູ້ຈັດສົ່ງແຈກຢາຍໃຫ້ບັນດາແຂວງທີ່ຖືກຜົນກະທົບຈາກໄພພິບັດໃນທົ່ວປະທດ. ພ້ອມທັງກ່າວສະແດງຂອບໃຈຕໍ່ໂຄງການນໍ້າໃຈມິດຕະພາບ-ລາວໄທ ພ້ອມດ້ວຍຄະນະທີ່ໄດ້ມີນໍ້າໃຈຊ່ວຍເຫຼືອໄພພິບັດໃນຄັ້ງນີ້, ພ້ອມທັງໃຫ້ຄໍາໝັ້ນສັນຍາວ່າຈະນໍາເອົາເຄື່ອງຈໍານວນດັ່ງກ່າວໄປໝູນໃຊ້ເຂົ້າໃນວຽກງານຊ່ວຍເຫຼືອຜູ້ປະສົບໄພນໍ້າຖ້ວມຢູ່ບັນດາແຂວງທົ່ວປະເທດໃຫ້ເກີດປະໂຫຍດສູງສຸດ.
(ຂ່າວ: ຮສສ)

แชร์