ຂປລ. ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ປີນີ້ແມ່ນປີສະຖາປະນາ ສປ ຈີນຄົບຮອບ 75 ປີ. ໃນຮອບ 75 ປີທີ່ຜ່ານມາ ໄດ້ເປັນສັກຂີພິຍານໃຫ້ແກ່ຄວາມມະຫັດສະຈັນແຫ່ງການພັດທະນາຢ່າງວ່ອງໄວຂອງເສດຖະກິດຈີນ ທັງເປັນສັກຂີພິຍານໃຫ້ແກ່ສິ່ງທີ່ຕ່າງຝ່າຍຕ່າງໄດ້ຮັບຜົນປະໂຫຍດ ລະຫວ່າງ ຈີນກັບໂລກ. ເລີ່ມຈາກປະເທດທີ່ອ່ອນແອ ແລະ ທຸກຍາກ ກາຍມາເປັນກຸ່ມເສດຖະກິດໃຫຍ່ອັນດັບສອງຂອງໂລກ, ປະເທດໃຫຍ່ດ້ານອຸດສາຫະກຳອັນດັບໜຶ່ງຂອງໂລກ, ປະເທດໃຫຍ່ດ້ານການຄ້າສິນຄ້າປະເພດຈັບຕ້ອງໄດ້ອັນດັບໜຶ່ງຂອງໂລກ, ປະເທດໃຫຍ່ດ້ານການບໍລິໂພກສິນຄ້າອັນດັບສອງຂອງໂລກ……ຈີນໄດ້ກາຍເປັນພະລັງຂັບເຄື່ອນອັນສຳຄັນໃນດ້ານການເຕີບໂຕຂອງເສດຖະກິດໂລກ. ໃນລະຫວ່າງປີ 1979 ຫາປີ 2023, ອັດຕາການເຕີບໂຕສະເລ່ຍຕໍ່ປີຂອງເສດຖະກິດຈີນ ໄດ້ບັນລຸເຖິງ 8,9%, ສູງກວ່າອັດຕາການເຕີບໂຕສະເລ່ຍຂອງເສດຖະກິດໂລກໃນໄລຍະດຽວກັນທີ່ເປັນ 3,0%. ໂດຍສະເພາະໃນໄລຍະ 10 ກວ່າປີຜ່ານມາ, ອັດຕາປະກອບສ່ວນສະເລ່ຍຂອງຈີນ ທີ່ມີຕໍ່ເສດຖະກິດໂລກມີຫລາຍກວ່າ 30%.

ໃນຮອບ 75 ປີທີ່ຜ່ານມາ ໄດ້ເກີດມີການປ່ຽນແປງແບບພິກແຜ່ນດິນ ປີ້ນແຜ່ນຟ້າ, ເປັນຫຍັງຈີນ ແລະ ໂລກຈຶ່ງສາມາດບັນລຸແບບຕ່າງຝ່າຍຕ່າງໄດ້ຮັບຜົນປະໂຫຍດ? ນີ້ກໍຍ້ອນວ່າ ຈີນໄດ້ຖືຕົນເອງຢູ່ໃນກະແສການພັດທະນາຂອງມວນມະນຸດຢ່າງສະເໝີຕົ້ນສະເໝີປາຍ, ສ້າງຜົນປະໂຫຍດຮ່ວມກັນກັບໂລກ ແລະ ພັດທະນາຮ່ວມກັນ, ຊຸກຍູ້ລະບົບການບໍລິຫານໂລກໃຫ້ກ້າວໄປຕາມທິດທາງທີ່ຍຸຕິທຳ ແລະ ສົມເຫດສົມຜົນ.

ການເຮັດແນວໃດຈຶ່ງຈະສາມາດແກ້ໄຂບັນຫາອັນຫຍຸ້ງຍາກດ້ານການພັດທະນາໄດ້? ຈີນໄດ້ມີການເຄື່ອນໄຫວມາໂດຍຕະຫລອດ: ເລີ່ມຈາກການວາງບັນຫາການພັດທະນາໃສ່ຖານະໃຈກາງຂອງວາລະສາກົນ ຮອດການສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ສາມຂໍ້ລິເລີ່ມໃຫຍ່ທົ່ວໂລກ; ເລີ່ມຈາກການຊ່ວຍເຫລືອປະເທດທີ່ກຳລັງພັດທະນາເພື່ອຮັບມືກັບຄວາມສ່ຽງ ແລະ ສິ່ງທ້າທາຍຕ່າງໆ ຮອດການຄັດຄ້ານບາງປະເທດຝ່າຍຕາເວັນຕົກທີ່ປະຕິບັດການປິດລ້ອມດ້ານເຕັກນິກ ແລະ ຕັດສາຍພົວພັນດ້ານການຄ້າກັັບຈີນ, ຕັ້ງແຕ່ໃດມາ, ຈີນກໍໄດ້ຊຸກຍູ້ການ ເປິກສາຫາລືຮ່ວມກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ ເພື່ອເຮັດໃຫ້ໝາກຜົນການພັດທະນາສາມາດສ້າງຜົນປະໂຫຍດໃຫ້ແກ່ທຸກຄົນ.