150 ບໍລິສັດ ຮ່ວມວາງສະແດງງານຜະລິດຕະພັນລາວ 2024

ສະພາການຄ້າ ແລະອຸດສາຫະກຳ ແຫ່ງຊາດລາວ (ສຄອຊ) ຈັດງານຜະລິດຕະພັນລາວ 2024 ຫລື ວ່າງານ “Made in Laos 2024”, ຂຶ້ນຢ່າງເປັນທາງການໃນວັນທີ 1 ຕຸລາ, ໃຫ້ກຽດເຂົ້າຮ່ວມ ໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ, ມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ, ຕາງໜ້າຈາກກະຊວງກົມກອງຕ່າງໆ ພ້ອມດ້ວຍບັນດາບໍລິສັດທີ່ໃຫ້ການສະຫນັບສະຫນູນຕ່າງໆ ທັງພາຍໃນ ແລະຕ່າງປະເທດເຂົ້າຮ່ວມ.

ທ່ານ ນ. ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ກ່າວວ່າ: ງານຜະລິດຕະພັນລາວແມ່ນໄດ້ຈັດຂຶ້ນເກືອບທຸກໆປີ ໂດຍທາງ ສຄອຊ ເຊີ່ງໄດ້ຈັດຂຶ້ນຄັ້ງທໍາອິດໃນປີ 2011 ແລະ ມາຮອດປີນີ້ ກໍ່ເປັນປີ ທີ 10 ຂອງການຈັດງານຜະລິດຕະພັນລາວ ໂດຍໄດ້ຮັບການສະໜັບສະໜູນ ແລະ ຊີ້ນໍາຢ່າງໃກ້ສິດຈາກລັດຖະບານ ກໍຄືກະຊວງອຸດສາຫະກຳ ແລະ ການຄ້າ. ໂດຍປີນີ້ແມ່ນ ຈັດຂຶ້ນໃນລະຫວ່າງວັນທີ 28 ກັນຍາ ຫາ ວັນທີ 7 ຕຸລາ 2024, ຊຶ່ງສະພາການຄ້າ ແລະ ອຸດສາຫະກຳ ແຂວງ ສະຫວັນນະເຂດ ໄດ້ເປັນຄູ່ຮ່ວມຫຼັກຂອງງານ ແລະ ໃນປີໜ້າກໍ່ຈະແມ່ນ ສະພາການຄ້າ ແລະ ອຸດສາຫະກຳ ແຂວງວຽງຈັນ. ຈຸດປະສົງຫລັກແມ່ນເພື່ອເປັນການສ້າງກິດຈະກຳໜຶ່ງຂອງພາກທຸລະກິດເພື່ອປະກອບສ່ວນໃນການສ້າງເວທີ ແລະເປັນການໂຄສະນາສົ່ງເສີມຜະລິດຕະພັນທີ່ຜະລິດໃນລາວ, ພ້ອມທັງເອື້ອອໍານວຍ ສົ່ງເສີມໃຫ້ແກ່ຜູ້ປະກອບການທີ່ເຮັດການຜະລິດທັງພາຍໃນ ແລະ ຕ່າງປະເທດ, ໂດຍສະເພາະ ສ້າງຍີ່ຫໍ້ສິນຄ້າທີ່ຜະລິດໃນລາວໃຫ້ມີມາດຕະຖານ ແລະ ຄຸນນະພາບ, ສາມາດແຂ່ງຂັນຈຳໜ່າຍພາຍໃນ ແລະ ສົ່ງອອກຕ່າງປະເທດໃຫ້ນັບມື້ນັບຫຼາຍຂຶ້ນ, ພ້ອມດຽວກັນນັ້ນ ກໍ່ເພື່ອເປັນການສ້າງຄວາມພາກພູມໃຈ, ຊຸກຍູ້ສົ່ງເສີມໃຫ້ນໍາໃຊ້ຜະລິດຕະພັນລາວ ແລະ ເພື່ອເປັນການຫລຸດຜ່ອນການນໍາເຂົ້າສິນຄ້າຈາກຕ່າງປະເທດ ຄືດັ່ງ ຫົວຂໍ້ຫຼັກຂອງງານ “ຊຸກຍູ້ພັກດັນເສດຖະກິດຜະລິດຕະພັນລາວກ້າວສູ່ສາກົນ” ເປົ້າໝາຍໂດຍລວມກໍ່ເພື່ອປະກອບສ່ວນສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນໄປເລື້ອຍໆ.

