ໂຮງງານອຸດສາຫະກຳໂຕໂຢລາວ ໄດ້ຮັບລາງວັນຄຸນນະພາບແຫ່ງຊາດລາວ

ຈາກຄວາມເອົາໃຈໃສ່ໃນການມຸ້ງໝັ່ນຜະລິດສິນຄ້າທີ່ໄດ້ຮັບມາດຖານກາຍເປັນທີ່ຍ້ອມຮັບສັງຄົມທາງກົມມາດຕະຖານ ແລະວັດແທກ ກະຊວງອຸດສາຫະກຳ ແລະ ການຄ້າ ໄດ້ມອບລາງວັນຄຸນນະພາບແຫ່ງຊາດ Lao Quality Award 2024 ໃຫ້ກັບໂຮງງານອຸດສາຫະກຳໂຕໂຢລາວ ທີ່ຄັດເລືອກຈາກ 100 ກວ່າບໍລິສັດແຖວໜ້າຂອງປະເທດ. ມຸ້ງໝັ້ນຜະລິດສິນຄ້າອອກມາໃຫ້ໄດ້ມາດຕະຖານຄືຫົວໃຈຫຼັກໃນຍຸກແຂ່ງຂັນ.

ທ່ານ ລັງກອນ ໄຊຍະວົງ ປະທານ ແລະຜູ້ສ້າງຕັ້ງ ໂຮງງານອຸດສາຫະກໍາໂຕໂຢລາວ ໄດ້ກ່າວວ່າ: ຂ້າພະເຈົ້າມີຄວາມພາກພູມໃຈເປັນຢ່າງຍິ່ງທີ່ໄດ້ນໍາສິນຄ້າ ມາວາງສະແດງໃນງານ ຜະລິດຕະພັນລາວ Made in Laos 2024 ເນື່ອງໃນໂອກາດນີ້ ກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ ກໍໄດ້ມີກິດຈະກໍາຄັດເລືອກຜູ້ຜະລິດພາຍໃນປະເທດລາວເຮົາ ໂດຍສະເພາະໂຮງງານທີ່ໄດ້ ລາງວັນຄຸນນະພາບ ແຫ່ງຊາດ (Laos Quality Award 2024) ເຊິ່ງໃນນັ້ນ ມີໂຮງງານອຸດສາຫະກໍາໂຕໂຢລາວ ທີ່ໄດ້ລາງວັນ ຄຸນນະພາບ ແຫ່ງຊາດ ເຊິ່ງມີຄວາມໝາຍທີ່ດີ ແລະ ເປັນກຽດທີ່ສູງສົ່ງ ໃຫ້ແກ່ຂ້າພະເຈົ້າກໍຄືທີມງານບໍລິຫານ ແລະ ພະນັກງານໂຮງງານອຸດສາຫະກໍາໂຕໂຢລາວ ທີ່ໄດ້ທຸ້ມເທ ສະຕິປັນຍາ ແລະ ຄວາມພະຍາຍາມ ຮັກສາມາດຖານການຜະລິດກໍຄືຄຸນນະພາບ ຂອງຜະລິດຕະພັນທໍ່ນໍ້າໂຕໂຢ ນັບແຕ່ເລີ່ມການຜະລິດປີ 2016 ຈົນຮອດ 2024.

ທ່ານກ່າວວ່າ: ຜະລິດຕະພັນໂຮງງານອຸດສາຫະກໍາໂຕໂຢລາວມີຈຸດເດັ່ນຫຼາຍຢ່າງເຊິ່ງເປັນໂຮງງານທີ່ສ້າງໃໝ່ຖ້າທຽບໃສ່ບັນດາປະເທດອ້ອມຂ້າງຂອງພວກເຮົາເຊິ່ງພວກເຮົາມີທໍ່ ພີວີຊີ ທີ່ຜະລິດຕາມມາດຕະຖານ ອຸດສາຫະກໍາຂອງໄທ ແລະ ສອດຄ່ອງກັບມາດຕະຖານອຸດສາຫະກໍາແຫ່ງຊາດລາວ ພ້ອມນັ້ນກໍມີທໍ່ HDPE ທໍ່ດໍາ ທີ່ມີທຸກຂະໜາດນັບແຕ່ 16 ມິນລີແມັດຈົນຮອດ 1.600 ມີນລີແມັດ ເຊິ່ງມີຄວາມທັນທານສູງສາມາດຮັບແຮງດັນ ແລະສາມາດສະໜອງນໍ້າສະອາດໃຫ້ແກ່ສັງຄົມ ໂດຍສະເພາະເອົາທໍ່ ເອັສພີວີຊີ, ນອກນັ້ນກໍມີທໍ່ ພີພີອາ (PPR PIPE) ທໍ່ນໍ້າຮ້ອນນໍ້າເຢັນໃນອາຄານ ແລະ ມີທໍ່ uPVC ເຊິ່ງມີ ສີເທົາ, ສີຂາວ ນໍາໃຊ້ກັບລະບົບນໍ້າປະປາກໍດີ ຫຼື ໃຊ້ກັບລະບົບຊົນລະປະທານກໍດີ, ໃຊ້ລະບາຍນໍ້າຖ້ວມຂັງ ຫຼື ໃຊ້ລະບາຍນໍ້າໃນອາຄານກໍດີ.

ພິເສດສໍາລັບປີນີ້ທາງໂຮງງານອຸດສາຫະກໍາໂຕໂຢລາວ ກໍໄດ້ຜະລິດທໍ່ໃໝ່ອອກມາ ເຊິ່ງເປັນ ທໍ່ລອນ ຫຼື Double Wall Corrugated Pipe (DWC Pipe) ມີຂະໜາດ200-1.200 ມີນລີແມັດ ເຊິ່ງຜະລິດຕາມມາດຕະຖານຂອງສະຫະພາບເອີລົບສະໜອງໃຫ້ໂຄງການລະບາຍນໍ້າ ແລະບໍາບັດນໍ້າເປື້ອນຂອງນະຄອນຫຼວງວຽງຈັນ ເຊິ່ງກໍາລັງຈັດຕັ້ງປະຕິບັດຢູ່ໃນນະຄອນຫຼວງວຽງຈັນ ຄຽງຄູ່ເຮົາຜະລິດໄດ້ສິນຄ້າຫຼາກຫຼາຍຄືແນວນີ້ພວກເຮົາກໍເນັ້ນຜະລິດໃຫ້ໄດ້ມາດຕະຖານສາກົນ.

แชร์