ຄະນະຜູ້ແທນສະຖາບັນວິທະຍາສາດ 4 ປະເທດຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະເຂດໂລຊິດສະຕິກວຽງຈັນ

ວັນທີ 27 ກັນຍາ 2024 ຄະນະຜູ້ແທນຈາກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ (LASES) ລາຊະບັນດິດສະພາກຳປູເຈຍ (RAC) ສະຖາບັນບັນ ດິດວິທະຍາສາດສັງຄົມຫວຽດນາມ (VASS) ແລະ ສະຖາບັນສິ່ງແວດລ້ອມ ສ ເກົາຫຼີ (KEI) ນໍາໂດຍ ທ່ານ ປອ ນາງ ແກ້ວວິວອນ ອຸດທະຈັກ ຮອງລັດຖະມົນຕີ ຮອງປະ ທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ໄປຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຊິດສະຕິກວຽງຈັນ ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ຖືກຕ້ອນຮັບໂດຍ ທ່ານ Tee Chee Seng ຮອງປະທານບໍລິສັດ ວຽງຈັນໂລຊິດສະຕິກພາກ ຈຳກັດ ທ່ານ ສາຄອນ ພິລາງາມ ຜູ້ອໍານວຍການໃຫຍ່ບໍລິສັດ ທ່າບົກທ່ານາແລ້ງ ຈໍາກັດຜູ້ດຽວ ທ່ານ ສີສຸພັນ ສິ່ງສະຫວ່າງ ຫົວໜ້າຫ້ອງການບໍລິຫານບໍລິສັດ ວຽງຈັນໂລຊິດສະຕິກພາກ ຈໍາກັດ ພ້ອມດ້ວຍຄະນະບໍລິຫານ.

ໂອກາດນີ້ ທ່ານ ປອ ນາງ ແກ້ວວິວອນ ອຸດທະຈັກ ໄດ້ກ່າວຈຸດປະສົງວ່າ: ຂ້າພະເຈົ້າຕາງໜ້າຄະນະນໍາສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ໄດ້ນໍາພາຄະນະຜູ້ແທນຈາກຕ່າງ ປະເທດທີ່ເດີນທາງມາເຂົ້າຮ່ວມກອງປະຊຸມສຳມະນາວິທະຍາສາດສາກົນ 3 ຊາດຄື:ລາວ-ຫວຽດນາມ-ກຳ ປູເຈຍ ພາຍໃຕ້ຫົວຂໍ້ການເພີ່ມທະວີການຮ່ວມມືລະຫວ່າງລາວ-ຫວຽດນາມ-ກຳປູເຈຍພາຍໃຕ້ສະພາບການໃໝ່ຂອງໂລກ ແລະກອງປະຊຸມສຳມະນາວິທະຍາສາດສາກົນ 4ສະຖາບັນຄື: ສະຖາບັນວິທະຍາສາດເສດຖະກິດ ແລະ ສັງຄົມລາວສະຖາບັນສິ່ງແວດລ້ອມ ສ ເກົາຫຼີ ລາຊະບັນດິດສະພາກຳປູເຈຍ ແລະ ສະຖາບັນວິທະຍາສາດສັງຄົມຫວຽດນາມ ພາຍໃຕ້ຫົວຂໍ້ການຮ່ວມມືພາກພື້ນເພື່ອຕອບໂຕການປ່ຽນແປງ ສະ ພາບດິນຟ້າອາກາດ ຍຸດທະສາດ ຜົນກະທົໄບ ແລະ ມາດຕະກຫານຂະແໜງການຈັດຂຶ້ນວັນທີ 25-26 ກັນຍາ 2024 ທີ່ນະຄອນຫຼວງວຽງຈັນ ເພື່ອເປັນການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ລາວເຮົາເປັນເຈົ້າພາບຈັດຂຶ້ນຕົ້ນເດືອນຕຸລາ 2024 ເຊິ່ງການເດີນທາງມາຢ້ຽມຢາມສະຖານ ທີ່ແຫ່ງນີ້ຈະເປັນໂອກາດອັນດີທີ່ຄະນະຜູ້ແທນຈະໄດ້ເຫັນການພັດທະນາ ແລະ ການບໍລິການຂອງດ່ານ ສາກົນສິນຄ້າທ່າບົກທ່ານາແລ້ງ ແລະ ແຜນການພັດທະນາເຂດໂລຊິດສະຕິກນະຄອນຫຼວງວຽງຈັນໃນຕໍ່ໜ້າ.

