ປະທານສະພາແຫ່ງຊາດ ຮັບການເຂົ້າຢ້ຽມຂໍ່ານັບຂອງທູດໄທ

ໃນວັນຈັນທີ 30 ກັນຍາທີ່ຜ່ານມາ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ມໍຣະກົດ ສີສະຫວັດ ເອກອັກຄະລາຊະທູດ ແຫ່ງ ລາຊະອານາຈັກໄທ ປະຈໍາ ສປປລາວ ໂດຍທ່ານປະທານສະ ພາແຫ່ງຊາດ ໄດ້ກ່າວສະແດງຄວາມຍິນດີຕ້ອນຮັບ ແລະຊົມເຊີຍຕໍ່ທ່ານທູດທີ່ປະຕິບັດໜ້າທີ່ປະສານສົມທົບກັບ ສປປ ລາວ ທັງສາຍລັດບໍລິຫານ ແລະສາຍນິຕິບັນຍັດໂດຍສະເພາະເປັນເຈົ້າການໃນການຊຸກຍູ້, ສົ່ງເສີມ ແລະສະໜັບສະໜູນການເປັນປະທານອາຊຽນ ແລະ ປະທານໄອປາ ຂອງ ສປປ ລາວ ເຊິ່ງເປັນ ການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດກໍຄືການເປັນຄູ່ຮ່ວມຍຸດທະສາດເພື່ອການຈະເລີນເຕີບໂຕ ເເລະ ການພັດທະນາເເບບຍືນຍົງ ໃຫ້ນັບມື້ຈະເລີນງອກງາມຍິ່ງໆຂຶ້ນ; ສະແດງຄວາມຂອບໃຈລັດຖະບານ ແລະ ລັດຖະສະພາ ກໍຄືປະຊາຊົນໄທ ທີ່ໃຫ້ການສະໜັບສະໜູນທັງດ້ານຊ່ຽວຊານ ແລະວັດຖຸປັດໄຈ ປະກອບສ່ວນຊ່ວຍໃນການຈັດຕັ້ງກອງປະຊຸມໄອປາ ຄັ້ງທີ 45 ທີ່ສະພາແຫ່ງຊາດລາວເປັນເຈົ້າພາບໃນປີນີ້ໃຫ້ໄດ້ຮັບຜົນສໍາເລັດຢ່າງຈົບງາມ.

ການພົວພັນຮ່ວມມືລະຫວ່າງສອງອົງການນິຕິບັນຍັດ ລາວ- ໄທ ໃນໄລຍະຜ່ານມາ ໄດ້ຮັບການພັດທະນາຢ່າງຕໍ່ເນື່ອງ, ສອງຝ່າຍມີການແລກປ່ຽນຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນເປັນປົກກະຕິ, ອັນພົ້ນເດັ່ນໃນເດືອນຕຸລາ 2022 ທ່ານ ປອ. ໄຊສົມພອນ ພົມວິຫານ ໄດ້ນໍາພາຄະນະຜູ້ແທນຂັ້ນສູງຂອງສະພາແຫ່ງຊາດລາວຢ້ຽມຢາມຢ່າງເປັນທາງການຢູ່ປະເທດໄທ ແລະໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ກັບ ລັດຖະສະພາໄທ ເປັນສະບັບທໍາອິດຂອງສອງອົງການນິຕິບັນຍັດ ລາວ- ໄທ; ສອງຝ່າຍໄດ້ສະໜັບສະໜູນເຊິ່ງກັນແລະກັນຕະຫຼອດມາທັງໃນຂອບສອງຝ່າຍ ແລະ ຫຼາຍຝ່າຍ.

ໂອກາດນີ້, ທ່ານ ນາງ ມໍຣະກົດ ສີສະຫວັດ ໄດ້ກ່າວສະແດງຄວາມຂອບໃຈຢ່າງສູງທີ່ທ່ານປະທານສະພາແຫ່ງຊາດ ໄດ້ໃຫ້ການຕ້ອນຮັບຢ່າງອົບອຸ່ນພ້ອມທັງແຈ້ງໃຫ້ຊາບກ່ຽວກັບຈຸດປະສົງຂອງການ ເຂົ້າຢ້ຽມຂໍ່ານັບໃນຄັ້ງນີ້ ແລະ ນໍາເງິນ ຈໍານວນ 2.1 ລ້ານບາດ ມາມອບເພື່ອອຸປະຖໍາການເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ເຊິ່ງຕາງໜ້າຮັບໂດຍທ່ານນາງ ອໍາໄພວອນ ລ້ອມບຸນແພງ ເລຂາທິການສະພາແຫ່ງຊາດ, ຈາກນັ້ນ ທ່ານ ປອ. ໄຊສົມພອນ ພົມວິຫານ ໄດ້ມອບໃບຍ້ອງຍໍໃຫ້ລັດຖະບານແຫ່ງລາຊະອານາຈັກໄທທີ່ປະກອບສ່ວນອຸປະຖໍາໃນຄັ້ງນີ້.

แชร์