ສະພາການຄ້າຈີນປະຈໍາ ລາວ ມອບເງິນຊ່ວຍເຫລືອໄພພິບັດນໍ້າຖ້ວມ

ໃນວັນທີ 2 ຕຸລາ 2024 ນີ້, ສະພາການຄ້າຈີນປະຈໍາ ສປປ ລາວ ແລະສະພາການຄ້າຈີນຢຸນໜານ ແຂວງຫູໜານ ສປ ຈີນ ໄດ້ມອບເງິນຊ່ວຍເຫລືອໄພພິບັດນໍ້າຖ້ວມ 2024 ຢູ່ ສປປ ລາວ ຈໍານວນທັງໝົດ 1,4 ຕື້ກີບ ຕາງໜ້າຮັບໂດຍທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ແລະຕາງໜ້າມອບໂດຍ ທ່ານ ມາ ຢູ ຫລົງ ປະທານປະຕິບັດວຽກງານ, ເລຂາທິການສະພາການຄ້າຈີນ ພ້ອມດ້ວຍຄະນະ.

ໃນໂອກາດນີ້, ທ່ານ ນາງ ໃບຄຳ ຂັດທິຍະ ໄດ້ສະແດງຄວາມຂອບໃຈ, ຮູ້ບຸນຄຸນ ແລະຊົມເຊີຍມາຍັງສະພາການຄ້າຈີນປະຈໍາ ສປປ ລາວ ແລະສະພາການຄ້າຈີນຢຸນໜານ ແຂວງຫູໜານ ທີ່ໄດ້ມີຈິດໃຈມະນຸດສະທໍາ, ເອື້ອເຟື້ອເຜື່ອແຜ່ໃຫ້ການຊ່ວຍເຫລືອປະຊາຊົນ ຜູ້ປະສົບໄພພິບັດທາງທໍາມະຊາດໃນຄັ້ງນີ້ ຊຶ່ງການຊ່ວຍເຫລືອດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການຂອງສະພາບການຕົວຈິງໃນປັດຈຸບັນ, ເປັນການເສຍສະລະ ເພື່ອປະກອບສ່ວນເຂົ້າໃນການແກ້ໄຂຜົນກະທົບ ແລະ ຟື້ນຟູຊີວິດການເປັນຢູ່ຂອງປະຊາຊົນປະສົບໄພທໍາມະຊາດໃຫ້ກັບຄືນສູ່ສະພາບປົກກະຕິໂດຍໄວ.

ພ້ອມນີ້, ທ່ານລັດຖະມົນຕີກະຊວງ ແຮງງານ ແລະສະຫວັດດີການສັງຄົມ ຍັງໄດ້ສະແດງຄວາມຢືນຢັນວ່າ ຈະນໍາເອົາການຊ່ວຍເຫລືອດັ່ງກ່າວໄປມອບໃຫ້ພາກສ່ວນກ່ຽວຂ້ອງ ເພື່ອນຳໃຊ້ເຂົ້າໃນການຊ່ວຍເຫລືອບັນເທົາທຸກໃຫ້ແກ່ຜູ້ປະສົບໄພດ້ວຍຄວາມໂປ່ງໃສ, ທົ່ວເຖິງ ແລະຖືກເປົ້າໝາຍຢ່າງແທ້ຈິງ.
ຂ່າວ: ສົມຫວັງ
ພາບ: ເກດສະໜາ

แชร์