ຈາກນັ້ນຄະນະຜູ້ແທນໄດ້ຮັບຟັງກ່າວຕ້ອນຮັບຈາກທ່ານ Tee Chee Seng ຮັບຟັງການນໍາສະເໜີກ່ຽວກັບທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງ ຈັນ ແລະ ການເຊື່ອມໂຍງເຊື່ອມຈອດພາກພື້ນຂອງລາວສະເໜີໂດຍທ່ານ ສາຄອນ ພິລາງາມ ແລະ ຮັບຟັງການນໍາສະເໜີວິດີໂອກ່ຽວກັບໂຄງ ການເຂດໂລຊິດສະຕິກນະ ຄອນຫຼວງວຽງຈັນ ເຊິ່ງເຫັນວ່າ: ໂຄງການດັ່ງກ່າວເປັນໂຄງການຍຸດທະສາດສຳ ຄັນໜຶ່ງທີ່ເຊື່ອມໂຍງເຊື່ອມຈອດດ້ານການຂົນສົ່ງການຄ້າຫັນ ສປປ ລາວ ຈາກປະເທດບໍ່ມີຊາຍແດນຕິດກັບທະເລກາຍເປັນປະເທດເຊື່ອມໂຍງເຊື່ອມຈອດດ້ານການຂົນສົ່ງການຄ້າດ້ານຍຸດທະສາດຂອງລັດຖະບານເປັນໂຄງການໜຶ່ງຂອງລາວໂລຊິດສະຕິກລິ້ງແມ່ນອີງໃສ່ການຜັນຂະຫຍາຍນະໂຍບາຍວ່າດ້ວຍການເຊື່ອມໂຍງເຊື່ອມຈອດເອົາຈຸດທີ່ຕັ້ງຂອງປະເທດລາວເຮົາສ້າງເປັນຈຸດແຂງເພື່ອປະກອບສ່ວນເຂົ້າໃນວຽກງານການຂົນສົ່ງການຄ້າລາວໂລຊິດສະຕິກລິ້ງປະກອບມີທ່າເຮືອຢູ່ວຸ່ງອ່າງ ສສ ຫວຽດນາມ ເສັ້ນທາງລົດໄຟລາວ-ຫວຽດນາມ ເຂດໂລຊິດສະຕິກຢູ່ແຂວງຄຳມ່ວນ ແລະ ເຂດໂລຊິດສະຕິກຢູ່ນະຄອນ ຫຼວງວຽງຈັນ ເຊິ່ງທັງໝົດນີ້ແມ່ນຍຸດທະວສາດຂອງລັດຖະບານລາວ ເປົ້າໝາຍຂອງລາວໂລຊິດສະຕິກລິ້ງຖ້າຫາກເສັ້ນ ທາງລົດໄຟເຊື່ອມໂຍງກັບທ່າເຮືອວຸ້ງອ່າງເຊິ່ງຜ່ານແຂວງຄຳມ່ວນຫາແຂວງຮ່າຕິ້ງຫາທ່າ ເຮືອງວຸ້ງອ່າງແມ່ນຈະເຮັດໃຫ້ປະເທດລາວຈາກປະເທດທີ່ບໍ່ມີຊາຍແດນຕິດຈອດກັບທະເລກາຍ ເປັນປະເທດທີ່ເຊື່ອມໂຍງກັບທະເລ ເສັ້ນທາງລົດໄຟລາວ-ຫວຽດນາ ປັດຈຸບັນໄດ້ສຳ ເລັດການສຶກສາສຳຫຼວດອອກແບບດ້ານສິ່ງແວດ ລ້ອມຕ່າງໆຖ້າເສັ້ນທາງລົດໄຟສຳເລັດຈະເຮັດໃຫ້ລາວມີທາງອອກສູ່ທະເລໄປສູ່ປາຊີຟິກ ເພື່ອເຮັດໃຫ້ລາວຍົກສູງການຜະລິດການຄ້າ ກະສິກຳ ແລະ ການທ່ອງທ່ຽວ ໃນນັ້ນເຂດໂລຊິດສະຕິກຢູ່ຕາມເສັ້ນທາງລົດ ໄຟລາວ-ຫວຽດນາມແລ້ວເຊື່ອມໂຍງໃສ່ເຂດໂລຊິດສະຕິກນະຄອນຫຼວງວຽງຈັນ ໂຄງການທ່າບົກທ່ານາແລ້ງແມ່ນນອນຢູ່ໃນໂຄງການຍຸດທະສາດຫຼັກທີ່ລັດຖະບານລາວໄດ້ຊຸກຍູ້ ແລະສົ່ງເສີມກຸ່ມບໍລິສັດ ພີທີແອວໂຮນດິ້ງ ຈຳກັດ ໄດ້ເຮັດການກໍ່ສ້າງ ແລະ ເປີດບໍລິການໃນທ້າຍປີ 2021 ໂຄງການມີເນື້ອທີ່ທັງໝົດ 418 ເຮັກຕາ ໃນນັ້ນເນື້ອທີ່ເຂດໂລຊິດສະຕິກ 327 ເຮັກຕາ ແລະ ທ່າບົກທ່ານາແລ້ງເນື້ອທີ່ 98 ເຮັກຕາ ເຊິ່ງເປັນການລົງທຶນຂອງເອກະຊົນລາວ 100% ໂຄງການມີມູນຄ່າ 727 ລ້ານໂດລາສະຫະລັດ ປັດຈຸບັນບໍລິສັດສຳເລັດພັດທະນາໂຄງການທ່າບົກທ່ານາແລ້ງໃນໄລຍະທີ 1 ແລະ ສືບຕໍ່ກໍ່ສ້າງໂຄງການໄລຍະທີ 2 ເຂດໂລຊິກສະຕິກໃນເນື້ອທີ່ 327 ເຮັກຕາ ການພັດທະນາປະກອບດ້ວຍ 8 ເຂດຄື: ເຂດສາງເກັບມ້ຽນນໍາມັນ ເຂດຜະລິດສົ່ງອອກ (ເຂດອຸດສາຫະກໍາເບົາ) ເຂດໂລຊິດສະຕິກພາກ (ເຂດສາງສິນ ຄ້າ ແລະ ສາງເຢັນ) ເຂດການຄ້າ ເຂດເຕັກໂນໂລຊີ ເຂດການເງິນ ເຂດໂຮງງານກັ່ນ ແລະ ຫຼອມຄໍາ ແລະ ເຂດກັກກັ້ນພືດ ແລະສັດ ມູນຄ່າການກໍ່ສ້າງປະມານ 500 ລ້ານໂດລາສະຫະລັດ ຄາດໝາຍການກໍ່ສ້າງຈະໃຫ້ສຳເລັດພາຍໃນ 3 ປີຂ້າງໜ້າ ແລະ ຈະເລີ່ມກໍ່ສ້າງເດືອນພະຈິກ 2024.