ງານໃນຄັ້ງນີ້ມີຜູ້ປະກອບການໃນທົ່ວປະເທດເຂົ້າຮ່ວມລວມໝົດມີ 150 ບໍລິສັດ ຈາກ 17 ແຂວງ ແລະ ນະຄອນຫຼວງວຽງຈັນ ແລະ ມີທັງໝົດ 201 ຫ້ອງວາງສະແດງ. ຊຶ່ງຜະລິດຕະພັນທີ່ນໍາມາວາງສະແດງລວມມີຫຼາຍຂະແໜງການເຊັ່ນ: ຂະແໜງຜະລິດຕະພັນສິນຄ້າທີ່ຈົດກາໝາຍ Made in Laos; ຜະລິດຕະພັນ ຫັດຖະກຳແຜນແຜ່,ຜ້າຝ້າຍ, ຜ້າໃຫມ; ເຟີນີເຈີ ແລະ ເຄື່ອງຕົບແຕ່ງພາຍໃນພາຍ; ຜະລິດຕະພັນ ກະສິກຳ ( ເຂົ້າ, ຊາ, ກາເຟ ); ອາຫານ ແລະ ເຄື່ອງດື່ມ; ຜະລິດຕະພັນອຸດສາຫະກໍາໜັກ-ເບົາ; ຜະລິດຕະພັນ ຂົນສົ່ງ, ທະນາຄານ, ຄຣີນິກ; ຜະລິດຕະພັນລາວ ຫັດຖະກຳໄມ້ປ່ອງ; ຜະລິດຕະພັນໜຶ່ງເມືອງໜຶ່ງຜະລິດພັນ (ODOP) ສິນຄ້າຈາກຄອບຄົວຕົວແບບຂອງ; ຜະລິດຕະພັນ ສິນຄ້າຂອງບັນປະເທດອາຊຽນ + ສປ ຈີນ, ຊຶ່ງລວມມູນຄ່າສິນຄ້າທີ່ນຳມາວາງສະແດງ ຫລາຍກວ່າ 9 ຕື້ກວ່າກີບ.

ພາຍໃນງານມີກິດຈະກຳສຳຄັນຫລາຍຢ່າງເປັນຕົ້ນແມ່ນການສະແດງສິນລະປະ, ການສຳມະນາໃນຫົວຂໍ້ຕ່າງໆ ເພື່ອມາໃຫ້ຄວາມຮູ້ ແລະແລກປ່ຽນຄໍາຄິດຄໍາເຫັນຮ່ວມກັນ ເຊັ່ນ: ການສໍາມະນາໃຫ້ຄວາມຮູ້ກ່ຽວກັບການເພີ່ມທະວີການຄ້າ ຂອງ ສປປ ລາວ ເຂົ້າສູ່ຕະຫຼາດໂລກໂດຍບໍລິສັດ ອີນເຕີເທັກ ຮ່ວມ ກັບ ສຄອຊ, ພິທີມອບລາງວັນຄຸນນະພາບແຫ່ງຊາດ (Lao National Quality Award) ແລະຈະໄດ້ຕ້ອນຮັບຄະນະນັກທຸລະກິດຍິງຂອງບັນດາປະເທດອາຊຽນເພື່ອມາທ່ຽວຊົມ-ຊື້ ສິນຄ້າພາຍໃນງານອີກດ້ວຍ.

ຂ່າວ: ສາວລາວໃຕ້

ພາບ: ສຸກສະຫວັນ

แชร์