ນອກນີ້ທ່ານ Tee Chee Seng ແລະທ່ານ ສາຄອນ ພິລາງາມ ຍັງໄດ້ຍົກໃຫ້ເຫັນການຂົນສົ່ງທາງ ບົກທີ່ມີການເຊື່ອມກັນໃນບັນດາປະເທດອາຊຽນໃນນັ້ນກໍມີຫວຽດ ນາມ ແລະ ກຳປູເຈຍ ຖ້າໃນອະນາຄົດ ການສ້າງເສັ້ນທາງລົດໄຟລາວ-ຫວຽດນາມ ແລະ ລາວ-ກຳປູເຈຍສຳເລັດຈະເຮັດໃຫ້ການຂົນສົ່ງສະ ດວກຂຶ້ນ ແລະ ເວລານັ້ນລາວຈະເປັນສູນກາງການຂົນສົ່ງສິນຄ້າໄປຍັງຈີນ ປະເທດຕ່າງໆໃນອາຊີ ແລະ ເອີລົບໂດຍການຂົນສົ່ງທາງລົດໄຟ ໃນນັ້ນສິນຄ້າຈາກຫວຽດນາມ ແລະ ກຳປູເຈຍກໍຈະມາຜ່ານປະເທດ ລາວກ່ອນຈະໄປເຖິງປະເທດປາຍທາງ.

ຕອນທ້າຍສອງຝ່າຍຍັງໄດ້ສົນທະນາແລກປ່ຽນບາງບັນຫາທີ່ມີຄວາມສົນໃຈນຳກັນຈາກນັ້ນຄະນະບໍລິ ຫານບໍລິສັດໄດ້ນໍາພາຄະນະຜູ້ແທນໄປຢ້ຽມຢາມຕົວຈິງເບິ່ງຕຶກປະຕິບັດງານຂອງທ່າບົກທ່ານາແລ້ງ ແລະ ຕຶກພາສີທ່າບົກທ່ານາແລ້ງ ຢ້ຽມຢາມລານຕູ້ສິນຄ້າຊີວາຍ ສາງຄ່ຽນຖ່າຍສິນຄ້າ ແລະ ຈຸດຄ່ຽນຖ່າຍສິນຄ້າລະຫວ່າງລາງມາດຕະຖານ ແລະ ລາງໜຶ່ງແມັດຕື່ມອີກ.

#ວຽງຈັນໃໝ່

แชร์